ଆମେରିକାରେ ଭୟଙ୍କର ସଡ଼କ ଦୁର୍ଘଟଣା; ୩ ଭାରତୀୟ ମହିଳା ମୃତ

ଆମେରିକାରେ ଭୟଙ୍କର ସଡ଼କ ଦୁର୍ଘଟଣା। ଏଥିରେ ତିନି ଜଣଙ୍କର ମୃତ୍ୟୁ ଘଟିଥିବା ବେଳେ ମୃତକମାନେ ଭାରତୀୟ ବୋଲି ଜଣାପଡିଛି। ମୃତ ତିନି ମହିଳାଙ୍କ ଘର ଗୁଜରାଟର ଆନନ୍ଦ ଜିଲ୍ଲାରେ। 

ସୂଚନା ଅନୁସାରେ, ସେମାନେ ଏକ SUV ଯୋଗେ ଯାତ୍ରା କରୁଥିଲେ। କାରଟି ଦ୍ରୁତଗତିରେ ଅନ୍ୟ ସମସ୍ତ ଗାଡ଼ିକୁ ଓଭରଟେକ୍ କରି ଚାଲିଥିଲା। ଫଳରେ ଭାରସାମ୍ୟ ହରାଇ ଏକ ଗଛରେ ଧକ୍କା ହୋଇଥିଲା। ଗଛକୁ ବାଡେଇ ହୋଇ କାରଟି ପ୍ରାୟ ୨୦ ଫୁଟ୍ ଉପରକୁ ଉଠି ଯାଇଥିବା ପ୍ରତ୍ୟେକ୍ଷଦର୍ଶୀ କହିଛନ୍ତି।

ଏହି ଦୁର୍ଘଟଣା ଏତେ ଭୟଙ୍କର ଥିଲା ଯେ, ଉପସ୍ଥିତ ଲୋକେ ଭୟଭୀତ ହୋଇ ଯାଇଥିଲେ। ଘଟଣାସ୍ଥଳରେ ତିନି ଜଣ ମହିଳାଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଆହତ ହୋଇଛନ୍ତି। ଆହତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।   

ଜଣେ ଅଧିକାରୀ କହିଛନ୍ତି ଯେ, କାରର ବେଗ ଆବଶ୍ୟକତାଠାରୁ ଖୁବ୍ ଅଧିକ ଥିଲା। ଦୁର୍ଘଟଣା ପରେ କାରଟି ଖଣ୍ଡ ଖଣ୍ଡ ହୋଇଯାଇଛି। ମୃତଦେହ ଉଦ୍ଧାର କରାଯାଇ ପୋଷ୍ଟମୋର୍ଟମ ପାଇଁ ପଠାଯାଇଛି।