ଭୁବନେଶ୍ୱର(ଓଡ଼ିଶା ରିପୋର୍ଟର୍): ଶରୀରର ସ୍ୱାସ୍ଥ୍ୟ ଓ ସୌନ୍ଦର୍ଯ୍ୟ, ଉଭୟ ଦୃଷ୍ଟିରୁ ପାଦର ଭୂମିକା ଗୁରୁତ୍ୱପୂର୍ଣ୍ଣ। ଜ୍ୟୋତିଷ ଶାସ୍ତ୍ର ଅନୁସାରେ, ସୁନ୍ଦର ପାଦ ବ୍ୟକ୍ତିଙ୍କ ଭାଗ୍ୟ ଉପରେ ମଧ୍ୟ ଭଲ ପ୍ରଭାବ ପକାଇଥାଏ ଏବଂ ଜୀବନର ଲକ୍ଷ୍ୟସ୍ଥଳରେ ପହଞ୍ଚିବାରେ ସହାୟକ ହୋଇଥାଏ। ତେବେ ବହୁ ବ୍ୟକ୍ତି ନିଜ ପାଦର ଯତ୍ନ ନେବା ପାଇଁ ଯେତିକି ସଚେତନ ରହିବା କଥା, ତାହା ରୁହନ୍ତି ନାହିଁ। ଏପରି ଅବହେଳା ଯୋଗୁ ଗୋଇଠିର ତ୍ୱଚା ରୁକ୍ଷ ଓ ଶୁଷ୍କ ହେବା ସହ ପାଦ ଫାଟିଲା ଭଳି ସମସ୍ୟା ଦେଖାଦିଏ। ମହିଳାଙ୍କ କ୍ଷେତ୍ରରେ ଏହା ଏକ ଚିନ୍ତାଜନକ ସମସ୍ୟା ହୋଇଥାଏ। ଦିନସାରା ବିଭିନ୍ନ କାମରେ ବ୍ୟସ୍ତତା ଯୋଗୁ ସେମାନେ ନିଜ ପାଦର ଯତ୍ନ ନେବା ମଧ୍ୟ ଭୁଲି ଯା’ନ୍ତି। ତେବେ ଚାଲନ୍ତୁ ଜାଣିବା, ଆପଣ କିଭଳି ନିଜ ପାଦର ଯତ୍ନ ନେଇ ପାରିବେ।
- ୨ ଚାମଚ ଧଳା ଭେସ୍ଲିନ୍ରେ ଗୋଟିଏ ଛୋଟ ଚାମଚ ବୋରିକ୍ ପାଉଡର୍ ମିଶାଇ ଏହି ମିଶ୍ରଣକୁ ଲଗାଇଲେ, ପାଦରେ ଫଟା ଅଂଶ ଦୂର ହୋଇଯାଇଥାଏ।
- ଯଦି ଗୋଇଠି ଅଧିକ ଫାଟିଥାଏ, ତେବେ ମାଇଥିଲେଟେଡ୍ ସ୍ପିରିଟ୍ରେ ତୁଳା ବୁଡ଼ାଇ ଏହାକୁ ଗୋଇଠିରେ ଲଗାନ୍ତୁ। ୨ ମିନିଟ୍ ପରେ ପୋଛିଦେଇ ୧୦ରୁ ୧୫ ମିନିଟ୍ ପରେ ପୁଣି ଲଗାନ୍ତୁ। ଏହି ଭାବରେ ୩ରୁ ୪ଥର କରନ୍ତୁ।
- ରାତିରେ ଶୋଇବା ପୂର୍ବରୁ ଅଧାଟବ୍ ଉଷୁମୁ ପାଣିରେ ଅଧା ଚାମଚ ଲେମ୍ବୁ ରସ ମିଶାଇ, ସେହି ପାଣିରେ ପାଦକୁ ଭଲ ଭାବେ ସଫା କରନ୍ତୁ। ପରେ ତା’କୁ ପୋଛି ପାଦ ଶୁଖିବା ପରେ ହାଲ୍କା ଭେସ୍ଲିନ୍ ଲଗାନ୍ତୁ।
- ଖାଦ୍ୟରେ କ୍ୟାଲ୍ସିୟମ୍ କମ୍ ଥିଲେ ପାଦର ତ୍ୱଚା ଶୁଷ୍କ ହୁଏ। କ୍ୟାଲ୍ସିୟମ୍ ଅଧିକ ଥିବା ଖାଦ୍ୟ ଖାଇଲେ ମଧ୍ୟ ପାଦ ଫାଟିବା କମିଯିବ।