ମାଛ ମାରିବାକୁ ମଝି ସମୁଦ୍ରକୁ ଯାଇଥିଲେ ମତ୍ସ୍ୟଜୀବୀ। ମାତ୍ର ସମୁଦ୍ରର ଉଚ୍ଚ ଜୁଆରକୁ ସାମନା କରି ନ ପାରିବା ସହ ଅନ୍ୟ ଏକ ଡଙ୍ଗା ଧକ୍କାରେ ଅକାତ ପାଣିରେ ବୁଡ଼ିଲା ଡଙ୍ଗା। ହେଲେ ସୌଭାଗ୍ୟବଶଃତ ବର୍ତ୍ତିଗଲେ ୬ ମତ୍ସ୍ୟଜୀବୀ। ସେମାନଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ଗୁରୁତର ରହିଛି। ଏପରି ଏକ ଘଟଣା ଆଜି ବାଲେଶ୍ୱର ଜିଲ୍ଲଶ ଜଳେଶ୍ୱର ଥାନା ଅଧୀନ ତାଳସାରୀ ମୁହାଣ ନିକଟସ୍ଥ ବଙ୍ଗପୋସାଗରେ ଘଟିଛି।
ମାଛ ମାରିବାକୁ ଆଜି ସକାଳେ ଏକ ଡଙ୍ଗାରେ ୬ ମତ୍ସ୍ୟଜୀବୀ ସମୁଦ୍ରକୁ ଯାଇଥିଲେ। ସେଠାରୁ ସେମାନେ ଇଲିସି ମାଛ ମାରି କୂଳକୁ ଫେରୁଥିଲେ। ମାତ୍ର ତାଳସାରୀ ବେଳାଭୂମି ଠାରୁ ପାଖାପାଖି ୩ କିମି ସମୁଦ୍ର ଭିତରେ ଥିବା ବେଳେ ଉଚ୍ଚ ଜୁଆର ଆସିବା ସହ ପାଖରେ ଯାଉଥିବା ଏକ ଡଙ୍ଗା ସହ ଧକ୍କା ହେବାରୁ ଡଙ୍ଗାଟି ଓଲଟି ପଡ଼ିଥିଲା। ଫଳରେ ୬ ମତ୍ସ୍ୟଜୀବୀ ସମୁଦ୍ରକୁ ଖସି ପଡ଼ିଥିଲେ। ସେମାନେ ପହଁରି ପହଁରି କୂଳରେ ଲାଗିଥିଲେ।
ସେମାନଙ୍କ ମଧ୍ୟରୁ ଦୁଇ ଜଣଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ଦୀଘା ମେଡିକାଲରେ ଭର୍ତ୍ତି କରାଯାଇଛି। ଅନ୍ୟମାନେ ସୁସ୍ଥ ଥିବା ଜଣାଯାଇଛି।