ଆଖି ଆଗରେ ବାଘ ଦେଖିଲେ ସମସ୍ତଙ୍କ ମନରେ ଛନକା ପଶିଯିବା ଥୟ। କାରଣ ବାଘ ଆକ୍ରମଣରେ ଜୀବନ ଯିବା ଥୟ। ମାତ୍ର ଅତର୍କିତ ଭାବେ ନିଜ ସାମନାରେ ଏକ ବାଘ ଦେଖି ଜଣେ ୧୦ ବର୍ଷୀୟା ନାବାଳିକା ଆଦୌ ଭୟଭୀତ ହେଲେନି। ବରଂ ବାଘ ସହ ଲଢ଼ି ନିଜର ଓ ନିଜ ୭ ବର୍ଷ ଭାଇର ଜୀବନ ବଞ୍ଚାଇ ସାହସିକତାର ପରିଚୟ ଦେଇଛନ୍ତି। ଏପରି ଏକ ଘଟଣା ଉତ୍ତରାଖଣ୍ଡର ପୌଡି ଜିଲ୍ଲାର ଭଟୋଲି ଗାଁରେ ଘଟିଛି।
ଭଟୋଲି ଗାଁରେ ସୋମବାର ସନ୍ଧ୍ୟାରେ ପ୍ରିୟାଂଶି ନାମ୍ନୀ ନାବାଳିକା ନିଜ ୭ ବର୍ଷର ଭାଇ ପ୍ରିନ୍ସ ସହ ଘର ଅଗଣାରେ ପାଠ ପଢ଼ୁଥିଲେ। ଉକ୍ତ ସମୟରେ ଏକ ବାଘ ଆସି ହଠାତ୍ ପ୍ରିନ୍ସ ପିଠି ଉପରକୁ ଝାମ୍ପିଥିଲା। ଏହାଦେଖି ପ୍ରିୟାଂଶି ହଠାତ୍ ଚିଲାଇବା ସହ ନିଜ ଭାଇକୁ ଟାଣି ଆଣିଥିଲେ। ଫଳରେ ଉଭୟ କିଛି ଦୂରରେ ଛିଟିକି ପଡ଼ିଥିଲେ।
ଉଭୟ ଭାଇଭଉଣୀଙ୍କ ଚିତ୍କାର ଶୁଣି ପରିବାରର ଅନ୍ୟମାନେ ପହଞ୍ଚିଯିବାରୁ ବାଘଟି ସେଠାରୁ ପଳାଇଥିଲା। ବାଘ ଆକ୍ରମଣରେ ପ୍ରିନ୍ସ ପିଠିରେ ଆଘାତ ଲାଗିଥିବାରୁ ତାକୁ ହସ୍ପିଟାଲରେ ଭର୍ତ୍ତି କରାଯାଇଛି।
ବନ କର୍ମଚାରୀ ଘଟଣାସ୍ଥଳରେ ପହଞ୍ଚି ସ୍ଥିତି ପରଖିବା ସହ ପ୍ରିନ୍ସଙ୍କ ପରିବାର ସହ ଆଲୋଚନା କରି ତାଙ୍କୁ ଆର୍ଥିକ ସହାୟତା ପ୍ରଦାନ କରିଥିବା ଜଣାଯାଇଛି।