ସୁର ବାବାଙ୍କ ଲେଉଟାଣି ପରେ ଝିଣ୍ଟି ଆଶ୍ରମରେ ଜମିଲା ଖିଆପିଆ ଆସର, ଦେଖନ୍ତୁ ଭିଡିଓ

ଭୁବନେଶ୍ୱର(ଓଡିଶା ରିପୋର୍ଟର): ଅଢେଇ ବର୍ଷ ପରେ ଜେଲ୍‌ରୁ ମୁକୁଳିଛନ୍ତି ସୁରବାବା। ବିଶ୍ୱାସର ବେପାର ପୁଣି ଆରମ୍ଭ ହେବ। ଏମିତି ପରିସ୍ଥିତିରେ ତାଙ୍କ ତଥାକଥିତ ଭକ୍ତଙ୍କ ଭିଡ ମଧ୍ୟ ଜମିବାରେ ଲାଗିଛି ଝିଣ୍ଟି ଆଶ୍ରମରେ। ଯୌନ କେଳାଙ୍କାରୀ ଓ ଆୟ ବହିର୍ଭୁତ ସମ୍ପତ୍ତି ଠୁଳ ମାମଲାରେ ପର୍ଯ୍ୟାୟକ୍ରମେ ହାଇକୋର୍ଟ ଓ ସୁପ୍ରିମ୍‌କୋର୍ଟରୁ ବେଲ୍‌ରେ ମୁକୁଳିଛନ୍ତି ବାବା। ହାଇକୋର୍ଟ ଏବଂ ସୁପ୍ରିମକୋର୍ଟ ତାଙ୍କ ଜାମିନ ମଞ୍ଜୁର କରିଛନ୍ତି ସତ ହେଲେ ଏ ଯାଏଁ କ୍ଲିନଚିଟ୍ ଦେଇନାହାଁନ୍ତି ।

ଭୁବନେଶ୍ୱର ସନ୍ନିକଟ ଆଶ୍ରମରେ ସୁରବାବା ଓରଫ୍ ସୁରେନ୍ଦ୍ର ମହାପାତ୍ରଙ୍କ ରହଣୀ ପରେ ଗହଳ ଚହଳ ଫେରିଛି। ଦୂରଦୂରାନ୍ତରୁ ସୁରପ୍ରେମୀ ଶ୍ରଦ୍ଧାଳୁଙ୍କ ସୁଅ ଛୁଟିବାରେ ଲାଗିଛି ଆଶ୍ରମକୁ। ହରିବୋଲ ହୁଳୁହୁଳୀ ଧ୍ୱନୀରେ ବାବାଙ୍କୁ  ସ୍ୱାଗତ କରାଯାଇଥିବା ବେଳେ ଖିଆପିଆର ଆସର ଜମୁଛି। ହେଲେ ସୁର ଆଉ ଗଣମାଧ୍ୟମ ମୁହାଁ ହେବେନି ବୋଲି ରୋକଠୋକ୍‌ କହି ଦେଇଛନ୍ତି।

ଏବେ ବାବାଙ୍କ ଘର ଲେଉଟାଣି ପରେ ତିନି ଥାକିଆ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ଆଶ୍ରମରେ। ଜଗି ରହିଛନ୍ତି ବାବାଙ୍କ ତଥାକଥିତ ସମର୍ଥକ । ଏପରିକି ମୁଖ୍ୟ ଆଶ୍ରମ ଭିତରେ ପ୍ରବେଶ ଲାଗି ଗଣମାଧ୍ୟମ ପାଇଁ ବି ରହିଛି କଟକଣା ।

ସୂଚନାଯାଗ୍ୟ, ଜମି ଦୁର୍ନୀତି, ନିର୍ଯାତନା, ଠକେଇ, ମହିଳା ଭକ୍ତଙ୍କୁ ଯୌନ ନିର୍ଯାତନା ଆଦି ୭ଟି ମାମଲାରେ ଅଭିଯୁକ୍ତ ହୋଇ ସୁରଙ୍କୁ ୨୦୧୫ରେ ବାନ୍ଧି ନେଇଥିଲା ପୋଲିସ। ଅଗଷ୍ଟ ୩୧, ୨୦୧୫ରେ ସ୍ଥାନୀୟ ଲୋକେ ବାବାଙ୍କ ନାଁରେ ଅଭିଯୋଗ ଆଣିବା ପରେ ଆରମ୍ଭ ହୋଇଥିଲା ତୁମୁଳ କାଣ୍ଡ। ଆଶ୍ରମ ପରିସରରେ ଭଙ୍ଗାରୁଜା ଓ ଜଳାପୋଡ଼ା ପରେ ପରିସ୍ଥିତିକୁ ନିୟନ୍ତ୍ରଣ କରିବାକୁ ଯାଇ ପୋଲିସ ସୁରେନ୍ଦ୍ର ମିଶ୍ର ଏବଂ ତାଙ୍କ ୨ ପୁଅଙ୍କୁ ସେହି ରାତିରେ ଗିରଫ କରିଥିଲା । ମାମଲା  କ୍ରାଇମବ୍ରାଞ୍ଚ ହାତକୁ ଯିବାପରେ ଅନେକ କେଳାଙ୍କାରୀ ପଦାକୁ ଆସିଥିଲା।

Previous ArticleNext Article

Send this to a friend