ଅଳିଆ ପକାଇବାକୁ ନେଇ ତୁମୁଳକାଣ୍ଡ, ୩ ଗୁରୁତର

ଅଳିଆ ପକାଇବାକୁ ନେଇ ହେଲା ତୁମୁଳକାଣ୍ଡ। ଦୁଇ ଗାଁ ଭିତରେ ଘଟିଲା ଗୋଷ୍ଠୀ ସଂଘର୍ଷ। ଗାଁରେ ବୁଲିଲା ଠେଙ୍ଗା, ହେଲା ପଥର ମାଡ଼ । ଏଥିରେ ୩ ଜଣ ଆହତ ହୋଇଛନ୍ତି । ଏପରି ଏକ ଘଟଣା ଗତ ରାତିରେ ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ପଥରା ଗାଁର କଣ୍ଡରା ସାହି ଏବଂମ ଓଡ଼ିଆ ଆଲପୁର ଗାଁ ଭିତରେ ଘଟିଛି ।

ଏହି ସଂଘର୍ଷରେ ଓଡ଼ିଆ ଆଲପୁର ଗାଁର ୩ ଜଣ ଗୁରୁତର ହୋଇଛନ୍ତି। ସେମାନଙ୍କୁ ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରାଯାଇଛି। ଗୋଟିଏ ବାଇକ ଭଙ୍ଗାରୁଜା ସହ କିଛି ଘର ଆଜେବେଷ୍ଟ ଭାଙ୍ଗିଥିବା ଅଭିଯୋଗ ହୋଇଛି।

ଅଭିଯୋଗ ହୋଇଛି, ଗତ ରାତିରେ ପଥରା କଣ୍ଡରା ସାହିର କିଛି ବ୍ୟକ୍ତି ଟ୍ରାକ୍ଟରରେ ଅଳିଆ ଆବର୍ଜନା ଆଣି ଓଡ଼ିଆ ଆଲପୁର ଗାଁରେ ପକାଇଥିଲେ। ଓଡ଼ିଆ ଆଲପୁର ଗାଁ ଲୋକେ ଏହାକୁ ତୀବ୍ର ବିରୋଧ କରିଥିଲେ। ଏହାକୁ କେନ୍ଦ୍ର କରି ଦୁଇ ଗାଁ ଲୋକ ହାତାହାତି ହେବା ସହ ଟେକା ପଥର ମାଡ ହୋଇଥିଲା।

ଖଲ୍ଲିକୋଟ ଥାନା ଭେଜିପୁଟ ଫାଣ୍ଡି ପୁଲିସ ପହଞ୍ଚି ଲୋକଙ୍କୁ ବୁଝାସୁଝା କରିବା ସହ ସ୍ଥିତିକୁ ନିୟନ୍ତ୍ରଣକୁ ଆଣିଛି। ଏଥିସହ ଆହତଙ୍କୁ ତୁରନ୍ତ ମେଡିକାଲରେ ଭର୍ତ୍ତି କରିବା ସହ ଗାଁରେ ପଇଁତରା ମାରୁଛି।