କଣ୍ଟା ଚାମଚ ରେ ମାଂସ ଖାଉଛନ୍ତି ପ୍ରଭୁ ଗଣେଶ: ବିବାଦରେ ବିଜ୍ଞାପନ

Controversial-ad-shows-Lord-Ganesh-eating-meat

ନୂଆଦିଲ୍ଲୀ: ହିନ୍ଦୁ ଧର୍ମୀୟ ଭାବନା ସହ କେମିତି ଖେଳ ଖେଳାଯାଇ ପାରେ, ତା’ର ଏକ ସଦ୍ୟ ନଗ୍ନ ଚିତ୍ର ସାମ୍ନାକୁ ଆସିଛି। ଏଥର ମହାପ୍ରଭୁ ଗଣେଶ ମେଣ୍ଢା ମାଂସ ଆହାର କରୁଥିବାର ଦୃଶ୍ୟ ଚିତ୍ରଣ କରାଯାଇଛି।  ପ୍ରକୃତରେ ଏହି ଘଟଣା ଯେତେ ଅମୂଳକ ଏବଂ ଅବାସ୍ତବ ଲାଗୁଥିଲେ ମଧ୍ୟ, ପରଦାରେ ଏମିତି ଦୃଶ୍ୟକୁ ରୂପ ଦିଆଯିବା ହିନ୍ଦୁ ଧର୍ମର ଦେବଦେବୀଙ୍କ ପ୍ରତି ଏକ ତାଚ୍ଛଲ୍ୟ ପରି ହୋଇଛି।

ହିନ୍ଦୁଧର୍ମର ବିଘ୍ନ ବିନାଶକ ଦେବତା ପ୍ରଭୁ ଗଣେଶ ଓ ଆଉକିଛି ଧର୍ମର ଦେବତାଙ୍କୁ ନେଇ ଅଷ୍ଟ୍ରେଲିଆରେ ତିଆରି ହୋଇଥିବା ଏମିତି ଏକ ବିଜ୍ଞାପନ ବିବାଦ ଘେରକୁ ଆସିଛି। ଏହି ବିଜ୍ଞାପନରେ ଜଣେ ଅଭିନେତା ଗଣେଶ ବେଶ ହୋଇ ମାଂସ ଭକ୍ଷଣ କରୁଥିବା ନଜରକୁ ଆସିଛି। କେବଳ ହିନ୍ଦୁ ଧର୍ମ ନୁହେଁ, ଅନ୍ୟ ଧର୍ମକୁ ମଧ୍ୟ ଏହି ବିଜ୍ଞାପନ ମାଧ୍ୟମରେ କୁଠାରଘାତ କରାଯାଇଛି। କାରଣ ଗଣେଶଙ୍କ ବ୍ୟତୀତ ଅନ୍ୟ ଧର୍ମର ଗୁରୁମାନଙ୍କୁ ନକଲ କରି ଗୋଟିଏ ଟେବୁଲ୍‌ରେ ଏକାଠି ମାଂସ ଖାଉଥିବାର ଦୃଶ୍ୟ ସୁଟ୍‌ କରାଯାଇଛି। ସେହିପରି ମଦ୍ୟପାନ ମଧ୍ୟ କରୁଛନ୍ତି।ଏହି ଭିଡିଓରେ ପ୍ରଭୁ ଯୀଶୁ ଏବଂ ବୁଦ୍ଧଙ୍କୁ ମଧ୍ୟ ବ୍ୟଙ୍ଗ କରାଯାଇଛି।

