କାମୁଡ଼ି ଦେଲା ସାପ; ମା’ପୁଅ ଓ ମାଇଁ-ଭାଣିଜୀଙ୍କ ମୃତ୍ୟୁ

ବୁଧବାର ରାତିରେ ରାଜ୍ୟର ଦୁଇଟି ସ୍ଥାନରେ ସାପ କାମୁଡ଼ାରେ ୪ ଜଣଙ୍କର ମୃତ୍ୟୁ ଘଟିଛି। ସେମାନଙ୍କ ମଧ୍ୟରୁ ଦୁଇ ଜଣ ମା’ପୁଅ ହୋଇଥିବା ବେଳେ ଦୁଇ ମାଇଁ-ଭାଣିଜୀ।

କେନ୍ଦୁଝର ଜିଲ୍ଲା ଘଷିପୁରା ବ୍ଲକ୍ ରାଧିକାଦେଇପୁରରେ ଗତକାଲି ରାତିରେ ସାପ କାମୁଡ଼ାରେ ଜଣେ ମହିଳା ଓ ତାଙ୍କ ପୁଅର ମୃତ୍ୟୁ ଘଟିଛି।

ମୃତ ମହିଳାଙ୍କ ନାଁ ଜେମା ମୁଣ୍ଡା। ତାଙ୍କୁ ୩୨ ବର୍ଷ ହୋଇଥିଲା। ତାଙ୍କ ପୁଅ ନାଁ ଗଣେଶ ମୁଣ୍ଡା। ତାଙ୍କୁ ୮ ବର୍ଷ ହୋଇଥିଲା।

ଜେମାଙ୍କ ସ୍ୱାମୀ ସୁନୀଲ ମୁଣ୍ଡା କହିଛନ୍ତି, ରାତିରେ ଖାଇସାରିବା ପରେ ଆମେ ସମସ୍ତେ ଶୋଇବାକୁ ଯାଇଥିଲୁ। ରାତି ଗୋଟେ ୧୦ରେ ମା’ପୁଅ ଉଠି କହିଲେ ଯେ କୁଣ୍ଡେଇ ହେଉଛି। ସେମାନଙ୍କର କୁଣ୍ଡେଇ ହେଉଥିବା ସ୍ଥାନରେ ମୁଁ ତେଲ ଲଗାଇ ଦେଇଥିଲି। ତା’ପରେ ସେମାନଙ୍କର ପେଟ ବଥା ହେବା ସହ ବାନ୍ତି ହୋଇଥିଲା। ଏହା ଦେଖି ମୁଁ ସେମାନଙ୍କୁ ବାଇକରେ କେଶଦୁରାପାଲ ଡାକ୍ତରଖାନାକୁ ନେଇଥିଲି। ସେଠାରେ ଡାକ୍ତର ସେମାନେ ରାତିରେ କ’ଣ ଖାଇଥିଲେ ବୋଲି ପଚାରିଥିଲେ। ମୁଁ କହିଥିଲି ସେମାନେ ଅଣ୍ଡା ଖାଇଥିଲେ। ତା’ପରେ ସେ ଇଞ୍ଜେକ୍ସନ ଦେଇ କେନ୍ଦୁଝର ଡାକ୍ତରଖାନାକୁ ନେଇଯିବାକୁ କହିଥିଲେ। ସାର୍ (ଡାକ୍ତର) କହିଲେ ଆମ୍ବୁଲାନ୍ସ ନାହିଁ। ତୁମେ ନିଜେ ଆମ୍ବୁଲାନ୍ସ କରି କେନ୍ଦୁଝର ନେଇଯାଅ। ତା’ପରେ ଆମେ ଗାଡ଼ି ଭଡ଼ା କରି ଆନନ୍ଦପୁର ଡାକ୍ତରଖାନାକୁ ଯାଇଥିଲୁ। ସେତେବେଳକୁ ମୋ ପୁଅର ମୃତ୍ୟୁ ହୋଇସାରିଥିଲା। ସେଠାରେ ଡାକ୍ତର କହିଲେ ଯେ ସେମାନଙ୍କୁ ସାପ କାମୁଡ଼ିଛନ୍ତି। ଆମେ ବିଳମ୍ବ କଲୁ ବୋଲି ଡାକ୍ତର କହିଲେ।

