ଚଳନ୍ତା କାର୍ରେ ଲାଗିଲା ନିଆଁ । ଆଉ କାର୍ ଭିତରେ ଥିବା ଦୁଇ ଯୁବକ ବାହାରି ନ ପାରି ଜୀଅନ୍ତା ଜଳିଗଲେ। ଫଳରେ କାର୍ ଭିତରେ ହିଁ ସେମାନଙ୍କ ମୃତ୍ୟୁ ଘଟିଛି। ଏପରି ଏକ ଅଭାବନୀୟ ଘଟଣା ଉତ୍ତରପ୍ରଦେଶର ନୋଏଡାରେ ଘଟିଛି।
ନୋଏଡା ଥାନା ସେକ୍ଟର-୧୧୩ ରେ ଆଜି ଭୋରରୁ ଏପରି ଏକ ଘଟଣା ଘଟିଛି। ଏକ କାର୍ରେ ନିଆଁ ଲାଗି ଯାଇଥିବା ଖବର ପାଇ ତୁରନ୍ତ ଅଗ୍ନିଶମ ବାହିନୀ ପହଞ୍ଚିଥିଲା। ବହୁ ପରିଶ୍ରମ ପରେ ନିଆଁକୁ ଆୟତ୍ତ କରାଯାଇଥିଲା। ଏହାପରେ କାର୍ ଭିତରୁ ୨ ଜୀବନ୍ତ ଦଗ୍ଧ ହୋଇ ଯାଇଥିବା ମୃତଦେହକୁ ଉଦ୍ଧାର କରାଯାଇଛି।
ଉଭୟ ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଥିବା ବେଳେ ସେମାନଙ୍କ ଚିହ୍ନଟ ହୋଇ ପାରି ନ ଥିବା ଜଣାଯାଇଛି। ଏପରିକି ସେମାନଙ୍କ ଘର କେଉଁଠି ଓ ସେମାନେ କୁଆଡ଼େ ଯାଉଥିଲେ ତାହା ବି ସ୍ପଷ୍ଟ ହୋଇ ପାରିନି।
ଘଟଣାସ୍ଥଳରେ ପୁଲିସ୍ ଓ ଫରେନସିକ୍ ଟିମ୍ ପହଞ୍ଚି ତଦନ୍ତ କରିଛନ୍ତି । ଏଥିସହ ସିସିଟିଭି ଫୁଟେଜ ଆଧାରରେ ପୁଲିସ୍ ଘଟଣାର ତଦନ୍ତ ଆରମ୍ଭ କରିଛି। ତେବେ ଏହି ଘଟଣା ଯୋଗୁ ସ୍ଥାନୀୟ ଅଞ୍ଚଳବାସୀ ଛାନିଆ ହୋଇ ଯାଇଛନ୍ତି।