ଅମିତଙ୍କ ଚ୍ୟାଲେଞ୍ଜ: ନବୀନ ଗଣିବା ଶିଖନ୍ତୁ, କାଉଣ୍ଟିଂ ଦିନ ସକାଳେ ରେଜଲ୍ଟ ପାଇବେ

Amit-Shah

ଭୁବନେଶ୍ୱର: ଓଡ଼ିଶା ଗସ୍ତରେ ଥିବା ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ଆଜି ବ୍ରହ୍ମବାଣ ମାରିବା ସହିତ କିଛି ପ୍ରସଙ୍ଗରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚ୍ୟାଲେଞ୍ଜ ଦେଇଛନ୍ତି। ବିଶେଷ କରି ଆସନ୍ତା ଓଡ଼ିଶା ବିଧାନସଭା ନିର୍ବାଚନରେ କେଉଁ ଦଳ କେତେ ଆସନ ପାଇବ ସେ ପ୍ରସଙ୍ଗ ଉଠାଇ ସେ ନବୀନଙ୍କୁ ଗଣିବା ଶିଖି ନେବାକୁ ପରାମର୍ଶ ଦେଇଛନ୍ତି। ଭୁବନେଶ୍ୱରରେ ବୁଦ୍ଧିଜୀବୀଙ୍କୁ ସମ୍ବୋଧିତ କରିବା ଅବସରରେ ସେ ନବୀନଙ୍କୁ ଦେଇଛନ୍ତି ଏହି ପରାମର୍ଶ।

ଅମିତ କହିଥିଲେ,“ବିଜେପିର ଆକଳନ ଅନୁଯାୟୀ ଦଳ ଓଡ଼ିଶାରେ ଆଗାମୀ ବିଧାନସଭା ନିର୍ବାଚନରେ ୧୨୦ଟି ଆସନ ଜିତିବ। କିନ୍ତୁ ଏ କଥା ଶୁଣି ଆଜି ସକାଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କୁଆଡ଼େ କହିଛନ୍ତି ଯେ ଏହା ଅସମ୍ଭବ। ନବୀନ ବାବୁଙ୍କୁ ମୋର ପରାମର୍ଶ ସେ ଗଣିବା ଶିଖି ନିଅନ୍ତୁ। କାଉଣ୍ଟିଂ ଦିନ (ଅର୍ଥାତ ବିଧାନସଭା ନିର୍ବାଚନ ପରେ) ସକାଳ ସାଢ଼େ ଦଶଟା ବେଳକୁ ବିଜେପି ୧୨୦ଟି ଆସନ ଜିତି ସାରିଥିବ। ସେ ବସି ଗଣିବେ ବିଜେପି ୧୨୦ଟି ଆସନ ପାଇବ।”

ନବୀନ ପୋଡ଼ା ଟ୍ରାନ୍ସଫର୍ମର

ଏହା ସହିତ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ନବୀନଙ୍କୁ ଜଳିଯାଇଥିବା ଟ୍ରାନ୍ସଫର୍ମର ବୋଲି କହିଛନ୍ତି। ଜଳିଯାଇଥିବା ଟ୍ରାନ୍ସଫର୍ମରକୁ ଉପାଡ଼ି ଫିଙ୍ଗି ଦେବାକୁ ସେ ରାଜ୍ୟବାସୀଙ୍କୁ ଆହ୍ୱାନ ଦେଇଛନ୍ତି। ବିଜେଡି ସରକାର ଥିବା ପର୍ଯ୍ୟନ୍ତ ରାଜ୍ୟର ବିକାଶ ହୋଇପାରିବ ନାହିଁ ବୋଲି ସେ କହିଛନ୍ତି।

ଓଡ଼ିଶା ଓ ଗୁଜରାଟ ମଧ୍ୟରେ ତୁଳନା

ଅମିତ ଶାହା ଓଡ଼ିଶା ଓ ଗୁଜରାଟ ମଧ୍ୟରେ ତୁଳନା କରିଥିଲେ। ସେ କହିଥିଲେ,“ଗୁଜରାଟ ଅପେକ୍ଷା ଓଡ଼ିଶାରେ ବିକାଶର ସମ୍ଭାବନା ୧୦୦ ଗୁଣା ଅଧିକ। ଖଣିଜ ସମ୍ପଦରେ ଓଡ଼ିଶା ଭରପୂର ରହିଛି। କିନ୍ତୁ ଏ ସରକାର କ’ଣ କରିଛନ୍ତି? ରାସ୍ତାଘାଟ ଠାରୁ ଆରମ୍ଭ ହୋଇ କୃଷି ପର୍ଯ୍ୟନ୍ତ ଓଡ଼ିଶାରେ କ’ଣ ବିକାଶ ହୋଇଛି? ବନ୍ଦର ପ୍ରତିଷ୍ଠା ନେଇ ରାଜ୍ୟରେ କ’ଣ ସବୁ ସୁଯୋଗ ରହିଛି ସରକାର ସେନେଇ କେବେ ଭାବିଛନ୍ତି? ନା, ଏ ସରକାର କିଛି କାର୍ଯ୍ୟ କରୁ ନାହାନ୍ତି, କେବଳ ଆରାମରେ ବସି ରହୁଛନ୍ତି। ଏ ସରକାର ଥିବା ପର୍ଯ୍ୟନ୍ତ ରାଜ୍ୟର ବିକାଶ ହୋଇପାରିବ ନାହିଁ।” ଏଠି ଖାଲି କରପ୍‌ସନ୍, କରପସନ୍‌ ଓ କରପ୍‌ସନ୍ ହେଉଛି।