ବେପାର ଉଦ୍ଦେଶ୍ୟରେ ମାଂସ ଏବଂ ଗୃହପାଳିତ ପଶୁକୁ ନେଇ ଅଷ୍ଟ୍ରେଲିଆରେ ଏବେ ଅଧିକ ପ୍ରାଧାନ୍ୟ ଦିଆଯାଉଥିବା ବେଳେ ଏହାକୁ ବିଜ୍ଞାପନ କରିବାକୁ ଯାଇ ଏଭଳି ହୀନ ପ୍ରୟାସ କରାଯାଇଛି। ଏଭଳି ଏକ ସମ୍ବେଦନଶୀଳ ପ୍ରସଙ୍ଗକୁ ନେଇ ଅଷ୍ଟ୍ରେଲିଆରେ ରହୁଥିବା ହିନ୍ଦୁଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ବିଜ୍ଞାପନ ପ୍ରସ୍ତୁତକାରୀ ସଂସ୍ଥା ଓ ଏହାର ନିର୍ଦ୍ଦେଶକଙ୍କୁ କଡ଼ା ସମାଲୋଚନା କରାଯାଇଛି। ବ୍ୟବସାୟ ବୃଦ୍ଧି ଲକ୍ଷ୍ୟରେ ଖୋଲାଖୋଲି ବିଭିନ୍ନ ଧର୍ମାବଲମ୍ବୀଙ୍କ ଭାବାବେଗକୁ ଏମିତି ଦଳିମକଚି ଦିଆଯିବା ଅନୁଚିତ୍ ବୋଲି ବିଭିନ୍ନ ମହଲରେ ମତପ୍ରକାଶ ପାଇଛି। ଏହି ବିଜ୍ଞାପନ ଉପରେ ରୋକ୍‌ ଲଗାଇବାକୁ ଜୋରଦାର ଦାବି ମଧ୍ୟ ଉଠିଛି। ଅଷ୍ଟ୍ରେଲିଆରେ ରହୁଥିବା ହିନ୍ଦୁ ସମ୍ପ୍ରଦାୟର ନିତିନ ନାମକ ଜଣେ ମୁଖପାତ୍ର ଏହି ଘଟଣାକୁ ତୀବ୍ର ନିନ୍ଦା କରିଛନ୍ତି। ସେ କହିଛନ୍ତି- ଏଭଳି ଢଙ୍ଗରେ ଅନ୍ୟ ଧର୍ମର ଦେବଦେବୀଙ୍କୁ ଉପହାସ କରିବାର ଅର୍ଥ, ନୈତିକତାର ଅଭାବକୁ ହିଁ ଦର୍ଶାଉଛି।

ଅଦ୍ୟାବଧି ବିଜ୍ଞାପନ ସଂସ୍ଥା ନିକଟରେ ୩୦ରୁ ଅଧିକ ଅଭିଯୋଗ ପହଞ୍ଚିଲାଣି। ତୁରନ୍ତ ଏହି ବିଜ୍ଞାପନକୁ ବ୍ୟାନ୍ କରିବା ପାଇଁ ଦାବି ହୋଇଛି।

ଅବଶ୍ୟ ହିନ୍ଦୁ ଦେବତାଙ୍କୁ ବିକୃତ କରିବା, ପାଶ୍ଚାତ୍ୟ ଜଗତରେ ପ୍ରଥମ ନୁହେଁ। ଆଗରୁ ଅନେକଥର ହିନ୍ଦୁ ଦେବଦେବୀଙ୍କୁ, ଜାଣତରେ ହେଉ କି ଅଜାଣତରେ, ବିଭିନ୍ନ ପ୍ରକାରେ କଟାକ୍ଷ କରାଯାଇଛି। କେତେବଳେ ଜୋତାରେ ଦେବତାଙ୍କ ଚିତ୍ର କରାଯାଛି ତ’ ଆଉ କେତେବେଳେ ଅନ୍ତର୍ବସ୍ତ୍ରରେ ଛବି ଛପା ଯାଇଛି। ପୁଣି କେତେବେଳେ କେଉଁ ଦେବତାଙ୍କ ବେକରେ ଜୋତାମାଳ ପକାଯାଇ ହିନ୍ଦୁ ଧର୍ମକୁ କୁଠାରଘାତ କରାଯାଇଛି।

ସୌଜନ୍ୟ : ହିନ୍ଦୁସ୍ଥାନ ଟାଇମ୍‌ସ

Previous ArticleNext Article

Send this to a friend