OR 
ହାଇୱା ଧକ୍କାରେ ଦୁଇ ଜଣ କିନ୍ନରଙ୍କ ମୃତ୍ୟୁ ଘଟିଛି। ସୁନ୍ଦରଗଡ଼ ଜିଲ୍ଲା ଲହୁଣୀପଡ଼ା ଥାନା ରଜାମୁଣ୍ଡା ନିକଟରେ ୧୪୩ ନମ୍ବର ଜାତୀୟ ରାଜପଥରେ ଆଜି ଭୋରରେ ଘଟିଛି ଏହି ଦୁର୍ଘଟଣା।
ଗୋଟିଏ ସ୍କୁଟିରେ ୩ ଜଣ କିନ୍ନର ଯାଉଥିବା ବେଳେ ଏହି ଦୁର୍ଘଟଣା ଘଟିଥିଲା। ୨ ଜଣ କିନ୍ନରଙ୍କ ମୃତ୍ୟୁ ଘଟିଥିବା ବେଳେ ଆଉ ଜଣେ ଅଳ୍ପକେ ବର୍ତ୍ତି ଯାଇଛନ୍ତି। ମୃତ କିନ୍ନର ଦ୍ୱୟ ହେଲେ ରଥ କିଷାନ ଓ ରାଜା ପାତ୍ର।
ଏହି ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଥିବା ସେମାନଙ୍କ ସାଥୀ ତଥା ଅନ୍ୟ ଜଣେ କିନ୍ନର ଉମାଶଙ୍କର ନାଏକଙ୍କ କହିବା ଅନୁଯାୟୀ ଏହା ଏକ ହତ୍ୟାକାଣ୍ଡ। ତାଙ୍କ କହିବା ଅନୁସାରେ କିନ୍ନର ରଥ କିଷାନଙ୍କର ହାଇୱା ଡ୍ରାଇଭର ପବନଙ୍କ ସହିତ ବନ୍ଧୁତା ଗଢ଼ି ଉଠିଥିଲା। ଗତକାଲି ରାତି ପ୍ରାୟ ୧୦ ଟା ବେଳେ ସେମାନଙ୍କ ମଧ୍ୟରେ କୌଣସି କାରଣରୁ ବଚସା ହୋଇଥିଲା। ସେତେବେଳେ ତାଙ୍କୁ ଗାଡ଼ି ଚପାଇ ମାରିଦେବାକୁ ପବନ ଧମକ ଦେଇଥିଲେ। ରଥ କିଷାନ ସେମାନଙ୍କୁ (ଉମାଶଙ୍କର ଓ ରାଜା ପାତ୍ର) ଏ କଥା କହିଥିଲେ।
Also Read
ସବୁ ଦିନ ଭଳି ଗତକାଲି ରାତିରେ ବି ଏହି ତିନି ଜଣ ସ୍କୁଟର ଧରି ବାହାରକୁ ବାହାରି ଯାଇଥିଲେ। ତେବେ ରଥ କିଷାନ ଯେଉଁ ଆଡ଼େ ଯାଉଥିଲେ ପବନ ଗାଡ଼ି ନେଇ ସେଠାରେ ପହଞ୍ଚି ଯାଉଥିଲେ। ଆଉ ଭୋରରେ ଯେତେବେଳେ ସେମାନେ ସ୍କୁଟରରେ ଘରକୁ ଫେରୁଥିଲେ ପବନ ତା’ ହାଇୱାରେ ଦ୍ରୁତ ଗତିରେ ଆସି ପଛରୁ ପିଟି ଦେଇଥିଲେ। ସ୍କୁଟି ପଛରେ ବସିଥିବା ଉମାଶଙ୍କର ଛିଟିକି କିଛି ଦୂରରେ ପଡ଼ିଥିଲେ ଓ ବଞ୍ଚି ଯାଇଥିଲେ। କିନ୍ତୁ ରଥ କିଷାନ ଓ ରାଜା ପାତ୍ରଙ୍କ ଉପରେ ହାଇୱା ଚଢ଼ି ଯାଇଥିଲା। ଉମାଶଙ୍କରଙ୍କ କହିବା ଅନୁଯାୟୀ ହାଇୱାଟି ପଛରୁ ଦ୍ରୁତଗତିରେ ଆସୁଥିବା ବେଳେ ରଥ କିଷାନ କହିଥିଲେ ଯେ ପବନ ସେମାନଙ୍କୁ ମାରିବାକୁ ଆସୁଛି।
ଦୁର୍ଘଟଣା ପରେ ହାଇୱା ଡ୍ରାଇଭର ଫେରାର ହୋଇଯାଇଛନ୍ତି। ପୁଲିସ୍ ଉଭୟ ହାଇୱା ଓ ସ୍କୁଟିକୁ ଜବତ କରିଛି। ଦୁଇଟି ଯାକ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇ ପୁଲିସ ଘଟଣାର ଛାନ୍ଭିନ୍ କରୁଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
