ରାଜ୍ୟସଭା ଯିବେ କି ପ୍ରଦୀପ ମହାରଥୀ ? କହିଲେ, ସେଠି ତ ବହୁତ ବଢ଼ିଆ !

pradeep maharathy

ଭୁବନେଶ୍ୱର (ଓଡ଼ିଶା ରିପୋର୍ଟର): ବିକାଶ କଥା ହେଉ କି ଅବହେଳା, ରାଜ୍ୟର ବିଜେଡି ସରକାର ସବୁ ବେଳେ ଚର୍ଚ୍ଚାରେ। ବିରୋଧୀ ମଧ୍ୟ ଟିକିଏ ସୁଯୋଗ ଛାଡୁ ନାହାଁନ୍ତି ସରକାରକୁ ଅଡୁଆରେ ପକାଇବାକୁ। ଏହାସତ୍ତ୍ୱେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଇମେଜ୍‌ରେ ଟିକେ ବି ଦାଗ ଲାଗିନାହିଁ। ତେବେ ବିଜେଡିରେ ନବୀନଙ୍କ ପରି ଆହୁରି ଦୁଇଜଣ ଅଛନ୍ତି, ଯିଏ ରାଜ୍ୟ ରାଜନୀତିରେ ଭାରି ପପୁଲାର। ଜଣେ ହେଲେ ବିଜେଡି ତୁଣ୍ଡ ଦାମୋଦର ରାଉତ ଏବଂ ଅନ୍ୟ ଜଣେ ହେଲେ ବିଜେଡି ବମ୍‌ ପ୍ରଦୀପ ମହାରଥୀ। ଏହି ଦୁଇ ନେତା ଯେତେବେଳେ ବି ମୁହଁ ଖୋଲିଥାନ୍ତି, ରାଜ୍ୟ ରାଜନୀତିରେ ହୋଇଥାଏ କମ୍ପନ। ଯେ କୌଣସି ଇସ୍ୟୁ ହେଉ ଥଟ୍ଟାମଜାରେ ଦେଇଥାନ୍ତି ନିଜ ବୟାନ। ଆଜି ଏପରି ଏକ ବୟାନ ଦେଇଛନ୍ତି, ରାଜ୍ୟ କୃଷୀମନ୍ତ୍ରୀ ପ୍ରଦୀପ ମହାରଥୀ। ଯାହା ତାଙ୍କ ମନର କଥାକୁ ପଦାରେ ପକାଇ ଦେଇଛି। ଏବେ ଏତିକି ଦେଖିବାକୁ ବାକି ରହିଲା, ବାବୁ ନବୀନ ବିଜେଡିର ଏହି ମହାରଥୀଙ୍କ ଆଶା ପୂରଣ କରୁଛନ୍ତି କି ନାହିଁ ?

କଥାଟା ଏମିତି। ପ୍ରଦୀପ ବାବୁ ଆଜି ସଚିବାଳୟ ଭିତରକୁ ପ୍ରବେଶ କରୁଥିଲେ। ଏହା ଦେଖି ଗଣମାଧ୍ୟମ ପ୍ରତିନିଧିମାନେ ତାଙ୍କୁ ଘେରି ଯାଇଥିଲେ। ଏହାପରେ ଆରମ୍ଭ କରିଦେଇଥିଲେ ଏଣୁତେଣୁ ପ୍ରଶ୍ନ। ଥଟ୍ଟାମଜା ସ୍ୱଭାବର ବାବୁ ମହାରଥୀ ବି ଟପ୍‌ଟାପ୍‌ ଦେଇ ଚାଲିଥିଲେ ଉତ୍ତର। ଏହି ସମୟରେ ସେ ତାଙ୍କ ମନର କଥାଟା କହିଦେଇଥିଲେ। ସେ କହିଥିଲେ, “କ୍ୟାବିନେଟ୍‌ ମନ୍ତ୍ରୀ ପଦ ଅପେକ୍ଷା ରାଜ୍ୟସଭା ଆହୁରି ବଢ଼ିଆ। ମୋତେ ପଠାଇଲେ, ମୁଁ ଚାଲି ଯାଆନ୍ତି।”