ସେହିପରି ଗଞ୍ଜାମ ଜିଲ୍ଲା ପାତ୍ରପୁର ବ୍ଳକର ଦୁର୍ଗମ ବୁରାତାଲ ପଞ୍ଚାୟତର ବିଲୁଗାଁରେ ଗତକାଲି ରାତିରେ ସାପ କାମୁଡ଼ାରେ ଦୁଇ ଜଣଙ୍କ ମୃତ୍ୟୁ ଘଟିଛି। ସେମାନେ ହେଉଛନ୍ତି ଦମୟନ୍ତୀ ଶବର ଓ ଲିମି କାର୍ଜୀ। ସେମାନେ ସଂପର୍କରେ ମାଇଁ-ଭାଣିଜୀ। ଲିମି ତାଳବାଡ଼ ବିଦ୍ୟାଳୟରେ ପଞ୍ଚମ ଶ୍ରେଣୀରେ ପଢୁଥିଲେ।

ରାତିରେ ଶୋଇଥିବା ବେଳେ ସେମାନଙ୍କୁ ସାପ କାମୁଡ଼ି ଥିଲା। ଏହା ଜଣାପଡ଼ିବା ପରେ ସେମାନଙ୍କୁ ଡାକ୍ତରଖାନା ନେବା ପାଇଁ ବ୍ୟବସ୍ଥା କରାଯାଉଥିବା ବେଳେ ସେମାନଙ୍କର ମୃତ୍ୟୁ ଘଟିଥିଲା।

ଆଜି ସକାଳେ ଉଭୟଙ୍କ ମୃତଦେହକୁ ଭାର ଯୋଗେ ଗାଁରୁ ପାହାଡ଼ି ରାସ୍ତାରେ ତିନି କିଲୋମିଟର ଦୂର ବାତରା ସାହିକୁ ନିଆଯାଇଥିଲା। ପାହାଡ଼ ତଳେ ଥିବା ବାତରା ସାହିରେ ମୃତଦେହ ଦୁଇଟି ପହଞ୍ଚିବା ପରେ ସେଠାରୁ ଆମ୍ବୁଲାନ୍ସ ଯୋଗେ ବ୍ରହ୍ମପୁର ନିଆଯାଇଥିଲା ବ୍ୟବଚ୍ଛେଦ ପାଇଁ। ଦୁହିଁଙ୍କ ମୃତ୍ୟୁରେ ଗ୍ରାମରେ ଶୋକର ଛାୟା ଖେଳିଯାଇଛି।

ବିଲୁଗାଁ ଆନ୍ଧ୍ରପ୍ରଦେଶ ସୀମାନ୍ତ ପାହାଡ଼ ଉପରେ ରହିଥିବାବେଳେ ଏହି ଗ୍ରାମକୁ ରାସ୍ତାଟିଏ ନାହିଁ। ପାତ୍ରପୁର ଡାକ୍ତରଖାନା ଆସିବାକୁ ହେଲେ ଏହି ଗାଁର ଲୋକଙ୍କୁ ଆନ୍ଧ୍ର ପଟେ ବୁଲି ଆସିବାକୁ ପଡ଼ିଥାଏ। ସେଥିପାଇଁ ଗତକାଲି ରାତିରେ ମାଇଁ-ଭାଣିଜୀଙ୍କୁ ସାପ କାମୁଡ଼ିଥିବା ଜଣାପଡ଼ିଥିଲେ ହେଁ ତୁରନ୍ତ ଡାକ୍ତରଖାନା ନିଆଯାଇପାରି ନଥିଲା ବୋଲି ଗ୍ରାମବାସୀ କହିଛନ୍ତି।

୨୦୨୩-୨୪ରେ ସାପ କାମୁଡ଼ାରେ ରାଜ୍ୟରେ ୧୧୫୦ ଜଣଙ୍କ ମୃତ୍ୟୁ ହୋଇଥିଲା । ସେହିପରି ୨୦୨୪-୨୫ରେ ସାପ କାମୁଡ଼ାରେ ୭୦୯ ଜଣଙ୍କ ଜୀବନ ଯାଇଥିଲା ବୋଲି ସରକାରୀ ସୂତ୍ରରୁ ସୂଚନା ମିଳିଛି। ରାଜ୍ୟ ସରକାର ସର୍ପାଘାତ ଜନିତ ମୃତ୍ୟୁକୁ ବିପର୍ଯ୍ୟୟ ବୋଲି ମଧ୍ୟ ଘୋଷଣା କରିଛନ୍ତି।