ନିକଟରେ ନିର୍ବାଚନ କମିଶନ ପ୍ରକାଶ କରିଥିବା ଇଲେକ୍ଟୋରାଲ ବଣ୍ଡ ତଥ୍ୟରୁ ଜଣାଯାଉଛି ଯେ, ଅନେକ ଅଜଣା କମ୍ପାନୀ ଏବଂ କିଛି ବ୍ୟକ୍ତିବିଶେଷ ରାଜନୈତିକ ଦଳମାନଙ୍କୁ କୋଟି କୋଟି ଟଙ୍କା ଦାନ କରିଛନ୍ତି। ସ୍ୱାଧୀନ ସାମ୍ବାଦିକମାନଙ୍କ ଦ୍ୱାରା ପରିଚାଳିତ ଏକ ସମ୍ବାଦ ୱେବସାଇଟ୍ ରିପୋଟର୍ସ କଲେକ୍ଟିଭ୍ ଏହି ରିପୋର୍ଟ ପ୍ରକାଶ କରିଛି। ଏହି ୱେବସାଇଟ୍ କହିଛି ଯେ, କେଉଁମାନେ କେଉଁ ଦଳମାନଙ୍କୁ କେତେ ଚାନ୍ଦା ଦେଇଛନ୍ତି, ସେଥିପ୍ରତି ବିଶେଷ ଦୃଷ୍ଟି ଦେବାର ଅବଶ୍ୟକତା ରହିଛି।
ଦି ରିପୋଟର୍ସ କଲେକ୍ଟିଭ୍ ଅନୁଯାୟୀ, ଯେଉଁ କମ୍ପାନୀ ଏବଂ ବ୍ୟକ୍ତିବିଶେଷ କୋଟି କୋଟି ଟଙ୍କା ଦାନ କରିଛନ୍ତି ସେମାନଙ୍କ ମଧ୍ୟରେ କୋଟାକ୍ ଗ୍ରୁପ୍ କମ୍ପାନୀ ଅଛି। ଏହି କମ୍ପାନୀ ବିଲିଓନେୟର ବ୍ୟାଙ୍କର ଉଦୟ କୋଟାକଙ୍କ ଦ୍ୱାରା ପରିଚାଳିତ। ସେହିପରି YSR କଂଗ୍ରେସ ପାର୍ଟି ସାଂସଦ ଆଲା ଅଯୋଧ୍ୟା ରାମି ରେଡ୍ଡୀଙ୍କ ସହ ସଂଯୁକ୍ତ ଏକ କମ୍ପାନୀ ନିର୍ବାଚନୀ ବଣ୍ଡ ଜରିଆରେ ୧୦୦ କୋଟି ଟଙ୍କାରୁ ଅଧିକ ଦାନ କରିଛି।
ଶ୍ରେଷ୍ଠ ୧୦୦ ଚାନ୍ଦାଦାତାଙ୍କ ମଧ୍ୟରେ ରିଲାଏନ୍ସ ଇଣ୍ଡଷ୍ଟ୍ରିଜ୍ ଆକାଉଣ୍ଟମ୍ୟାନ୍ ଲକ୍ଷ୍ମୀଦାସ ବହ୍ଲବଦାସ ମର୍ଚାଣ୍ଟ ଅଛନ୍ତି। ସେହିପରି କୁଇକ୍ ସପ୍ଲାଏ ଚେନ୍ ପ୍ରା ଲିମିଟେଡ୍ ନାମକ ଏକ ରିଲାଏନ୍ସ ଇଣ୍ଡଷ୍ଟ୍ରିଜ୍ କମ୍ପାନୀ ତୃତୀୟ ବୃହତ୍ତମ ଦାନକାରୀ ସଂସ୍ଥା ବୋଲି ଦି ରିପୋଟର୍ସ କଲେକ୍ଟିଭ୍ ରିପୋର୍ଟ କରିଛି।
ଏହି ରିପୋର୍ଟରେ ଅଛି ଯେ, ଏପ୍ରିଲ୍ ୨୦୧୯ରେ ହେବାକୁ ଥିବା ସାଧାରଣ ନିର୍ବାଚନ ପୂର୍ବରୁ ଉଦୟ କୋଟାକ୍ ତତ୍କାଳୀନ ଅର୍ଥମନ୍ତ୍ରୀ ଅରୁଣ ଜେଟଲୀଙ୍କୁ ଅସ୍ପଷ୍ଟ ନିର୍ବାଚନ ବଣ୍ଡ ଯୋଜନା ବିଷୟରେ ପଚାରିଥିଲେ। ସାତ ମାସ ପରେ, କୋଟାକ୍ ଗ୍ରୁପ୍ର ଏକ ଘରୋଇ କମ୍ପାନୀ ଇନଫିନା ଫାଇନାନ୍ସ ପ୍ରାଇଭେଟ ଲିମିଟେଡ୍ ୬୦ କୋଟି ଡଲାରର ନିର୍ବାଚନୀ ବଣ୍ଡ କିଣିଛି।
