ପତ୍ନୀ ଓ ୩ ଝିଅ ଥାଇ ବି ଆଉ ଜଣଙ୍କ ସହ ଅବୈଧ ସମ୍ପର୍କ ରଖିଲେ। ତାଙ୍କ ସହ ମେସେଜରେ କଥା ହେଲେ ଓ ଭିଡିଓ କଲିଂରେ ଘଣ୍ଟା ଘଣ୍ଟା ଗପିଲେ। ଶେଷରେ ତାଙ୍କ ଘରକୁ ଯାଇ ଏକାନ୍ତରେ ସମୟ ବି ଅତିବାହିତ କଲେ। ସାନ ଝିଅ ପଢ଼ୁଥିବା ସ୍କୁଲର ଶିକ୍ଷୟିତ୍ରୀଙ୍କ ସହ ଜଣେ ବ୍ୟକ୍ତି ଏପରି ଲୀଳା ତାଙ୍କୁ ମହଙ୍ଗା ପଡ଼ିଛି। ଧୂର୍ତ୍ତ ଶିକ୍ଷୟିତ୍ରୀ ଜଣଙ୍କ ନିଜ ଛାତ୍ରୀଙ୍କ ବାପାଙ୍କୁ ପ୍ରେମ ଜାଲରେ ଫସାଇ ଟଙ୍କା ଲୁଟ କରିଛନ୍ତି। ଅଳ୍ପରେ ମନ ନ ଭରିବାରୁ ସେ ତାଙ୍କୁ ଅଧିକ ଟଙ୍କା ମାଗିଥିଲେ। ଏହି ଲୋଭ ତାଙ୍କୁ ପୁଲିସ୍ ହାତରେ ଧରାଇ ଦେଇଛି। ଧୂର୍ତ୍ତ ଶିକ୍ଷୟିତ୍ରୀ ଓ ତାଙ୍କର ୨ ସହଯୋଗୀଙ୍କୁ ବେଙ୍ଗାଲୁରୁ ପୁଲିସ୍ ଗିରଫ କରିବା ପରେ ପୂରା ଘଟଣା ସାମ୍ନାକୁ ଆସିଛି। ଏମାନେ ଜଣେ ବ୍ୟବସାୟୀଙ୍କୁ ବ୍ଲାକମେଲିଂ କରିବା ସହ ଟଙ୍କା ମାଗିବା ଅଭିଯୋଗରେ ଗିରଫ ହୋଇଛନ୍ତି।
କେନ୍ଦ୍ରୀୟ କ୍ରାଇମ ବ୍ରାଞ୍ଚ ୨୫ ବର୍ଷୀୟ ଶ୍ରୀଦେବୀ ଋଡାଗୀଙ୍କ ସହ ତାଙ୍କ ସହଯୋଗୀ ୩୮ ବର୍ଷୀୟ ଗଣେଶ କାଲେ ଓ ୨୮ ବର୍ଷୀୟ ସାଗର ମୋରେଙ୍କୁ ଗିରଫ କରିଛି। ଏମାନେ ପୀଡ଼ିତଙ୍କୁ ଆପତ୍ତିଜନକ ଫଟୋ, ଭିଡିଓ ଓ କିଛି ମେସେଜ ଦେଖାଇ ୪ ଲକ୍ଷ ଟଙ୍କା ଲୁଟ କରିବା ସହ ଆଉ ୨୦ ଲକ୍ଷ ଟଙ୍କା ମାଗୁଥିଲେ। ପୀଡ଼ିତ ଜଣଙ୍କ ହେଲେ ଜଣେ ବ୍ୟବସାୟୀ। ସେ ତାଙ୍କ ପତ୍ନୀ ଓ ୩ ଝିଅଙ୍କ ସହ ବେଙ୍ଗାଲୁରୁରେ ରହୁଥିଲେ।
ବେଙ୍ଗାଲୁରୁରେ ରହିବା ସମୟରେ ସେ ତାଙ୍କ ସାନ ଝିଅଙ୍କ ନାଁ ଗୋଟିଏ ସ୍କୁଲରେ ଲେଖାଇଥିଲେ। ୨୦୨୩ରେ ସାନ ଝିଅର ବୟସ ୫ ବର୍ଷ ହୋଇଥିଲା। ଝିଅର ନାଁ ଲେଖା ବେଳେ ତାଙ୍କର ଦେଖା ଉକ୍ତ ସ୍କୁଲର ଶିକ୍ଷୟିତ୍ରୀ ଶ୍ରୀଦେବୀଙ୍କ ସହ ହୋଇଥିଲା। ଝିଅର ନାଁ ଲେଖା ସମୟରେ ଆରମ୍ଭ ହୋଇଥିବା ଭେଟଘାଟ ପରବର୍ତ୍ତୀ ସମୟରେ ଭିନ୍ନ ଏକ ରୂପ ନେଇଥିଲା। ଶ୍ରୀଦେବୀ ପରବର୍ତ୍ତୀ ଅବସ୍ଥାରେ ଛାତ୍ରୀଙ୍କ ବାପା ସତୀଶ(ଛଦ୍ମ ନାମ)ଙ୍କ ସହ ଯୋଗାଯୋଗ କରିଥିଲେ।
