ମାତିଛନ୍ତି ଗୋରୁ ଚୋର। ଭୋରୁ ଭୋରୁ ଆସୁଛନ୍ତି, ଆଉ ଶୂନ୍ଶାନ୍ ବଜାରରୁ ଗୋରୁ ଗାଈଙ୍କୁ ଉଠାଇ ନେଉଛନ୍ତି। ଏପରି ଘଟଣା ଗତ ରବିବାର କଟକ ମହାନଗର ନିଗମ(ସିଏମ୍ସି)ର ୩ ନମ୍ୱର ୱାର୍ଡରେ ଘଟିଛି। ଯାହାର ଭିଡିଓ ସିସିଟିଭିରେ କଏଦ ହୋଇଛି। ଆଉ ଏବେ ସେହି ଭିଡିଓ ମୋବାଇଲରୁ ମୋବାଇଲ୍ ଘୂରି ବୁଲୁଛି।
ରବିବାର ଭୋର ପ୍ରାୟ ସାଢ଼େ ୪ଟା ୪୪ ମିନିଟ୍ ହେବ। ୩ ନମ୍ୱର ୱାର୍ଡର ବାରଙ୍ଗ-ବାଙ୍କୀ ଜାତୀୟ ରାଜପଥର ଷଣ୍ଢପୁର ବଜାରରେ ଗୋଟିଏ ପିକ୍ଅପ୍ ଅଟକିଥିଲା। ଜଣେ ଯୁବକ ପିକ୍ଅପ୍ ଡାଲାରୁ ଓହ୍ଲାଇ ରାସ୍ତା ପାର୍ଶ୍ୱରେ ଶୋଇଥିବା ଗୋଟିଏ ଗାଈର ଶିଙ୍ଗକୁ ମାଡ଼ି ବସିଥିଲେ। ତା’ପରେ ଆଉ ୨ ଜଣ ଯୁବକ ଗାଈର ଲାଞ୍ଜ ଓ ଶିଙ୍ଗକୁ ଧରି ପକାଇଥିଲେ। ହେଲେ ଗାଈଟି ସେମାନଙ୍କୁ ଅନେକ ବାଟ ପର୍ଯ୍ୟନ୍ତ ଘୁଷାରି ନେଇଥିଲା। ହେଲେ ଯୁବକ ୪ ଜଣ କାଇଦା କରି ଗାଈକୁ ଧରି ପିକ୍ଅପ୍ ଡାଲାରେ ଲୋଡ୍ କରି ନେଇ ଯାଇଥିଲେ। ଯାହାର ଭିଡିଓ ରାସ୍ତା ପାର୍ଶ୍ୱରେ ଲାଗିଥିବା ସିସିଟିଭିରେ କଏଦ ହୋଇଛି। ଆଉ ଏବେ ସେହି ଭିଡିଓ ଭାଇରାଲ୍ ହେବାରେ ଲାଗିଛି।
Also Read
ଷଣ୍ଢପୁର ବଜାରରେ ପୁଲିସ୍ ପାଟ୍ରୋଲିଂ ବ୍ୟବସ୍ଥା ନଥିବାରୁ ଅସାମାଜିକ ଯୁବକମାନେ ଗୋରୁଙ୍କୁ ଉଠାଇ ନେଉଥିବା ଅଭିଯୋଗ ହେଉଛି। ଏହା ପୂର୍ବରୁ ଜଣକ ଗୁହାଳରୁ ଗୋରୁ ଚୋରି ହୋଇଥିବା ଅଭିଯୋଗ ହେଉଛି। ହେଲେ ବାରଙ୍ଗ ପୁଲିସ୍ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନଥିବା ଅଭିଯୋଗ ହେଉଛି। ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ରାତିରେ ଗୋରୁ ଚୋରି କରୁଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
