ଦେଶୀ ବନ୍ଧୁକରୁ ଗୁଳିଫୁଟି ଜଣେ ମହିଳାଙ୍କ ମୃତ୍ୟୁ ଘଟିଥିବା ବେଳେ ତାଙ୍କ ଝିଅଙ୍କ ଅବସ୍ଥା ଗୁରୁତର ଅଛି। ଘଟଣାଟି ଘଟିଛି କଳାହାଣ୍ଡି ଜିଲ୍ଲା ଥୁଆମୂଳ-ରାମପୁର ଥାନା ରଣପୁର ଗାଁରେ। ମୃତକ ମହିଳାଙ୍କ ନାଁ ଜେମା ଦେଇ ମାଝୀ। ଗୁରୁତର ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଥିବା ତାଙ୍କ ଝିଅଙ୍କ ନାଁ ବିଦ୍ୟା ମାଝୀ।
ଗତକାଲି ଜେମା ଦେଇ ମାଝୀଙ୍କ ସ୍ୱାମୀ ବନ ମାଝୀ ଏକ ଦେଶୀ ବନ୍ଧୁକ ଧରି ଜଙ୍ଗଲକୁ ଯାଉଥିଲେ। କିନ୍ତୁ ଜେମା ଓ ତାଙ୍କ ଝିଅ ବିଦ୍ୟା ବାରଣ କରିଥିଲେ। ବନ ମାଝୀ ତାଙ୍କ ପତ୍ନୀ ଓ ଝିଅଙ୍କ କଥା ଶୁଣି ନଥିଲେ। ତେଣୁ ତାଙ୍କ ସ୍ତ୍ରୀ ଓ ଝିଅ ତାଙ୍କଠାରୁ ବନ୍ଧୁକ ଛଡ଼ାଇ ନେବାକୁ ଚେଷ୍ଟା କରିଥିଲେ। ତା’ଭିତରେ ବନ୍ଧୁକରୁ ଗୁଳି ଫୁଟି ଯାଇଥିଲା।
Also Read
ଗୁଳିମାଡ଼ରେ ଗୁରୁତର ଆହତ ହୋଇଥିଲେ ଜେମର ଓ ବିଦ୍ୟା। ଜେମାଙ୍କୁ ସଙ୍କଟାପନ୍ନ ଅବସ୍ଥାରେ ପ୍ରଥମେ ଭବାନୀପାଟଣା ଡାକ୍ତରଖାନାକୁ ନିଆଯାଇଥିଲା। ସେଠାରୁ ତାଙ୍କୁ ବୁର୍ଲା ନିଆଯାଉଥିବା ବେଳେ ବାଟରେ ତାଙ୍କର ମୃତ୍ୟୁ ଘଟିଥିଲା। ବିଦ୍ୟାଙ୍କୁ ବୁର୍ଲା ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଛି।
ଥୁଆମୂଳ-ରାମପୁର ଥାନା ପୁଲିସ ବନ ମାଝୀଙ୍କୁ ଥାନାକୁ ନେଇ ପଚରାଉଚରା କରୁଥିବା ବେଳେ ବନ୍ଧୁକଟିକୁ ଜବତ କରିଛି। ଏହା ସତରେ ଏକ ଦୁର୍ଘଟଣା ନା ହତ୍ୟା ଘଟଣା, ସେ ନେଇ ପୁଲିସର ତଦନ୍ତ ଜାରି ରହିଛି।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
