ଶ୍ରମିକର ସାମାନ୍ୟ ଭୁଲ୍ରେ ରାଗିଗଲେ ମାଲିକ । ଭୁଲିଗଲେ ହିତାହିତ ଜ୍ଞାନ । ଏହାପରେ ବିଚ୍ ରାସ୍ତାରେ ଶ୍ରମିକଙ୍କୁ ଲାତ ମାରିଲେ, ଆଉ ଆଖି ପିଛୁଳାକେ ଟଳି ପଡ଼ିଲେ ଶ୍ରମିକ ।
ଏପରି ଏକ ଅଭାବନୀୟ ଘଟଣା ବଲାଙ୍ଗୀର ଜିଲ୍ଲା ପାଟଣାଗଡ଼ ଅଞ୍ଚଳରେ ଘଟିଛି। ମୃତକ ହେଲେ ଗାଡ଼ିଆଜୋର ଗାଁର ଗୋପବନ୍ଧୁ ଧରୁଆ । ଗୋପବନ୍ଧୁଙ୍କୁ ହତ୍ୟା ଅଭିଯୋଗରେ ପୁଲିସ୍ ଅଭିଯୁକ୍ତ ମାଲିକ ସୁଦାମ ଧରୁଆଙ୍କୁ ଥାନାରେ ଅଟକ ରଖିଛି।
ସୁଦାମ ଗତ ରବିବାର କିଛି ଟଙ୍କା ଦେଇ ଗୋପବନ୍ଧୁଙ୍କୁ ନିକଟ କେନ୍ଦୁମୁଣ୍ଡି ଗାଁରୁ ସାର ଆଣିବାକୁ କହିଥିଲେ। ