ନବରଙ୍ଗପୁର: ଚିକିତ୍ସାଧୀନ ୩ ଶିଶୁଙ୍କ ମୃତ୍ୟୁ

ନବରଙ୍ଗପୁର: ନବରଙ୍ଗପୁର ଜିଲ୍ଲା ସଦର ଚିକିତ୍ସାଳୟରେ ବୁଧବାର ଚିକିତ୍ସାଧୀନ ଅବସ୍ଥାରେ ୩ ଜଣ ଶିଶୁଙ୍କ ମୃତ୍ୟୁ ଘଟିଛି। ମୃତ ଶିଶୁମାନେ ଚିକିତ୍ସାଳୟର ଶିଶୁଯତ୍ନ କେନ୍ଦ୍ରରେ ଭର୍ତ୍ତି ହୋଇଥିଲେ। ବିଳମ୍ବରେ ଓ ଗୁରୁତର ଅବସ୍ଥାରେ ଅଣାଯାଇଥିବାରୁ ସେମାନଙ୍କ ମୃତ୍ୟୁ ଘଟିଥିବା ଡାକ୍ତର କହିଛନ୍ତି।

ତେନ୍ତୁଳିଖୁଣ୍ଟି ବ୍ଲକ ଅନ୍ତର୍ଗତ ଗୌଡ଼ଦେଓପାଲି ଗାଁର ତୁଳାମୁ ମୁଦୁଲିଙ୍କ ଶିଶୁପୁତ୍ରକୁ ଗତ ୭ ତାରିଖରେ ହସ୍ପିଟାଲରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ବୁଧବାର ତା’ର ମୃତ୍ୟୁ ଘଟିଥିଲା। ସେହିପରି ଇଚ୍ଛାପୁର ଗାଁର ତମାଳି ମାଝିଙ୍କ ଶିଶୁକନ୍ୟା ଓ ଅଞ୍ଜଳା ଗାଁର ଚମ୍ପଦା ହରିଜନଙ୍କ ଏକ ନବଜାତକ ଶିଶୁପୁତ୍ରର ମଧ୍ୟ ଗତକାଲି ମୃତ୍ୟୁ ଘଟିଥିଲା।

ଡାକ୍ତର ଧରଣୀଧର ସତପଥୀ କହିଛନ୍ତି, “ଶିଶୁମାନଙ୍କୁ ତନ୍ତୁଳିଖୁଣ୍ଟି ଓ ଉମରକୋଟ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରୁ ଗୁରୁତର ଅବସ୍ଥାରେ ଏଠାକୁ ସ୍ଥାନାନ୍ତର କରାଯାଇଥିଲା। ଶିଶୁମାନଙ୍କ ଚିକିତ୍ସାରେ କୌଣସି ପ୍ରକାର ଅବହେଳା କରାଯାଇନାହିଁ। ଗୁରୁତର ଅବସ୍ଥାରେ ଅଣାଯାଇଥିବାରୁ ସେମାନଙ୍କ ମୃତ୍ୟୁ ଘଟିଛି।”