ହଠାତ୍‌ ବିଲ୍ଡିଂରେ ଲାଗିଲା ନିଆଁ; ୨ ଜୀଅନ୍ତା ଜଳିଗଲେ, ୯ ଗୁରୁତର

ଗତ ରାତିରେ ମୁମ୍ବାଇର ଏକ ୪ ତାଲା ବିଲ୍ଡିଂରେ ଭୟାବହ ଅଗ୍ନିକାଣ୍ଡ ଘଟିଛି। ଏହି ଅଗ୍ନିକାଣ୍ଡରେ ୨ ଜଣ ଜୀବନ୍ତ ଦଗ୍ଧ ହୋଇ ଯାଇଥିବା ବେଳେ ୯ ଜଣ ଆହତ ହୋଇଛନ୍ତି।

ଗତକାଲି ରାତି ପ୍ରାୟ ୧୦ଟା ବେଳେ ମୁମ୍ବାଇସ୍ଥିତ ଏକ ୪ ତାଲା ବିଲ୍ଡିଂରେ ନିଆଁ ଲାଗି ଯାଇଥିଲା। ଖବର ପାଇ ତୁରନ୍ତ ୧୫ ଦମକଳ ଗାଡ଼ି ଘଟଣା ସ୍ଥଳରେ ପହଞ୍ଚିଥିଲେ। ଦୀର୍ଘ ସମୟର ପରିଶ୍ରମ ପରେ ନିଆଁକୁ ପ୍ରଶମିତ କରାଯାଇଥିଲା। ଏହାପରେ ତୁରନ୍ତ ବିଲ୍ଡିଂରେ ଫସି ରହିଥିବା ୯ ଜଣଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରାଯାଇଛି।

ନିଆଁ ସମ୍ପୂର୍ଣ୍ଣ ଲିଭିବା ପରେ ଅଗ୍ନିଶମ କର୍ମଚାରୀ ସମ୍ପୂର୍ଣ୍ଣ ବିଲ୍ଡିଂରେ ଖୋଜାଖୋଜି କରି ୨ ମୃତଦେହ ପାଇଥିଲେ। ମୃତକଦ୍ୱୟ ହିରେନ ଶାହ ଓ ନଳୀନି ଶାହ ବୋଲି ଜଣାଯାଇଛି। ମୃତଦେହ ଦୁଇଟିକୁ ବ୍ୟବଚ୍ଛେଦ ନିମନ୍ତେ ନିକଟସ୍ଥ ହସ୍ପିଟାଲକୁ ପଠାଯାଇଛି।

ଅଗ୍ନିକାଣ୍ଡର କାରଣ ଖୋଜା ଚାଲିଥିବା ବେଳେ ଏନେଇ କିଛି ସ୍ପଷ୍ଟ ସୂଚନା ମିଳି ପାରିନି।