ନବୀନ ଓଡ଼ିଆ ଶିଖି ପାରିଲେ ନାହିଁ

ନବୀନ ବାବୁ ଏଠାରେ ୧୭ ବର୍ଷ ହେଲାଣି ଶାସନ କଲେଣି। କିନ୍ତୁ ସେ ନିଜେ ଓଡ଼ିଆ ଭାଷା ଶିଖି ପାରିଲେ ନାହିଁ। ଏଥିରେ ରାଜ୍ୟର କେମିତି ବିକାଶ ହେବ?

ରାଜ୍ୟ ଯୁବ ନେତୃତ୍ୱ ଆବଶ୍ୟକ କରୁଛି

ଭାଷଣ ମଝିରେ ଅମିତ ନବୀନଙ୍କ ବୟସ କଥା ମଧ୍ୟ ଉଠାଇଥିଲେ। ଏ ପ୍ରସଙ୍ଗରେ ସେ ଟିକେ ହସି କହିଥିଲେ,“ମୁଁ ଭାବୁଛି ରାଜ୍ୟ ଏବେ ଜଣେ ଯୁବ ନେତୃତ୍ୱଙ୍କୁ ଦରକାର କରୁଛି।”

ନବୀନଙ୍କୁ ହିସାବ ମାଗିଲେ

ରାଜ୍ୟ ସରକାର ବିଭିନ୍ନ ସମୟରେ କେନ୍ଦ୍ରୀୟ ଅବହେଳା କଥା ଉଠାଉଛନ୍ତି। ଅମିତ ଆଜି ଏ ବିଷୟରେ ବି କହିଥିଲେ। ସେ କହିଥିଲେ,“ଚତୁର୍ଦ୍ଦଶ ଅର୍ଥ କମିଶନ ଓଡ଼ିଶାକୁ ୨ ଲକ୍ଷ ୧୧ ହଜାର ୫୧୦ କୋଟି ଦେଇଛି। ଏହା ତ୍ରୟୋଦଶ ଅର୍ଥ କମିଶନ ଦେଇଥିବା ଅର୍ଥର ଅଢ଼େଇ ଗୁଣ। ସେ ଟଙ୍କା କ’ଣ ହେଲା ନବୀନ ବାବୁ ହିସାବ ଦିଅନ୍ତୁ।” ଆସନ୍ତାକାଲି ସାମ୍ବାଦିକ ସମ୍ମିଳନୀରେ ସେ ନବୀନଙ୍କୁ ଏନେଇ ପୂରା ହିସାବ ମାଗିବେ ବୋଲି କହିଥିଲେ।

ବିଜେପିରେ ଅଛି ଗଣତନ୍ତ୍ର

ରାଜନୀତିରେ ପରିବାରବାଦକୁ ନେଇ ବି ସେ ସମାଲୋଚନା କରିଥିଲେ। ସେ କହିଥିଲେ ଯଦି କୌଣସି ବ୍ୟକ୍ତି ଗାନ୍ଧୀ ପରିବାରର ହୋଇ ନଥିବ ସେ କଂଗ୍ରେସ ଦଳର ଅଧ୍ୟକ୍ଷ ହୋଇପାରିବ ନାହିଁ। ବିଜେଡିରେ କ’ଣ କେହି ଯୋଗ୍ୟ ବ୍ୟକ୍ତି ନାହାନ୍ତି ଦଳର ଅଧ୍ୟକ୍ଷ ହେବାକୁ? କିନ୍ତୁ ଦଳର ଅଧ୍ୟକ୍ଷ ହେବାକୁ ହେଲେ ବିଜୁ ପରିବାରର ହୋଇଥିବା ଦରକାର। କିନ୍ତୁ ବିଜେପିରେ ଜଣେ ଚା’ ଦୋକାନୀ ବି ପ୍ରଧାନମନ୍ତ୍ରୀ ହୋଇପାରେ। ବିଜେପି ଯେଉଁଠି ଶାସନ କରିଛି ସେଇଠି ବିକାଶ ହୋଇଛି ବୋଲି ସେ କହିଥିଲେ।

Previous ArticleNext Article

Send this to a friend