ଗୁଗଲରେ ପାର୍ଟ ଟାଇମ୍ ଚାକିରି ଖୋଜିବା ମହଙ୍ଗା ପଡ଼ିଲା। ଭଲ ଦରମା ଆଶାରେ ବିଭିନ୍ନ ଲିଙ୍କରେ କ୍ଲିକ୍ କରୁ କରୁ ସାଇବର ଠକଙ୍କ ହାବୁଡ଼ରେ ପଡ଼ିଗଲେ ଯୁବକ । ଆଉ ଆକାଉଣ୍ଟରୁ ଥରକୁ ଥର କରି କଟିଗଲା ୬୦ ହଜାର ଟଙ୍କା। ଏପରି ଏକ ଘଟଣା ବାଲେଶ୍ୱର ଜିଲ୍ଲା ସୋର ଥାନା ଅନ୍ତର୍ଗତ ଅଇଁରୀ ଗାଁରେ ହୋଇଛି। ଠକାମୀର ଶିକାର ହୋଇଥିବା ଯୁବକଜଣକ ହେଲେ ସମରବିଜୟ ବାରିକ l
ସମର ବିଜୟ ଜଣେ ଫାର୍ମାସି ଛାତ୍ର ହୋଇଥିବା ବେଳେ ଗୁଗଲରେ ପାର୍ଟଟାଇମ ଚାକିରି ଖୋଜୁଥିଲେ। ଏହା ମଧ୍ୟରେ ସେ ଜଣେ ସାଇବର ଠକ ହାବୁଡ଼ରେ ପଡିଥିଲେ l ତାଙ୍କୁ ଚାକିରି ଆବେଦନ କରିବାକୁ ଅନଲାଇନରେ ନାମ ରେଜିଷ୍ଟ୍ରେସନ କରାଇବାକୁ ଏକ ଶହ ଟଙ୍କା ପେମେଣ୍ଟ କରିବାକୁ କୁହାଗଲା। ପରେ ଦ୍ୱିତୀୟ ପର୍ଯ୍ୟାୟରେ କିଛି ଟଙ୍କା କଟିବା ପରେ ପୁଣି ସମରଙ୍କ ଆକାଉଣ୍ଟକୁ କିଛି ଟଙ୍କା ଆସିଥିଲା l ଏହାର କିଛି ସମୟ ମଧ୍ୟରେ ତାଙ୍କ ବ୍ୟାଙ୍କ ଆକାଉଣ୍ଟ ଖାଲି ହୋଇଯାଇଥିଲା । ଆଉ ତାଙ୍କ ଆକାଉଣ୍ଟରୁ ୬୦ହଜାରରୁ ଉର୍ଦ୍ଧ ଟଙ୍କା ଗାଏବ ହୋଇଯାଇଥିଲା l
ଏତିକିରେ ମନ ସନ୍ତୁଷ୍ଟ ନ ହେବାରୁ ସାଇବର ଠକଜଣକ ଅଧିକ ଟଙ୍କାର ପ୍ରଲୋଭନ ଦେଖାଇ ସମର ବିଜୟଙ୍କ ନିକଟକୁ ଏକ ନକଲି ବ୍ୟାଙ୍କ ନୋଟିସ ପଠାଇଛି l ଯେଉଁଥିରେ ୧୦% ଟ୍ୟାକ୍ସ ଟଙ୍କା ଡିପୋଜିଟ କଲେ ତାଙ୍କୁ ୪ଲକ୍ଷ ୦୭ ହଜାର ୫୬୯ ଟଙ୍କା ମିଳିବ ବୋଲି ଉଲ୍ଲେଖ ଅଛି।
Also Read
ଠକାମୀର ଶିକାର ହୋଇଥିବା ଜାଣିବା ପରେ ସମର ବିଜୟ ଏନେଇ ସୋର ଥାନାରେ ଲିଖିତ ଅଭିଯୋଗ କରିଛନ୍ତି l ରୁପସା ଥାନା ଅଞ୍ଚଳର ଜଣେ ଯୁବକ ଏହି ଟଙ୍କା ଫେରାଇ ଆଣିବେ ବୋଲି ସମରବିଜୟଙ୍କ ମନରେ ବିଶ୍ୱାସ ଜନ୍ମାଇଥିଲେ। ଏହାପରେ ସେ ବି ତାଙ୍କଠାରୁ ୧୫ ହଜାର ଲୁଟି ନେଇଛନ୍ତି l
ଇତି ମଧ୍ୟରେ ସମୁଦାୟ ସମରବିଜୟଙ୍କ ଆକାଉଣ୍ଟରୁ ୭୫ ହଜାର ଟଙ୍କା ଗାଏବ ହୋଇ ଯାଇଥିବା ବେଳେ ସେ ଏବେ ମୁଣ୍ଡରେ ହାତ ଦେଇ ବସିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
