କଲିକତା(ଓଡ଼ିଶା ରିପୋର୍ଟର), କିଛି ଦିନ ପୂର୍ବରୁ ବଜାରରେ ୧୦ ଟଙ୍କିଆ ମୁଦ୍ରା ଅଚଳ ହୋଇଯାଇଥିବା ନେଇ ଭାରି ଜୋର୍ରେ ଗୁଜବ ଉଠିଥିଲା। ହାଟ ବଜାରରେ ଏହି ୧୦ ଟଙ୍କିଆ କଏନ୍କୁ କେହି ଗ୍ରହଣ କରୁ ନଥିଲେ। ଏବେ ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ଏହି କଏନ୍ ଉତ୍ପାଦନ ହ୍ରାସ କରିଦେଇଛି।
୧୦ ଟଙ୍କିଆ କଏନ୍ ବଦଳରେ ଲୋକେ ଟଙ୍କିକିଆ, ଦି'ଟଙ୍କିଆ ଏବଂ ୫ ଟଙ୍କିଆ ବେଶି ପସନ୍ଦ କରୁଥିବାରୁ ସରକାର ଏହାର ମୁଦ୍ରଣ ପ୍ରାୟ ଅଧା କମାଇଦେଇଛନ୍ତି। ଅନ୍ୟ ପକ୍ଷରେ ଏଥିପାଇଁ ଆବଶ୍ୟକ ହେଉଥିବା କଞ୍ଚାମାଲ୍ ମଧ୍ୟ ଉପଲବ୍ଧ ହେଉନାହିଁ। ଫଳରେ ନିରୁପାୟ ହୋଇ ଆର୍ବିଆଇ ୧୦ଟଙ୍କିଆ କଏନ୍ ମୁଦ୍ରଣ ବନ୍ଦ କରି ଦେଇଛି ବୋଲି ପ୍ରକାଶ କରିଛି।
କୋଲକାତା, ମୁମ୍ବାଇ, ହାଇଦ୍ରାବାଦ ଏବଂ ନୋଏଡାରେ ରହିଥିବା ୪ଟି ସରକାରୀ ମୁଦ୍ରଣ ୟୁନିଟ୍ ୧୦ ଟଙ୍କିଆ କଏନ ମୁଦ୍ରଣର ପରିମାଣ ହ୍ରାସ କରିବା ବ୍ୟତୀତ ଅନ୍ୟ କୌଣସି ଉପାୟ ନାହିଁ ବୋଲି ପ୍ରକାଶ କରିଛନ୍ତି।
ପୂର୍ବରୁ ୪୦୦ କୋଟି ପିସ୍ ୧୦ ଟଙ୍କିଆ କଏନ୍ ମୁଦ୍ରଣ ପାଇଁ ଯୋଜନା ହୋଇଥିବା ବେଳେ ଏବେ ଏହାକୁ ୨୦୦ କୋଟି ପିସ୍କୁ ହ୍ରାସ କରିଦିଆଯାଇଛି ବୋଲି ଆର୍ବିଆଇ କହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