ଉଭୟ ବିଭିନ୍ନ ପ୍ରସଙ୍ଗରେ କଥା ହେବା ପରେ ସେମାନଙ୍କ ମଧ୍ୟରେ ସମ୍ପର୍କ ନିବିଡ଼ ହୋଇଥିଲା। ସୁଯୋଗ ଦେଖି ଶ୍ରୀଦେବୀ ତାଙ୍କୁ କିଛି ଟଙ୍କା ଉଧାର ମାଗିଥିଲେ। ସତୀଶ ମଧ୍ୟ ତାଙ୍କୁ ଟଙ୍କା ଦେଇଥିଲେ। ଏହି ବାହାନାରେ ଉଭୟଙ୍କ ମଧ୍ୟରେ କଥାବାର୍ତ୍ତା ଆଗକୁ ବଢ଼ିଥିଲା। ଶ୍ରୀଦେବୀଙ୍କ ସହ କଥା ହେବା ପାଇଁ ସତୀଶ ଅଲଗା ସିମ ଓ ଫୋନ ମଧ୍ୟ କିଣିଥିଲେ। କିଛି ମାସର କଥାବାର୍ତ୍ତା ପରେ ସେମାନେ ପରସ୍ପରକୁ ଦେଖା କରିଥିଲେ। ବାରମ୍ବାର ଦେଖା ସାକ୍ଷାତ ପରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା।
ଏସବୁ ଭିତରେ ସତୀଶ ଉଧାର ଟଙ୍କା ଶ୍ରୀଦେବୀଙ୍କୁ ମାଗିଥିଲେ। ହେଲେ ସେ ଟଙ୍କା ପାଇଁ ସତୀଶଙ୍କୁ ଘରକୁ ଡାକିଥିଲେ। ସେ ମଧ୍ୟ ତାଙ୍କ ଘରକୁ ଚାଲି ଯାଇଥିଲେ। ଏତିକି ବେଳେ ସତୀଶଙ୍କୁ ଶ୍ରୀଦେବୀ ନିଜ ରୂପରେ ବିମୋହିତ କରି ଆକର୍ଷିତ କରିଥିଲେ। ସତୀଶ ଦୁର୍ବଳ ମୁହୂର୍ତ୍ତରେ ଥିବା ବେଳେ ତାଙ୍କର କିଛି ଆପତ୍ତିଜନକ ଫଟୋ ଓ ଭିଡିଓ ଶ୍ରୀଦେବୀ ତାଙ୍କର ଦୁଇ ସହଯୋଗୀଙ୍କ ଦ୍ୱାରା ରେକର୍ଡ କରି ନେଇଥିଲେ।
ବାସ୍ ଏହାକୁ ଦେଖାଇ ଶ୍ରୀଦେବୀ ପ୍ରଥମେ ସତୀଶଙ୍କ ଠାରୁ ୪ ଲକ୍ଷ ଟଙ୍କା ନେଇଥିଲେ। ଜାନୁଆରୀ ମାସରେ ସେ ଆଉ ୧୫ ଲକ୍ଷ ମାଗିଥିଲେ। କିନ୍ତୁ ସତୀଶ ମନା କରିବାରୁ ଶ୍ରୀଦେବୀ ୫୦ ହଜାର ଟଙ୍କା ଉଧାର ମାଗିବା ବାହାନାରେ ତାଙ୍କ ଘରେ ପହଞ୍ଚି ଯାଇଥିଲେ। ଘରେ ପହଞ୍ଚି ସେ ତାଙ୍କୁ ଧମକ ଦେଇଥିଲେ।
