ଜାଣନ୍ତି କି: ଆମେ ଗୀତ ଶୁଣିବା ବେଳେ ଗୋଡ଼ ହଲାଉ କାହିଁକି? 

dance

ଆପଣ ଅଧିକାଂଶ ସମୟରେ ଲକ୍ଷ୍ୟ କରିଥିବେ ଯେ କୌଣସି ପସନ୍ଦର ଗୀତ ଶୁଣୁଶୁଣୁ ଆମେ ଅଜାଣତରେ ଗୋଡ଼, ପାଦ, ମୁଣ୍ଡ, ହାତ କିମ୍ବା ହାତର ଆଙ୍ଗୁଠିକୁ ହଲାଇବାରେ ଲାଗିଥାଉ। କେବଳ ଆପଣ ନୁହେଁ, ଅଧିକାଂଶ ଅର୍ଥାତ୍ ପ୍ରାୟ ସମସ୍ତ ସାଧାରଣ ମଣିଷ ଗୀତ ଶୁଣିଲେ ସେହି ତାଳରେ ବା ଗୀତର ମ୍ୟୁଜିକ୍ ବିଟ୍ ରେ ଗୋଡ଼, ହାତ କିମ୍ବା ମୁଣ୍ଡ ହଲାଇଥାନ୍ତି । ସତ କହିବାକୁ ଗଲେ ଏଭଳି କରିବାକୁ ଆମକୁ ଭଲ ଲାଗେ ଏବଂ ବେଳେବେଳେ ଆମେ ଅଜାଣତରେ ଏଭଳି କରିବାରେ ଲାଗିଥାଉ । କିନ୍ତୁ ଏଭଳି କାହିଁକି ହୁଏ? ଏହାର କାରଣ କଣ?

ଗବେଷଣାରୁ ଜଣାପଡ଼ିଛି ଏହା ଆମ ଶରୀରର ଏକ ପ୍ରକ୍ରିୟା  ଯୋଗୁଁ ହୋଇଥାଏ, ଯାହାକୁ ମୋଟୋର୍ ଥିଓରି ଅଫ୍ ପର୍ସେପସନ୍ କୁହାଯାଏ । ଶବ୍ଦକୁ ଗ୍ରହଣ କରିବା ପରେ ଏହା ମସ୍ତିଷ୍କର ଏକ ପ୍ରତିକ୍ରିୟାକୁ ବୁଝାଏ । ଶବ୍ଦ ଓ ଶରୀର ଚାଳନା ମଧ୍ୟରେ ଥିବା ଏହି ସମ୍ପର୍କ ଅନୁସାରେ, ଲୋକମାନେ ଯେତେବେଳେ କିଛି ଶୁଣନ୍ତି, ସେତେବେଳେ ତାହାକୁ ଭଲଭାବେ ବୁଝିବା ପାଇଁ ସେହି ଶବ୍ଦ ତିଆରି ପ୍ରକ୍ରିୟାରେ ନିଜକୁ ସାମିଲ କରାଇବା ଭଳି ଶରୀର ଚାଳନା କରନ୍ତି । ଅର୍ଥାତ୍ ଆମେ ଯେତେବେଳେ ଗୀତ ଶୁଣୁ, ଆମେ ସେହିଭଳି ଭାବେ ଗୋଡ଼ କିମ୍ବା ହାତ ହଲାଇବା ପସନ୍ଦ କରୁ, ସତେଯେପରି ଆମେ ସେହି ସଂଗୀତ ସୃଷ୍ଟିର ଏକ ଅଂଶ ବା ଆମେ ସେହି ମ୍ୟୁଜିକ ବଜାଇବାରେ ସାମିଲ ଅଛୁ ।

ଆଉ ଏକ ଗବେଷଣା କହେ, ସଂଗୀତର ତାଳ ବା ରିଦମ୍ ଭଳି ଆମ ଶରୀରର ମଧ୍ୟ ଏକ ଆଭ୍ୟନ୍ତରୀଣ ରିଦମ୍ ରହିଛି । ଆମେ ଯେତେବେଳେ କୌଣସି ଗୀତ ଶୁଣୁ, ଏହାର ଧ୍ୱନି ତରଙ୍ଗ ଆମ କାନ ପରଦା ନିକଟରେ ପହଞ୍ଚେ ଏବଂ କାନ ଏହି ଧ୍ୱନି ତରଙ୍ଗକୁ ଏକ ବୈଦ୍ୟୁତିକ ସିଗନାଲରେ ପରିବର୍ତ୍ତିତ କରି ମସ୍ତିଷ୍କକୁ ପଠାଏ । କିନ୍ତୁ ମସ୍ତିଷ୍କ ଜାଣିପାରେ ନାହିଁ  ଯେ, ସଂଗୀତର ତାଳ ଅନୁସାରେ ନିରନ୍ତର ତା ପାଖକୁ ଆସୁଥିବା ଏହି ସିଗନାଲକୁ ସେ କେଉଁ କାର୍ଯ୍ୟ ପାଇଁ ବ୍ୟବହାର କରିବ । ତେଣୁ ସେ ଦ୍ୱନ୍ଦ୍ୱରେ ପଡ଼ି ଏହାକୁ ସେଣ୍ଟ୍ରାଲ୍ ନର୍ଭସ୍ ସିଷ୍ଟମକୁ ପଠାଇଦିଏ । ଏହି ବୈଦ୍ୟୁତିକ ସିଗନାଲ୍ ସେଣ୍ଟ୍ରାଲ ନର୍ଭସ୍ ସିଷ୍ଟମକୁ ଯିବା ପରେ ଏହା ସ୍ନାୟୁ ଜରିଆରେ ଗୋଡ଼ କିମ୍ବା ହାତ ଆଦିରେ ଥିବା ମାଂସପେଶୀକୁ ପ୍ରବାହିତ ହୁଏ ଏବଂ ଆମ ଶରୀର ରିଦମ୍ ସେହି ସଂଗୀତର ରିଦମ୍ ଅନୁସାରେ କାର୍ଯ୍ୟ କରିବାକୁ ଲାଗେ । ତେଣୁ ଆମେ ଗୀତର ତାଳ ଅନୁସାରେ ଗୋଡ଼ କିମ୍ବା ହାତ ହଲାଇବାରେ ଲାଗୁ।

Previous ArticleNext Article

Leave a Reply

Your email address will not be published. Required fields are marked *