ରାଉରକେଲା: ଦ୍ୱିତୀୟ ପର୍ଯ୍ୟାୟ ନିର୍ବାଚନ ପୂର୍ବରୁ ରାଉରକେଲା ପୂର୍ବତନ ବିଜେଡି ବିଧାୟକ ସାରଦା ପ୍ରସାଦ ନାୟକ ଅର୍ଥ ଦେଇ ଭୋଟରଙ୍କୁ ପ୍ରଭାବିତ କରୁଥିବା ନେଇ ଝରିପାଣି ଥାନାରେ ଅଭିଯୋଗ ହୋଇଛି।
ଗତକାଲି ବିଳମ୍ୱିତ ରାତିରେ ସାରଦା ଓ ତାଙ୍କ ସମର୍ଥକମାନେ ଝରିପାଣି ପଞ୍ଚାୟତରେ ଟଙ୍କା ବାଣ୍ଟୁଥିବା ବେଳେ କେତେକ ଗାଁ ଲୋକ ସେମାନଙ୍କୁ ଘେରାଉ କରିଥିଲେ। ଏପରିକି ସେଠାରେ ଗାଁ ଲୋକ ଓ ସାରଦାଙ୍କ ସମର୍ଥକଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ଏନେଇ ଗାଁ ଲୋକେ ଥାନାକୁ ଖବର ଦେଇଥିଲେ। ପୋଲିସ ଗାଁରେ ପହଞ୍ଚି ସେମାନଙ୍କୁ ଉଦ୍ଧାର କରିଥିବା ଜଣାପଡ଼ିଛି।
ଝରିପାଣି ପଞ୍ଚାୟତର ଜଣେ ବ୍ୟକ୍ତି କହିଛନ୍ତି,“ଗତକାଲି ସାରଦା ଓ ତାଙ୍କ ସମର୍ଥକମାନେ ଘରକୁ ଘର ବୁଲି ଲୋକଙ୍କୁ ପଇସା ବାଣ୍ଟୁଥିଲେ। ଏନେଇ ଆମେ ଥାନାକୁ ଖବର ଦେଇଥିଲୁ। ପୋଲିସ ବିଳମ୍ୱରେ ଗାଁରେ ପହଞ୍ଚିବାରୁ ସାରଦା ଓ ତାଙ୍କ ସମର୍ଥକମାନେ ଆମକୁ ଧସ୍ତାଧସ୍ତି କରିଥିଲେ।”
ସୂଚନା ଯୋଗ୍ୟ, ଆଜି ଝରିପାଣି ପଞ୍ଚାୟତରେ ମତଦାନ ହୋଇଛି। ଏଥିପାଇଁ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।