ପୁଣି ଜଣେ ଓଡ଼ିଆଙ୍କୁ ମିଳିଛି ବଡ଼ ଦାୟିତ୍ୱ। ଭାରତ ସରକାର ୫୨ ବର୍ଷୀୟ ଦେବଦତ୍ତ ଚାନ୍ଦଙ୍କୁ ବ୍ୟାଙ୍କ ଅଫ ବରୋଦାର ମୁଖ୍ୟ ଭାବେ ନିଯୁକ୍ତି ଦେଇଛନ୍ତି। ସେ କାର୍ଯ୍ୟ ଭାର ସମ୍ଭାଳିବାର ୩ ବର୍ଷ ଯାଏ ବ୍ୟାଙ୍କ ଅଫ ବରୋଦାର ଏମଡି ଓ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ(ସିଇଓ) ଭାବେ କାମ କରିବେ। ସେ ୧.୦୭.୨୦୨୩ ଦିନ କିମ୍ବା ଏହାପରେ ନୂଆ ଦାୟିତ୍ୱ ଗ୍ରହଣ କରିପାରିବେ।
ବର୍ତ୍ତମାନ ସଞ୍ଜୀବ ଚଡା ବ୍ୟାଙ୍କ ଅଫ ବରୋଦାର ମୁଖ୍ୟ ଭାବେ କାର୍ଯ୍ୟ କରୁଛନ୍ତି। ତାଙ୍କ କାର୍ଯ୍ୟକାଳକୁ ସରକାର ୩ ମାସ ବୃଦ୍ଧି କରିଥିଲେ। ଏହା ଜୁନ ୩୦ରେ ଶେଷ ହେବ। ଏହାପରେ ଶ୍ରୀ ଚାନ୍ଦ ନୂଆ ଦାୟିତ୍ୱ ନେବେ।
Also Read
ବ୍ୟାଙ୍କିଂ ସେକ୍ଟରର ସହ ଶ୍ରୀ ଚାନ୍ଦଙ୍କର ୨୭ ବର୍ଷର ଅଭିଜ୍ଞତା ରହିଛି। ୨୦୨୧ ମାର୍ଚ୍ଚରୁ ସେ ବ୍ୟାଙ୍କ ଅଫ ବରୋଦାର କାର୍ଯ୍ୟନିର୍ବାହୀ ନିର୍ଦ୍ଦେଶକ ଭାବେ କାମ କରୁଛନ୍ତି। ସେ କୋର୍ପୋରେ କ୍ରେଡିଟ, ଟ୍ରେଜରୀ ଓ ଅନ୍ତର୍ଜାତୀୟ ବ୍ୟବସାୟକ ଦାୟିତ୍ୱରେ ରହିଛନ୍ତି। ବ୍ୟାଙ୍କ ଅଫ ବରୋଦାର କାର୍ଯ୍ୟନିର୍ବାହୀ ନିର୍ଦ୍ଦେଶକ ହେବା ପୂର୍ବରୁ ଶ୍ରୀ ଚାନ୍ଦ ପଞ୍ଜାବ ନ୍ୟାଶନାଲ ବ୍ୟାଙ୍କରେ ରହିଥିଲେ। ମୁମ୍ବାଇ ଜୋନର ମୁଖ୍ୟ ଭାବେ ସେ ପଞ୍ଜାବ ନ୍ୟାଶନାଲ ବ୍ୟାଙ୍କ ପାଇଁ କାମ କରୁଥିଲେ।
ପାଟନାରେ ଥିବା ବ୍ୟାଙ୍କର ଜୋନାଲ ଅଡିଟ ଅଫିସର ମୁଖ୍ୟ ଓ ବରେଲୀରେ ସର୍କଲର ମୁଖ୍ୟ ଭାବେ କାର୍ଯ୍ୟ କରିବାର ଅଭିଜ୍ଞତା ତାଙ୍କ ପାଖରେ ରହିଛି। ଶ୍ରୀ ଚାନ୍ଦ ବିଟେକ, ଏମବିଏ ଓ ସିଏଆଇଇବି ଡିଗ୍ରୀ ହାସଲ କରିଛନ୍ତି। ଇକ୍ୱିଟି ରସିର୍ଚ୍ଚରେ ପିଜି ଡିପ୍ଲୋମା ଡିଗ୍ରୀ ତାଙ୍କ ପାଖରେ ରହିଛି।
ବଲାଙ୍ଗିରର ପ୍ୟାଲେସ ଲାଇନ ଅଞ୍ଚଳରେ ଜନ୍ମିତ ଶ୍ରୀ ଚାନ୍ଦ ପୃଥ୍ୱୀରାଜ ହାଇସ୍କୁଲରୁ ବିଦ୍ୟାଳୟ ଶିକ୍ଷା ଶେଷ କରିବା ପରେ କଲେଜ ଅଫ୍ ଏଗ୍ରିକଲଚର ଇଞ୍ଜିନିୟରିଂ ଆଣ୍ଡ ଟେକ୍ନୋଲୋଜିରୁ ଡିଗ୍ରୀ ହାସଲ କରିଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
