ଟିକସ୍ ଅପରିବର୍ତ୍ତିତ ରହିଲେ ବି ଏକ କୋଟି କରଦାତାଙ୍କୁ ମିଳିବ ଆଶ୍ୱସ୍ତି?

ଆଜି ୨୦୨୪-୨୫ ଆର୍ଥିକ ବର୍ଷ ପାଇଁ ଅନ୍ତରୀଣ ବଜେଟ ଉପସ୍ଥାପନ କରାଯାଇଛି। ଲୋକସଭା ନିର୍ବାଚନ ପୂର୍ବରୁ ଅର୍ଥମନ୍ତ୍ରୀ ନିର୍ମଳା ସୀତାରମଣ କାମଚଳା ବଜେଟ ଉପସ୍ଥାପନ କରିଛନ୍ତି। ବଜେଟ ଉପସ୍ଥାପନ ସମୟରେ ଅର୍ଥମନ୍ତ୍ରୀ କହିଛନ୍ତି, ଆୟକର ବ୍ୟବସ୍ଥାରେ କୌଣସି ପରିବର୍ତ୍ତନ କରାଯାଇ ନାହିଁ। ଏଥିରେ ଏକ କୋଟି ଟିକସଦାତା ଉପକୃତ ହେବେ ବୋଲି ଆଶା କରାଯାଉଛି।

ଏହାର କାରଣ ହେଉଛି, ସରକାର ୨୦୦୯-୧୦ ଆର୍ଥିକ ବର୍ଷ ପର୍ଯ୍ୟନ୍ତ ବକେୟାଥିବା ୨୫,୦୦୦ ଟଙ୍କା ପର୍ଯ୍ୟନ୍ତ ପୁରୁଣା ତଥା ବିବାଦୀୟ ପ୍ରତ୍ୟକ୍ଷ ଟିକସ ଆଦାୟ କରିବେ ନାହିଁ। ଏହା ସହିତ, ୨୦୧୦-୧୧ରୁ ୨୦୧୪-୧୫ଆର୍ଥିକ ବର୍ଷ ପାଇଁ ୧୦,୦୦୦ ଟଙ୍କା ପର୍ଯ୍ୟନ୍ତ ପ୍ରତ୍ୟକ୍ଷ ଟିକସ ପ୍ରତ୍ୟାହାର କରି ନିଆଯିବ।

ବଜେଟ ଉପସ୍ଥାପନ ସମୟରେ ଅର୍ଥମନ୍ତ୍ରୀ କହିଛନ୍ତି, "ମୁଁ ଟିକସଦାତା ସେବାରେ ଉନ୍ନତି ଆଣିବାକୁ ଏକ ଘୋଷଣା କରିବାକୁ ଚାହୁଁଛି। ବହୁ ସଂଖ୍ୟକ କ୍ଷୁଦ୍ର, ଯାଞ୍ଚ ହୋଇନଥିବା, ସମାଧାନ ହୋଇନଥିବା କିମ୍ବା ବିବାଦୀୟ ପ୍ରତ୍ୟକ୍ଷ ଟିକସ ରହିଛି, ସେଥି ମଧ୍ୟରୁ ଅନେକ ୧୯୬୨ ମସିହାରୁ ପଡ଼ି ରହିଛି, ଯେଉଁଗୁଡିକ ବିଚାରାଧୀନ ଅଛି। ଏହା ସଚ୍ଚୋଟ କରଦାତାଙ୍କ ପାଇଁ ଚିନ୍ତାର କାରଣ ପାଲଟୁଥିବା ବେଳେ ପରବର୍ତ୍ତୀ ବର୍ଷର ଫେରସ୍ତରେ ବାଧା ସୃଷ୍ଟି କରୁଛି।"

ତେଣୁ ୨୦୦୯-୧୦ ଆର୍ଥିକ ବର୍ଷ ପର୍ଯ୍ୟନ୍ତ ୨୫ ହଜାର ଟଙ୍କା ଏବଂ ୨୦୧୦-୧୧ ଆର୍ଥିକ ବର୍ଷ ପାଇଁ ୧୦ ହଜାର ଟଙ୍କା ପର୍ଯ୍ୟନ୍ତ ଏହିପରି ବକେୟା ପ୍ରତ୍ୟକ୍ଷ ଟିକସ ପ୍ରତ୍ୟାହାର କରିବାକୁ ପ୍ରସ୍ତାବ ଦେଇଛି। ଏହା ପ୍ରାୟ ଏକ କୋଟି ଟିକସଦାତାଙ୍କୁ ଲାଭଦାୟକ ହେବ ବୋଲି ଆଶା କରାଯାଉଥିବା ଅର୍ଥମନ୍ତ୍ରୀ କହିଛନ୍ତି।

ଏହି ଘୋଷଣା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ, ଆୟକର ଛାଡ଼ ଯୋଜନା ମଧ୍ୟବିତ୍ତ ଶ୍ରେଣୀର ଏକ କୋଟି ଲୋକଙ୍କୁ ଆଶ୍ୱସ୍ତି ପ୍ରଦାନ କରିବ।