ମେଡିକାଲରେ ନର୍ସିଂ ଚାକିରି କରାଇଦେବାକୁ କହି ଲୁଟି ନେଲେ ଲକ୍ଷାଧିକ ଟଙ୍କା। ଅଭିଯୋଗ ପରେ ଏବେ ପୁଲିସ କବଜାରେ ଦୁଇ ଅଭିଯୁକ୍ତ। କଟକ ମଙ୍ଗଳାବାଗ ଥାନା ପୁଲିସ ଏହି ଘଟଣାରେ ଦୁଇ ଦଲାଲଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଦୁଇଜଣ ଦୁଇ ଭାଇ ବୋଲି ଜଣାପଡ଼ିଛି। ଏମାନେ କଟକ ମଧୁପାଟଣା ଅଞ୍ଚଳରେ ଏକ ବେଆଇନ୍ ଅଫିସ୍ ଖୋଲି ଖବରକାଗଜରେ ବିଜ୍ଞାପନ ଦେଇ ଚାକିରି କରାଇବା କହି ୩୦ ଜଣଙ୍କ ଠାରୁ ପ୍ରାୟ ୧୧ ଲକ୍ଷରୁ ଊର୍ଦ୍ଧ୍ୱ ଟଙ୍କା ଲୁଟି ନେଇଛନ୍ତି।
ଅଭିଯୁକ୍ତ ଦୁଇ ଭାଇ କଟକର ଥୋରିଆ ସାହି ଅଞ୍ଚଳର ଅର୍ଚ୍ଚିତ ଦାସ ଏବଂ ଅର୍ପିତ ଦାସ ବୋଲି ପୁଲିସ ସୂଚନା ଦେଇଛି। ପୁଲିସ ଉଭୟଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ଗୋଟିଏ କାର, ଗୋଟିଏ ସ୍କୁଟି ଓ ନକଲି ନିଯୁକ୍ତି ପତ୍ର ସବୁ ଜବତ କରିଛି। ଏସସିବି ମେଡିକାଲ ସମେତ ରାଜ୍ୟର ଅନ୍ୟ ବଡ଼ ବଡ଼ ସରକାରୀ ମେଡିକାଲରେ ଏଏନ୍ଏମ୍, ଜିଏନ୍ଏମ୍, ଅଫିସ୍ ଆସିଷ୍ଟାଣ୍ଟ ଭଳି ପଦରେ ଚାକିରି କରାଇଦେବା କହି ଏମାନେ ଆଶାୟୀଙ୍କଠାରୁ ମୋଟା ଅଙ୍କର ଟଙ୍କା ଠକି ନେଇଥିବା ପୁଲିସ କହିଛି।
Also Read
ପୁଲିସ କହିବା ଅନୁସାରେ ଏମାନେ ଖବରକାଗଜରେ ଚାକିରି ବିଜ୍ଞପ୍ତି ମଧ୍ୟ ଦେଇଥିଲେ। ଚାକିରି ଆଶାରେ ଆଶାୟୀ ଏମାନଙ୍କ ପାଖକୁ ଆସିବା ପରେ ସେମାନଙ୍କଠାରୁ ମୋଟା ଅଙ୍କର ଟଙ୍କା ନେଇ ନକଲି ନିଯୁକ୍ତି ପତ୍ର ଦେଇଥିଲେ। ନକଲି ନିଯୁକ୍ତି ପତ୍ର ନେଇ ଆଶାୟୀ ଯେତେବେଳେ ମେଡିକାଲରେ ପହଞ୍ଚିଥିଲେ, ସେମାନେ ଠକାମୀର ଶିକାର ହୋଇଥିବା ଜାଣିପାରିଥିଲେ। ଏହାପରେ କଟକ ମଙ୍ଗଳାବାଗ ଥାନାରେ ଏତଲା ଦେବାପରେ ପୁଲିସ ଦୁଇ ଦଲାଲ ଭାଇଙ୍କୁ ଗିରଫ କରିଛି। ଏମାନେ ଏକ ରାକେଟ୍ ଚଳାଇଥିଲେ ବୋଲି ଜଣାପଡ଼ିଛି। ଏଥିରେ ଆଉ କେଉଁମାନେ ସଂପୃକ୍ତ ଅଛନ୍ତି, ତାହାର ତଦନ୍ତ ଚାଲିଥିବା କହିଛନ୍ତି ଏସିପି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