ସେହିପରି ରିଏଲ୍ ଇଷ୍ଟେଟ୍ ଏବଂ ଭିତ୍ତିଭୂମି ବିକାଶ (ଇନଫ୍ରାଷ୍ଟ୍ରକ୍ଚର ଡେଭଲପମେଣ୍ଟ) ସଂସ୍ଥା ରାମକି ଗ୍ରୁପ୍ ପ୍ରତିଷ୍ଠାତା YSR କଂଗ୍ରେସ ପାର୍ଟି ସାଂସଦ ଆଲା ରେଡ୍ଡୀଙ୍କ ଅଫିସ୍ ଆଡ୍ରେସ୍ ରାମକି ଟାୱାର୍ସ ମଧ୍ୟ ନିର୍ମାଣକାରୀ ସଂସ୍ଥା ଚେନ୍ନାଇ ଗ୍ରୀନ୍ ୱୁଡସ୍ ପ୍ରାଇଭେଟ୍ ଲିମିଟେଡର କାର୍ଯ୍ୟାଳୟ। ଏହି ନିର୍ମାଣକାରୀ ସଂସ୍ଥା ୧୦୫ କୋଟି ଟଙ୍କା ନିର୍ବାଚନୀ ବଣ୍ଡକୁ ଦାନ କରିଥିବା କଲେକ୍ଟିଭ୍ ରିପୋର୍ଟ କରିଛି।
ଦି ରିପୋଟର୍ସ କଲେକ୍ଟିଭ୍ ରିପୋର୍ଟ ଅନୁଯାୟୀ, ଜୁଲାଇ ୨୦୨୧ରେ ଆୟକର ବିଭାଗ ରାମକି ଗ୍ରୁପ୍ ଉପରେ ଟିକସ ଫାଙ୍କିବା ଅଭିଯୋଗରେ ଚଢ଼ାଉ କରିଥିଲା ଏବଂ ସେହି ଆର୍ଥିକ ବର୍ଷରୁ କମ୍ପାନୀ ନିର୍ବାଚନ ବଣ୍ଡ ମାଧ୍ୟମରେ ରାଜନୈତିକ ଦଳମାନଙ୍କୁ ଦାନ ଦେବା ଆରମ୍ଭ କରିଥିଲା।
ସେହିପରି ଏହି ରିପୋର୍ଟ କହିଛି ଯେ, ନାଭି ମୁମ୍ବାଇର ଧୀରୁବାଇ ଅମ୍ବାନୀ ନଲେଜ୍ ସିଟି (DAKC)ର ପଞ୍ଜୀକୃତ ଠିକଣା ଥିବା ଏବଂ ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ ସହିତ ଲିଙ୍କ୍ ଥିବା କ୍ୱିକ୍ ସପ୍ଲାଏ ଚେନ୍ ପ୍ରାଇଭେଟ ଲିମିଟେଡ୍, ନିର୍ବାଚନ ବଣ୍ଡ ବ୍ୟବହାର କରି ରାଜନୈତିକ ଦଳଗୁଡ଼ିକୁ କୋଟି କୋଟି ଟଙ୍କା ଦାନ କରିଛି, ଯାହା ଟପ୍ ଡୋନରଙ୍କ ମଧ୍ୟରେ ତୃତୀୟ ସ୍ଥାନରେ ରହିଛି। ୨୦୨୦-୨୧-୨୨ରୁ ୨୦୨୩-୨୪ ଆର୍ଥିକ ବର୍ଷ ମଧ୍ୟରେ ଏହା ୪୧୦ କୋଟି ନିର୍ବାଚନ ବଣ୍ଡ କିଣିଛି। ରିଲାଏନ୍ସ ଇଣ୍ଡଷ୍ଟ୍ରିଜ୍ ମୁଖପାତ୍ର କହିଛନ୍ତି ଯେ, କ୍ୱିକ୍ ସପ୍ଲାଏ ଚେନ୍ କୌଣସି ରିଲାଏନ୍ସ ଇଣ୍ଡଷ୍ଟ୍ରିଜ୍ ସଂସ୍ଥାର ସହାୟକ ନୁହେଁ ବୋଲି ପିଟିଆଇ ରିପୋର୍ଟ କରିଛି।
ରିଲାଏନ୍ସ ଇଣ୍ଡଷ୍ଟ୍ରିଜର ଜଣେ କର୍ମଚାରୀ ଲକ୍ଷ୍ମୀଦାସ ବହ୍ଲଭଦାସ ମର୍ଚାଣ୍ଟ ଶ୍ରେଷ୍ଠ ୧୦୦ ଦାତାଙ୍କ ମଧ୍ୟରେ ଅଛନ୍ତି। ମର୍ଚାଣ୍ଟଙ୍କ ଲିଙ୍କଡଇନ୍ ପ୍ରୋଫାଇଲ୍ ଅନୁସାରେ, ସେ ଟ୍ୟାକ୍ସ ଆଦି ବିଷୟ ବୁଝୁଥିବା ଜଣେ ଗ୍ରୁପ୍ କଣ୍ଟ୍ରୋଲର୍। ନଭେମ୍ବର ୨୨୦୩ରେ ସେ ନିର୍ବାଚନ ବଣ୍ଡ ଜରିଆରେ ୨୫ କୋଟି ଟଙ୍କା ଦାନ କରିଥିଲେ।