ହାତୀ ଭାଙ୍ଗିଲା ଘର; କାନ୍ଥ ପଡ଼ି ମାଆ, ପୁଅ ମୃତ

ରାତିରେ ଶୋଇଥିବା ବେଳେ ଘର ଭାଙ୍ଗିଲା ଦନ୍ତା ହାତୀ। କାନ୍ଥ ତଳେ ଚାପି ହେଇ ଗର୍ଭବତୀ ମାଆ ଓ ପୁଅର ମୃତ୍ୟୁ ହୋଇଛି। ତିନି ଝିଅ ଗୁରୁତର ହୋଇଛନ୍ତି। ସୁନ୍ଦରଗଡ ଜିଲ୍ଲା ବରସୁଆଁ ରେଞ୍ଜ ବାଲିଝୁଡ଼ି ଗାଁରେ ଏହି ଅଘଟଣ ଘଟିଛି।

ମୃତକମାନେ ହେଲେ ମାଆ ସୁକାନ୍ତି ଭତ୍ତା ଓ ୮ ବର୍ଷର ପୁଅ ସୁଖନାଥ ଭତ୍ତା। ଗୁରୁତରମାନଙ୍କୁ ରାଉରକେଲା ଆରଜିଏଚକୁ ସ୍ଥାନାନ୍ତର କରାଯାଇଛି।

ଗତ ରାତିରେ ସୁକାନ୍ତି ଓ ତାଙ୍କ ଚାରି ସନ୍ତାନ ଘରେ ଶୋଇଥିଲେ। ଏହି ସମୟରେ ହାତୀ ପଲ ପଶି ଘର ଭାଙ୍ଗିଥିଲେ। ମାଟି କାନ୍ଥ ସୁକାନ୍ତି ତାଙ୍କ ଚାରି ସନ୍ତାନ ଉପରେ ପଡ଼ିଥିଲା। ଗ୍ରାମବାସୀ ପାଟି ଶୁଣି ଦୌଡ଼ି ଆସିଥିଲେ। ସୁକାନ୍ତି ଓ ତାଙ୍କ ଚାରି ସନ୍ତାନଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ।  ସେଠାରେ ଡାକ୍ତର ସୁକାନ୍ତି ଓ ତାଙ୍କ ପୁଅକୁ ମୃତ ଘୋଷଣା କରିଥିଲେ ଓ ସୁକାନ୍ତିଙ୍କ ୩ ଝିଅଙ୍କୁ ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି। 

ମୃତ ସୁକାନ୍ତି ଚାରି ମାସର ଗର୍ଭବତୀ ଥିବା ଜଣାପଡିଛି। ସୁକାନ୍ତିଙ୍କ ସ୍ୱାମୀ ସପ୍ତାହେ ପୂର୍ବରୁ ଦାଦନ ଖଟିବା ପାଇଁ ବାଙ୍ଗାଲୋର ଯାଇଥିବା ସୂଚନା ମିଳିଛି।