କଟକ: ଛାତ୍ର ସଂସଦ ନିର୍ବାଚନ ଫଳାଫଳକୁ ନେଇ ଗଣ୍ଡଗୋଳକୁ ନେଇ ସାଇନ ଏ ଡାଏ ଘୋଷଣା ପରେ ବନ୍ଦ ଥିବା ରେଭେନ୍ସା ବିଶ୍ୱବିଦ୍ୟାଳୟ ଆଜି ଖୋଲିଛି ।ସକାଳ ୯ଟା ପରେ ଛାତ୍ରଛାତ୍ରୀମାନେ କ୍ୟାମ୍ପସ୍ ପରିସରକୁ ପ୍ରବେଶ କରିଛନ୍ତି । ପ୍ରବେଶ ସମୟରେ ମୁଖ୍ୟ ଫାଟକ ନିକଟରେ ଛାତ୍ରଛାତୀ ନିଜ ପରିଚୟପତ୍ର ଦେଖାଇଥିଲେ। ସେହିପରି ହଷ୍ଟେଲରେ ରହୁଥିବା ପିଲାମାନେ ସୁପରିଟେଣ୍ଡେଣ୍ଟଙ୍କୁ ପରିଚୟପତ୍ର ଦେଖାଇ ଭିତରକୁ ଯାଇଥିଲେ । ସୁରକ୍ଷା ଦୃଷ୍ଟିରୁ ପୂର୍ବଭଳି କ୍ୟାମ୍ପସରେ ଫୋର୍ସ ମୁତୟନ ରହିବେ। ଅଣଛାତ୍ରଙ୍କ ପ୍ରବେଶ ଉପରେ ମଧ୍ୟ କଡ଼ା ନଜର ରଖାଯାଇଛି।
ଛାତ୍ର ସଂସଦ ନିର୍ବାଚନ ଫଳାଫଳକୁ ନେଇ ଗଣ୍ଡଗୋଳ ପରେ ବିଶ୍ୱବିଦ୍ୟାଳୟକୁ ସାଇନ ଏ ଡାଏ ଘୋଷଣା କରାଯାଇଥିଲା। ଏଥିସହ ଛାତ୍ରଛାତ୍ରୀଙ୍କୁ ହଷ୍ଟେଲ ଖାଲି କରିବାକୁ ନିର୍ଦ୍ଦେଶ ଦିଆଯାଇଥିଲା। ବିଜୟୀ ଛାତ୍ର ଗୋଷ୍ଠୀଙ୍କ ଶୋଭାଯାତ୍ରା ସମୟରେ ଅପରଗୋଷ୍ଠୀ ଛାତ୍ରଙ୍କ ସହ ମୁହାଁମୁହିଁ ହୋଇଥିଲେ। ଫଳରେ କିଛି ସମୟ ପାଇଁ କଲେଜ ଛକ ଓ ରେଭେନ୍ସା କ୍ୟାମ୍ପସ୍ ରଣକ୍ଷେତ୍ର ପାଲଟି ଯାଇଥିଲା। ଗଣ୍ଡଗୋଳରେ ଉଭୟ ପକ୍ଷର କିଛି ଛାତ୍ର ଆହତ ମଧ୍ୟ ହୋଇଥିଲେ। ଗଣ୍ଡଗୋଳ ଯୋଗୁଁ ଶପଥଗ୍ରହଣ କାର୍ଯ୍ୟକ୍ରମକୁ ମଧ୍ୟ ସ୍ଥଗିତ ରଖାଯାଇଥିଲା। ସାଇନ ଏ ଡାଏ ଉଠିବା ପରେ ବିଜୟୀ ଛାତ୍ରଛାତ୍ରୀ ଶପଥ ନେବାର କାର୍ଯ୍ୟକ୍ରମ ରହିଛି। ତେବେ ଶପଥଗ୍ରହଣ କେବେ ହେବ ସେ ନେଇ ବୈଠକରେ ନିଷ୍ପତ୍ତି ନିଆଯିବ ବୋଲି ରେଜିଷ୍ଟ୍ରାର୍ କିଶୋର କୁମାର ଦାସ୍ ସୂଚନା ଦେଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।