ନୂଆଦିଲ୍ଲୀ: ରିଅଲ୍ମି’ କମ୍ପାନୀ ସୋମବାର ତା’ର ନୂଆ ଫୋନ୍ ରିଅଲ୍ମି’ ଏକ୍ସ ବଜାରକୁ ଆଣିଛି। ଏହି ଫୋନ୍ର ଲୁକ୍ ବେଶ୍ ପ୍ରିମିୟମ୍ ରହିଥିବା ବେଳେ ଏହାର ଡିଜାଇନ୍ ଓ ଜବରଦସ୍ତ ଫିଚର୍ ଗ୍ରାହକଙ୍କୁ ବେଶ୍ ଆକୃଷ୍ଟ କରିବ ବୋଲି କମ୍ପାନୀ ପକ୍ଷରୁ ଆଶା ପ୍ରକାଶ କରାଯାଇଛି। ପ୍ରଥମ ଥର ପାଇଁ ରିଅଲ୍ମି’ ତା’ର କୌଣସି ମଡେଲ୍ର ସ୍କ୍ରିନ୍କୁ ନଚ୍-ଫ୍ରି ଏଜ୍-ଟୁ-ଏଜ୍ କରିଛି ଓ ଏଥିରେ ଇନ୍-ସ୍କ୍ରିନ୍ ଫିଙ୍ଗର୍ପ୍ରିଣ୍ଟ୍ ସେନ୍ସର୍ ସୁବିଧା ଉପଲବ୍ଧ ରହିଛି। ଏହାର ଦାମ୍ ୧୬,୯୯୯ ଟଙ୍କା ରଖାଯାଇଛି। ଫୋନ୍ ପୋଲାର୍ ହ୍ୱାଇଟ୍ ଓ ସ୍ପେସ୍ ବ୍ଲୁ ରଙ୍ଗରେ ଉପଲବ୍ଧ ହେଉଛି।
ଏହାଛଡ଼ା ରିଅଲ୍ମି’ ଏକ୍ସ ରିଅଲ୍ ମିଡଟ୍କମ୍ରେ ଓ ଅଫ୍ଲାଇନ୍ ଷ୍ଟୋର୍ରେ ମଧ୍ୟ ଖୁବ୍ଶୀଘ୍ର ଉପଲବ୍ଧ ହେବ। ସ୍ପେଶାଲ୍ ଓନିଅନ୍ ଓ ଗାର୍ଲିକ୍ ରଙ୍ଗ ବିଶିଷ୍ଟ ମଡେଲ୍ର ଦାମ୍ ୧୯ ହଜାର ୯୯୯ ଟଙ୍କା ରହିବ ବୋଲି ଜଣାପଡ଼ିଛି। ଏହାର ସ୍କ୍ରିନ୍ ୬.୫୩ ଇଞ୍ଚ୍ ଫୁଲ୍ ଏଚ୍ଡିପ୍ଲସ୍ ଡିସ୍ପ୍ଲେ ଯୁକ୍ତ ରହିଛି। ଏଥିରେ କ୍ୱାଲ୍କମ୍ ସ୍ନାପ୍ଡ୍ରାଗନ୍ ୭୧୦ ପ୍ରୋସେସର୍ ରହିଛି। ଏଥିରେ ୧୨୮ ଜିବି ଇନ୍-ବିଲ୍ଟ ମେମୋରି ରହିଥିବା ବେଳେ ଏହା କଲର୍ ୬.୦ ଆଣ୍ଡ୍ରଏଡ୍ ପାଏ ସଫ୍ଟୱେୟର୍ ମାଧ୍ୟମରେ ପରିଚାଳିତ ହେବ।
ସେଲ୍ଫି କ୍ୟାମେରାରେ ଏଆଇ ବିଉଟି ମୋଡ୍ ସହ ନ୍ୟୁ ପୋଟ୍ରେଟ୍ ଷ୍ଟାଇଲ୍ ଉପଲବ୍ଧ ରହିଛି। ସେହିପରି ଉତ୍ତମ ସାଉଣ୍ଡ୍ ବ୍ୟବସ୍ଥା ପାଇଁ ଏଥିରେ ଡଲ୍ବି ଆଟମୋସ୍ ରହିଛି। ଫୋନ୍ରେ ୩,୭୬୫ ଏମ୍ଏଏଚ୍ ବ୍ୟାଟେରୀ ସହ ଭିଓଓସି ଫାଷ୍ଟ୍ ଚାର୍ଜିଙ୍ଗ୍ ସୁବିଧା ମଧ୍ୟ ଉପଲବ୍ଧ ରହିଥିବା ଜଣାପଡ଼ିଛି।