ଭୁବନେଶ୍ୱର: ରାଜଧାନୀ ଭୁବନେଶ୍ୱରର ରାସ୍ତାରେ ଆଜି ୩ ଜଣ ଯୁବତୀ ଦୁର୍ବ୍ୟବହାରରେ ଶିକାର ହୋଇଛନ୍ତି। ଏପରିକି ସେମାନଙ୍କ ମଧ୍ୟରୁ ଜଣେ ଯୁବତୀ ଓ ତାଙ୍କ ପୁରୁଷ ସାଙ୍ଗକୁ ମାଡ଼ ହୋଇଥିବା ଅଭିଯୋଗ ହୋଇଛି। ଏପରି ଅଭାବନୀୟ ଘଟଣା ପଟିଆ-ନନ୍ଦନକାନନ ରାସ୍ତାରେ ଘଟିଛି। ଏ ନେଇ ନନ୍ଦନକାନନ ଥାନାରେ ଅଭିଯୋଗ ହେବା ପରେ ପୋଲିସ୍ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି।
ଆଜି ଅପରାହ୍ନରେ ୩ ଜଣ ଯୁବତୀ ଓ ଜଣେ ପୁରୁଷ ସାଥୀ ଦୁଇଟି ଗାଡ଼ିରେ ଯାଉଥିବା ବେଳେ ଦୁଇ ଜଣ ଯୁବକ ସେମାନଙ୍କୁ କମେଣ୍ଟ ମାରି ପଳାଇଥିଲେ। ଯୁବତୀ ଓ ତାଙ୍କ ପୁରୁଷ ସାଙ୍ଗ ସମ୍ପୃକ୍ତ ଯୁବକଙ୍କୁ ପିଛା କରି ରାସ୍ତାରେ ଅଟକାଇ କମେଣ୍ଟ ମାରିବା ସମ୍ପର୍କରେ ପଚାରିଥିଲେ। ହେଲେ ଯୁବକମାନେ ସେମାନଙ୍କ ଦୋଷ ସ୍ୱୀକାର କରି ନ ଥିଲେ। ପରେ ସମ୍ପୃକ୍ତ ଯୁବତୀ ଜଣକ ଏ ସମ୍ପର୍କରେ ନନ୍ଦନକାନନ ଥାନାକୁ ଖବର ଦେଇଥିଲେ। ପୋଲିସ୍ର ପରାମର୍ଶ କ୍ରମେ ଯୁବତୀ ଓ ତାଙ୍କ ପୁରୁଷ ସାଙ୍ଗମାନେ କମେଣ୍ଟ ମାରିଥିବା ଯୁବକଙ୍କ ଗାଡ଼ିକୁ ପିଛା କରିଥିଲେ। ନନ୍ଦନକାନନ ପୂର୍ବରୁ ଏକ ବ୍ରିଜ୍ ପାଖରେ କମେଣ୍ଟ ମାରିଥିବା ଯୁବକଙ୍କ ୫ରୁ ୬ ଜଣ ସାଙ୍ଗ ସେମାନଙ୍କୁ ଅଟକାଇ ଗାଳି ଦେଇଥିଲେ। ଏପରିକି ସମ୍ପୃକ୍ତ ଯୁବତୀ ଓ ତାଙ୍କ ପୁରୁଷ ସାଙ୍ଗଙ୍କ ଚୁଟି ଟାଣି ମାଡ଼ ମାରି ଫେରାର ହୋଇଯାଇଥିଲେ। ପୋଲିସ୍ ବିଳମ୍ୱରେ ପହଞ୍ଚିବା ଯୋଗୁଁ ଅଭିଯୁକ୍ତମାନେ ଖସି ପଳାଇବାକୁ ସକ୍ଷମ ହେଲେ ବୋଲି ଅଭିଯୋଗ ହୋଇଛି। ପୋଲିସ ଏହି ଘଟଣା ରେକର୍ଡିଂ ହୋଇଥିବା ଫୁଟେଜକୁ ଯାଞ୍ଚ କରୁଛି।
ଏ ନେଇ ଜଣେ ଅଭିଭାବକ କହିଛନ୍ତି,“ପୋଲିସ୍ ଘଟଣାରେ ତଦନ୍ତ କରି ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରୁ। ବିନା କାରଣରେ ସେମାନେ ମାଡ଼ ମାରିଥିବାରୁ ସର୍ବ ସମ୍ମୁଖରେ ଭୁଲ ମାଗନ୍ତୁ।”
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।