ଚଳିତ ଆର୍ଥିକ ବର୍ଷ ଅକ୍ଷତ ରହିବ ଦେଶର ଆର୍ଥିକ ଅଭିବୃଦ୍ଧି। ପୂର୍ବ ଆକଳନ ଅନୁସାରେ ୭.୨% ଅଭିବୃଦ୍ଧି ହାସଲ କରିବ ଭାରତ। ଗତକାଲି ଜାତୀୟ ପରିସଂଖ୍ୟାନ କାର୍ଯ୍ୟାଳୟ ପକ୍ଷରୁ ପ୍ରଥମ ତ୍ରୟମାସିକ ଅର୍ଥାତ୍ ଏପ୍ରିଲ-ଜୁନ GDP ଅଭିବୃଦ୍ଧି ୬.୭%କୁ ଖସିବା ପରେ ଆଜି ଏଭଳି ଦୃଢୋକ୍ତି ପ୍ରକାଶ କରିଛନ୍ତି ଭାରତୀୟ ରିଜର୍ଭ ବ୍ୟାଙ୍କ (RBI) ଗଭର୍ଣ୍ଣର ଶକ୍ତିକାନ୍ତ ଦାସ ଏହି ଦୃଢୋକ୍ତି ପ୍ରକାଶ କରିଛନ୍ତି।
RBI ଗଭର୍ଣ୍ଣର କହିଛନ୍ତି, ନିର୍ବାଚନଜନିତ ଆଦର୍ଶ ଆଚରଣ ବିଧି ଲାଗୁ କାରଣରୁ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ବ୍ୟୟ କମିଥିଲା। ସରକାରୀ ବ୍ୟୟ ହ୍ରାସ ପ୍ରଭାବରୁ ଅଭିବୃଦ୍ଧି ଖସି ଆସିଛି। କିନ୍ତୁ ପରବର୍ତ୍ତୀ ତିନୋଟି ତ୍ରୟ ମାସରେ ଅଭିବୃଦ୍ଧିରେ ସୁଧାର ଆସିବ।
ସେ ଆହୁରି କହିଛନ୍ତି ଯେ, ମୌସୁମୀ ବର୍ଷା ସ୍ୱାଭାବିକ ଥିବାରୁ ଆଗାମୀ ଦିନରେ କୃଷି କ୍ଷେତ୍ରରେ ଉଲ୍ଲେଖନୀୟ ଅଭିବୃଦ୍ଧି ଦେଖିବାକୁ ମିଳିବ। ଶିଳ୍ପ, ମାନୁଫାକ୍ଚରିଂ, ସେବା, ଘରୋଇ ବ୍ୟୟରେ ବୃଦ୍ଧି ଯୋଗୁଁ ସମ୍ପୂର୍ଣ୍ଣ ୨୦୨୪-୨୫ ଆର୍ଥିକ ବର୍ଷର GDP ଅଭିବୃଦ୍ଧି ପୂର୍ବ ଆକଳନ ମୁତାବକ ୭.୨% ହେବ।
ଆଜି ଭୁବନେଶ୍ୱରରେ ଆୟୋଜିତ ଜାତୀୟ CA (ଚାଟାର୍ଡ ଆକାଉଣ୍ଟାଣ୍ଟ) ସମ୍ମିଳନୀରେ ଯୋଗ ଦେଇଥିଲେ RBI ଗଭର୍ଣ୍ଣର ଶକ୍ତିକାନ୍ତ ଦାସ। ଏହି ଅବସରେ ସେ ଦେଶର ଜିଡିପି ଅଭିବୃଦ୍ଧି ଉପରେ ଉପରୋକ୍ତ ମନ୍ତବ୍ୟ ରଖିଛନ୍ତି।