OR 
ଜନ୍ମ ପରେ ମରିଗଲା ଛୁଆ। ରାତି ସାରା ଜଗି ରହିଲା ମାଆ। ଛୁଆର ମୃତଦେହ ପାଖରେ ଘୂରି ବୁଲିଲା। ଚିତ୍କାର କରୁଥିଲା। ଆଜି ସକାଳେ ବନ ବିଭାଗ କର୍ମଚାରୀମାନେ ଘଉଡାଇବା ପରେ ଛୁଆକୁ ଛାଡ଼ି ମାଆ ଓ ଅନ୍ୟ ହାତୀମାନେ ଜଙ୍ଗଲକୁ ଯାଇଥିଲେ। ଏପରି ଘଟଣା କେନ୍ଦୁଝର ଜିଲ୍ଲାରେ ଦେଖିବାକୁ ମିଳିଛି।
ରବିବାର ରାତିରେ ଗୋଟିଏ ହାତୀ ପଲ ଯୋଡା ବିଟ୍ ଡଡୁଆଁ ଗାଁ ନିକଟରେ ଘୂରି ବୁଲୁଥିଲା। ସେହି ପଲରେ ଥିବା ଗୋଟିଏ ମାଈ ହାତୀ ଅଣ୍ଡିରା ଛୁଆ ଜନ୍ମ ଦେଇଥିଲା। ଜନ୍ମ ନେବାର କିଛି ସମୟ ପରେ ହାତୀ ଛୁଆର ମୃତ୍ୟୁ ଘଟିଥିଲା। ଛୁଆ ମୃତ୍ୟୁ ପରେ ମାଆ ହାତୀ ଓ ତାଙ୍କ ସାଥୀମାନେ ସେହି ସ୍ଥାନ ଛାଡ଼ି ଯାଇନଥିଲେ। ରାତି ସାରା ଜଗି ରହିଥିଲେ। ମଝିରେ ମଝିରେ କାନ୍ଦୁଥିଲା ମାଆ ହାତୀ! ଆଉ ଚିତ୍କାର କରୁଥିଲା।
Also Read
ହାତୀ ଛୁଆର ମୃତ୍ୟୁ ସମ୍ପର୍କରେ ଜାଣିପାରି ସ୍ଥାନୀୟ ଲୋକେ ଆଜି ସକାଳେ ବନ ବିଭାଗକୁ ଖବର ଦେଇଥିଲେ। ଖବର ପାଇ ଏସିଏଫ୍ ଅଶୋକ କୁମାର ଦାସ, ଚମ୍ପୁଆ ରେଞ୍ଜର ଅକ୍ଷୟ ଛତ୍ରିଆ ଓ ଅନ୍ୟ ବନ ଅଧିକାରୀମାନେ ଘଟଣା ସ୍ଥଳରେ ପହଞ୍ଚିଲା ବେଳକୁ ମାଆ ହାତୀ ଥିବା ଦେଖିବାକୁ ପାଇଥିଲେ। ପରେ କୌଶଳ କରି ମାଆ ହାତୀ ଓ ତାଙ୍କ ସାଥୀଙ୍କୁ ଘଉଡାଇ ଥିଲେ। ହାତୀ ପଲ ନିକଟସ୍ଥ ଡଡୁଆଁ ଜଙ୍ଗଲକୁ ଗଲା ପରେ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇ ଦେଇଛନ୍ତି। କିନ୍ତୁ କେଉଁ କାରଣରୁ ହାତୀ ଛୁଆର ମୃତ୍ୟୁ ହେଲା, ତାହା ଜଣାପଡ଼ି ନାହିଁ। ବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁର କାରଣ ଜଣାପଡ଼ିବ ବୋଲି ବନ ବିଭାଗ କହିଛି।
ରିପୋର୍ଟ- କେନ୍ଦୁଝରରୁ ପ୍ରଣୟ କୁମାର ପାଣି
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