ଏଥିରୁ ଜଣାପଡୁଛୁ, ମହାରଥୀ ବାବୁଙ୍କର ବିଧାୟକ କି ମନ୍ତ୍ରୀ ହୋଇ ରହିବାକୁ ଆଉ ଇଚ୍ଛା ନାହିଁ। ସେ ଏବେ ଦିଲ୍ଲୀ ଯିବାକୁ ମନ ବଳାଇଛନ୍ତି।

ମନ୍ତ୍ରୀଙ୍କ ରାଜ୍ୟସଭା ଯିବା କଥା ଶୁଣି ଗଣମାଧ୍ୟମ ପ୍ରତିନିଧିମାନେ ପୁଣି ଆରମ୍ଭ କରିଦେଇଥିଲେ ପ୍ରଶ୍ନ। ତେବେ ଏଥର ଉତ୍ତର ଦେବା ବେଳେ ବାବୁ ମହାରଥୀ ଟିବେ ସଞ୍ଜମ ଥିବା ପରି ଜଣାପଡିଥିଲେ। କାରଣ ସେ କହିଥିଲେ- “ରାଜ୍ୟସଭା ନିର୍ବାଚନ ଆସିଲେ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଷ୍ପତ୍ତି ନିଅନ୍ତି। ଏଥର କିଏ ରାଜ୍ୟ ସଭାକୁ ଯିବେ, ସେନେଇ ମୁଖ୍ୟମନ୍ତ୍ରୀ ତାଙ୍କ ପରାମର୍ଶଦାତା କମିଟି ସହିତ ଆଲୋଚନା କରି ନିଷ୍ପତ୍ତି ନେବେ। ‘Who i am’ ବା ମୁଁ କିଏ ଏ ସମ୍ପର୍କରେ କହିବାକୁ।”

ଏହାପରେ ପ୍ରାର୍ଥୀ ଚୟନକୁ ନେଇ ଆସିଥିଲା ଆଉ ଏକ ପ୍ରଶ୍ନ। ଦମ୍ଭର ସହ ଉତ୍ତର ଦେଇଥିଲେ ବାବୁ ମହାରଥୀ। କହିଥିଲେ- “କିଛି ଅଡୁଆ ହେବ ନାହିଁ। ନବୀନ ପଟ୍ଟନାୟକଙ୍କ ସରକାରରେ ଅଡୁଆର ପ୍ରଶ୍ନ ଉଠୁନି। କେଡେ କେଡ଼େ ନେତା ଦଳ ଛାଡିଲେଣି। ହେଲେ ଦଳର କିଛି ଅସୁବିଧା ହୋଇନି। ଆଗକୁ ମଧ୍ୟ କିଛି ଅସୁବିଧା ହେବନାହିଁ।”

କେମିତି ପ୍ରାର୍ଥୀଙ୍କୁ ଚୟନ କରାଯିବ ନେଇ ଏକ ପ୍ରଶ୍ନରେ ମହାରଥୀ କହିଲେ-“କେମିତିକା ପ୍ରାର୍ଥୀ ଚୟନ କରାଯିବ, ତାହା ଦଳର ସଭାପତି ନବୀନ ପଟ୍ଟନାୟକ କହିବେ। ମୁଁ ଦଳର ଜଣେ ସାଧାରଣ କର୍ମୀ। ମୁଁ ଦଳରେ ସଭାପତି ହୋଇନି କି ଉପସଭାପତି ନାହିଁ, ସମ୍ପାଦକ ହୋଇନାହିଁ କହିବି। ରାଜ୍ୟସଭା ପାଇଁ କେମିତିକା ପ୍ରାର୍ଥୀ ଚୟନ କରାଯିବ, ସେ ନେଇ କିଛି କହିପାରିବି ନାହିଁ।”

Previous ArticleNext Article

Send this to a friend