ବ୍ୟାଙ୍କରୁ ଟଙ୍କା ଉଠାଇ ଘରକୁ ଫେରିବା ବାଟରେ ଦମ୍ପତିଙ୍କ ଠାରୁ ୨ ଲକ୍ଷ ଝାମ୍ପି ନେଲେ ଦୁର୍ବୃତ୍ତ। ଜଗତସିଂହପୁର ଜିଲ୍ଲା କୁଜଙ୍ଗ ମଲ୍ଲାସାହିରେ ଘଟିଛି ଏଭଳି ଘଟଣା। ଲୁଟ୍ର ଶିକାର ହୋଇଥିବା ବ୍ୟକ୍ତି ହେଉଛନ୍ତି ବିଷ୍ଣୁପ୍ରସାଦ କର।
ଠିକାଦାର ବିଷ୍ଣୁପ୍ରସାଦ କର ଓ ତାଙ୍କ ପତ୍ନୀ ଆଜି ସକାଳେ ଟଙ୍କା ଉଠାଇବା ପାଇଁ ବ୍ୟାଙ୍କ ଯାଇଥିଲେ। ବ୍ୟାଙ୍କରୁ ସେମାନେ ୨ଲକ୍ଷ ୧୦ହଜାର ଟଙ୍କା ଉଠାଇ ସ୍କୁଟିରେ ଘରକୁ ଫେରୁଥିଲେ। ଘରକୁ ଫେରିବା ବେଳେ ପଛରୁ ଗୋଟିଏ ବାଇକରେ ଦୁଇ ଜଣ ଦୁର୍ବୃତ୍ତ ଆସି ଟଙ୍କା ବ୍ୟାଗ ଝାମ୍ପି ନେଇ ପଳାଇଥିଲେ।
ବିଷ୍ଣୁପ୍ରସାଦ ଲୁଟେରାଙ୍କ ବାଇକ ପିଛା କରିଥିଲେ। କିନ୍ତୁ ଲୁଟେରାମାନେ ଦୃତ୍ତ ଗତିରେ ଚମ୍ପଟ ମାରିଥିଲେ। ପରେ ବିଷ୍ଣୁପ୍ରସାଦ ଏନେଇ କୁଜଙ୍ଗ ଥାନାରେ ଲିଖିତ ଅଭିଯୋକ କରିଥିଲେ। ଅଭିଯୋଗ ଆଧାରରେ ପୁଲିସ ଘଟଣାର ତଦନ୍ତ କରୁଛି।