ଭୁବନେଶ୍ୱର: କଂଗ୍ରେସ ନେତୃତ୍ୱାଧୀନ ୟୁପିଏ ସମର୍ଥିତ ଉପ-ରାଷ୍ଟ୍ରପତି ପ୍ରାର୍ଥୀ ଗୋପାଳକୃଷ୍ଣ ଗାନ୍ଧିଙ୍କୁ ସମର୍ଥନ କରିବ ବିଜେଡି। ଆଜି ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଘୋଷଣା କରିଛନ୍ତି। ଏହା ସହିତ ଉପ-ରାଷ୍ଟ୍ରପତି ପଦ ପାଇଁ ବିଜେଡି ଗୋପାଳକୃଷ୍ଣଙ୍କୁ ସମର୍ଥନ ଦେବ ନା ନାହିଁ ବୋଲି ଯେଉଁ ଚର୍ଚ୍ଚା ଚାଲିଥିଲା ତାହା ଶେଷ ହୋଇଯାଇଛି।
ପଶ୍ଚିମବଙ୍ଗର ପୂର୍ବତନ ରାଜ୍ୟପାଳ ଗୋପାଳକୃଷ୍ଣ ଗାନ୍ଧି ନବୀନଙ୍କର ପୁରୁଣା ବନ୍ଧୁ। ଏହା ସତ୍ତ୍ୱେ ଉପ-ରାଷ୍ଟ୍ରପତି ପଦ ପାଇଁ ୟୁପିଏ ଗୋପାଳଙ୍କ ନାମ ଘୋଷଣା କରିବା ପରେ ନବୀନ ସଙ୍ଗେ ସଙ୍ଗେ ତାଙ୍କୁ ସମର୍ଥନ ଜଣାଇ ନ ଥିଲେ। ତେଣୁ ନବୀନ ଦ୍ୱନ୍ଦ୍ୱରେ ଅଛନ୍ତି ବୋଲି କୁହାଯାଉଥିଲା। ତେବେ ବିଜେପି ନେତୃତ୍ୱାଧୀନ ଏନ୍ଡିଏ ଗତକାଲି ଭେଙ୍କେୟା ନାଇଡୁଙ୍କୁ ଏହାର ଉପ-ରାଷ୍ଟ୍ରପତି ପ୍ରାର୍ଥୀ ଘୋଷଣା କରିବା ପରେ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କ ଦଳର ନିଷ୍ପତ୍ତି ଶୁଣାଇଛନ୍ତି ଏବଂ ଗୋପାଳଙ୍କୁ ସମର୍ଥନ ଜଣାଇଛନ୍ତି।
ୟୁପିଏର ଉପ-ରାଷ୍ଟ୍ରପତି ପ୍ରାର୍ଥୀଙ୍କୁ ସମର୍ଥନ ଦେଇଥିବା ବିଜେଡି ରାଷ୍ଟ୍ରପତି ନିର୍ବାଚନରେ କିନ୍ତୁ ଏନ୍ଡିଏର ପ୍ରାର୍ଥୀ ରାମନାଥ କୋବିନ୍ଦଙ୍କ ସପକ୍ଷରେ ଭୋଟ୍ ଦେଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
