ସାମ୍ନାକୁ ଆସିଛି ଅତ୍ୟନ୍ତ ଦୁଃଖଦ ଘଟଣା। ଗୋଟିଏ ବିରାଟ ପୋଖରୀରେ ବୁଡ଼ି ଯାଇଛନ୍ତି ୩ ଭଉଣୀ। ସେମାନଙ୍କ ବାପା କୂଳରେ ଛିଡ଼ା ହୋଇ ସବୁ କିଛି ଦେଖୁଥିଲେ ହେଁ ୩ ଝିଅଙ୍କୁ ବଞ୍ଚାଇବାକୁ ସକ୍ଷମ ହୋଇ ନାହାନ୍ତି।
ଅସହାୟ ବାପାଙ୍କ ଆଗରେ ୩ ଝିଅ ପୋଖରୀରେ ବୁଡ଼ି ପ୍ରାଣ ହରାଇଛନ୍ତି। କେରଳର କୋଟ୍ଟୋପାଡାମ ଅନ୍ତର୍ଗତ ଭୀମାନ୍ଦରେ ପୂରା ଘଟଣା ଘଟିଛି। ମୃତକମାନେ ହେଲେ ରେମିଶା (୨୩), ନଶିଦା(୨୬) ଓ ରିଂଶି(୧୮)। ରେମିଶା ଓ ନଶିଦାଙ୍କ ବିବାହ ଶେଷ ହୋଇଥିଲା। ସେମାନେ ଓନାମ ପର୍ବ ପାଇଁ ବାପା ମା’ଙ୍କ ପାଖକୁ ଆସିଥିଲେ।
Also Read
ବୁଧବାର ୩ ଭଉଣୀ ସେମାନଙ୍କ ବାପାଙ୍କ ସହ କୋଟ୍ଟୋପାଡାମ ପୋଖରୀକୁ କପଡ଼ା ସଫା କରିବା ଓ ଗାଧୋଇବା ପାଇଁ ଯାଇଥିଲେ। ଏହି ସମୟରେ ସବୁ କିଛି ଓଲଟ ପାଲଟ ହୋଇ ଯାଇଥିଲା। ୩ ଯୁବତୀଙ୍କ ସେମାନଙ୍କ ଭାଇ କିଡ୍ନୀ ରୋଗରେ ଆକ୍ରାନ୍ତ ହୋଇ ଘରେ ରହିଛନ୍ତି। ମା’ ତାଙ୍କ ପୁଅକୁ ଗୋଟିଏ କିଡ୍ନୀ ଦେଇଛନ୍ତି। ଉଭୟଙ୍କ ଚିକିତ୍ସା ଚାଲିଥିବାରୁ ଘର କଥା ବାପା ହିଁ ବୁଝୁଥିଲେ।
ବୁଧବାର ପୋଖରୀରେ ସଫାସଫି ଚାଲିଥିବା ବେଳେ ହଠାତ୍ ୩ ଜଣଙ୍କ ମଧ୍ୟରୁ ଜଣଙ୍କ ଗୋଡ଼ ଖସି ଯାଇଥିଲା। ତାଙ୍କୁ ଉଦ୍ଧାର କରିବା ପାଇଁ ଆଉ ଦୁଇ ଭଉଣୀ ଚେଷ୍ଟା କରିଥିଲେ। ଏହି ସମୟରେ ୩ ଜଣ ଯାକ ପାଣିରେ ବୁଡ଼ି ଯାଇଥିଲେ। ଆଖି ସାମ୍ନାରେ ୩ ଝିଅ ବୁଡ଼ି ଯାଉଥିଲେ ମଧ୍ୟ ବାପା କିଛି ବୁଝି ପାରୁ ନଥିଲେ। ସେ ଏତେ ମାତ୍ରାରେ ସ୍ତବ୍ଧ ହୋଇ ଯାଇଥିଲେ ଯେ ତାଙ୍କ ମୁହଁରୁ ଶବ୍ଦ ମଧ୍ୟ ବାହାରି ନଥିଲା ବୋଲି ଜଣେ ପ୍ରତ୍ୟେକ୍ଷଦର୍ଶୀ କହିଛନ୍ତି।
୩ ଭଉଣୀ ବୁଡ଼ି ଯାଉଥିବା ବେଳେ ଚିତ୍କାର କରୁଥିଲେ। ଏହା ସେଠାରୁ କିଛି ଦୂରରେ କାମ କରୁଥିବା ଲୋକଙ୍କ କାନରେ ପଡ଼ିଥିଲା। ସେମାନେ ଦେଖିବାକୁ ପାଇଥିଲେ ଯେ ବାପା ଜଣଙ୍କ ତାଙ୍କର ୩ ଝିଅଙ୍କୁ ରକ୍ଷା କରିବାକୁ ଚେଷ୍ଟା କରୁଥିଲେ ହେଁ ତାଙ୍କ ମୁହଁରୁ କୌଣସି ପ୍ରକାରର ଶବ୍ଦ ହିଁ ବାହାରୁ ନଥିଲା।
ସେ କେବଳ ଥରିବାରେ ଲାଗିଥିଲା। ତୁରନ୍ତ ଏପରି ଦୃଶ୍ୟ ଦେଖି ସ୍ଥାନୀୟ ଲୋକ ଓ ଶ୍ରମିକମାନେ ଉଦ୍ଧାର କାର୍ଯ୍ୟ କରି ବୁଡ଼ି ଯାଇଥିବା ୩ ଯୁବତୀଙ୍କୁ ଠାବ କରିଥିଲେ। ସେମାନଙ୍କୁ ତୁରନ୍ତ ହସ୍ପିଟାଲ ନିଆଯାଇଥିଲା। କିନ୍ତୁ ସେଠାରେ ଡାକ୍ତର ୩ ଜଣଙ୍କୁ ମୃତ ଘୋଷଣା କରିଥିଲେ। ଏହି ଖବର ପୂରା ଅଞ୍ଚଳରେ ଶୋକର ଚ୍ଛାୟା ଖେଳା ଦେଇଛି।
ଘଟଣା ଘଟିଥିବା ପୋଖରୀଟି ଦେଢ଼ ଏକର ଅଞ୍ଚଳର। ଏହା ଗାଁ ଠାରୁ ନିଛାଟିଆ ସ୍ଥାନରେ ଥିବାରୁ ଉଦ୍ଧାର କାର୍ଯ୍ୟ ମଧ୍ୟ ବିଳମ୍ବ ହୋଇଥିଲା। ତେଣୁ ୩ ଯୁବତୀଙ୍କ ଜୀବନ ପାଣି ବୁଡ଼ି ଚାଲି ଯାଇଛି ବୋଲି ଗାଁ ଲୋକ କହିଛନ୍ତି।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
