ନକ୍ସଲ ବ୍ୟାନର ଖୋଜୁଥିଲେ ସିଆରପିଏଫ୍ ଯବାନ, ହେଲା ଆଇଇଡି ବିସ୍ଫୋରଣ

ଛତିଶଗଡ଼ ଦନ୍ତେୱାଡ଼ାରେ ବଡ଼ ଧରଣର ଅଘଟଣରୁ ବର୍ତ୍ତିଗଲେ ସିଆରପିଏଫ୍ ଯବାନ। ବାରସୁର୍ ଥାନା ଅଞ୍ଚଳରେ ବିଛାଯାଇଥିବା ଆଇଇଡି ବିସ୍ଫୋରଣରେ ମୃତ୍ୟୁମୁଖରୁ ବଞ୍ଚିଯାଇଛନ୍ତି ୨ ସିଆରପିଏଫ୍ ଯବାନ। କିନ୍ତୁ ସେମାନେ ଆହତ ହୋଇଛନ୍ତି।

ମିଳିଥିବା ସୂଚନା ଅନୁଯାୟୀ, ବରସୁର୍ ପଲ୍ଲୀ ରାସ୍ତାରେ ଏକ ବ୍ରିଜ ନିକଟରେ ନକ୍ସଲଙ୍କ ବ୍ୟାନର ଓ ପୋଷ୍ଟର ଲାଗିଥିବା ଖବର ପାଇ ସିଆରପିଏଫ୍ ଯବାନ ପହଞ୍ଚିଥିଲେ। ସେଠାରେ ସେମାନେ ନକ୍ସଲ ବ୍ୟାନର ଓ ପୋଷ୍ଟର ଲାଗିଥିବା ସ୍ଥାନ ଖୋଜାଖୋଜି କରୁଥିଲେ। 

ଠିକ ଏତିକି ସମୟରେ ନକ୍ସଲମାନେ ବିଛାଇଥିବା ଆଇଇଡି ହଠାତ ବିସ୍ଫୋରଣ ହୋଇଥିଲା। ଏଥିରେ ୨ ସିଆରପିଏଫ୍ ଯବାନ ଆହତ ହୋଇଛନ୍ତି। ତୁରନ୍ତ ଉଭୟଙ୍କୁ ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି। ସେଠାରେ ଉଭୟେ ବିପଦମୁକ୍ତ ଥିବା ସୂଚନା ମିଳିଛି।