ଏସବୁ ଭିତରେ ସତୀଶଙ୍କ ବ୍ୟବସାୟ କ୍ଷତିର ସମ୍ମୁଖୀନ ହୋଇଥିଲା। ତେଣୁ ସେ ପରିବାର ସହ ଗୁଜରାଟ ଚାଲି ଯିବାକୁ ନିଷ୍ପତ୍ତି ନେଇଥିଲେ। ଏଥିଯୋଗୁ ସେ ନିଜ ଝିଅ ଟିସି ପାଇଁ ଆବେଦନ କରିଥିଲେ। ହେଲେ ମାର୍ଚ୍ଚ ମାସରେ ତାଙ୍କୁ ସାଂଘାତିକ ସ୍ଥିତିର ସମ୍ମୁଖୀନ ହେବାକୁ ପଡ଼ିଥିଲା। ସତୀଶ ଯେତେବେଳେ ସ୍କୁଲକୁ ଟିସି ପାଇଁ ଯାଇଥିଲେ ସେତେବେଳେ ତାଙ୍କୁ ଶ୍ରୀଦେବୀଙ୍କ ଅଫିସକୁ ଯିବାକୁ ପଡ଼ିଥିଲା। ସେ ସେଠାରେ ପହଞ୍ଚିବା ମାତ୍ରେ ଗଶେଶ ଓ ସାଗର ତାଙ୍କୁ ବ୍ଲାକମେଲ କରିଥିଲେ।
ଆପତ୍ତିଜନକ ଫଟୋ, ଭିଡିଓ ଓ ମେସେଜ ଦେଖାଇ ୨୦ ଲକ୍ଷ ଟଙ୍କା ମାଗିଥିଲେ। ଯଦି ସେ ଟଙ୍କା ନ ଦେବେ ଫଟୋ ଓ ଭିଡିଓକୁ ତାଙ୍କ ପରିବାର ଲୋକଙ୍କୁ ପଠାଇ ଦେବେ ବୋଲି ଉଭୟ କହିଥିଲେ। ଏଥିରେ ଡରି ଯାଇ ସତୀଶ ୧୫ ଲକ୍ଷ ଟଙ୍କା ଦେବାକୁ ରାଜି ହୋଇଥିଲେ। ପ୍ରାରମ୍ଭିକ ପର୍ଯ୍ୟାୟରେ ସେ ୧.୯ ଲକ୍ଷ ଟଙ୍କା ଦେଇଥିଲେ।
ମାର୍ଚ୍ଚ ୧୭ରେ ଶ୍ରୀଦେବୀ ତାଙ୍କୁ ବାକି ଥିବା ୧୫ ଲକ୍ଷ ପୁଣି ମାଗିଥିଲେ। ୫ ଲକ୍ଷ ଟଙ୍କା ଜଣେ ପୂର୍ବତନ ପୁଲିସ୍ ଅଧିକାରୀ, ଗଣେଶ ଓ ସାଗରଙ୍କୁ ୧ ଲକ୍ଷ ଟଙ୍କା ଲେଖାଏ ଓ ନିଜ ପାଇଁ ୮ ଲକ୍ଷ ଟଙ୍କା ଦେବାକୁ ଶ୍ରୀଦେବୀ କହିଥିଲେ। ସ୍ଥିତି ହାତରୁ ଖସି ଯାଉଥିବା ଅନୁଭବ କରି ସତୀଶ ବାଧ୍ୟ ହୋଇ ପୁଲିସ୍ରେ ଯୋଗାଯୋଗ କରିଥିଲେ।
ପୁଲିସ୍ ଟିମ ତୁରନ୍ତ ଶ୍ରୀଦେବୀ କହିଥିବା ତଥାକଥିତ ପୂର୍ବତନ ପୁଲିସ୍ ଅଧିକାରୀଙ୍କୁ ଯୋଗଯୋଗ କରିଥିଲା। ପୂରା ଘଟଣାରେ ତାଙ୍କର କୌଣସି ଭୂମିକା ନଥିବା ପୁଲିସ୍ ଜାଣିବାକୁ ପାଇଥିଲା। ଏହାପରେ ଶ୍ରୀଦେବୀ, ଗଣେଶ ଓ ସାଗରକୁ ଗିରଫ କରିଥିଲା। ଏବେ ସେମାନଙ୍କୁ ୧୪ ଦିନିଆ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ସେହିପରି ପୁଲିସ୍ ଏମାନେ ଆଉ କେଉଁମାନଙ୍କ ଠାରୁ ଟଙ୍କା ହଡ଼ପ କରିଛନ୍ତି କି ନାହିଁ, ତା’ର ତଦନ୍ତ ମଧ୍ୟ କରୁଛି।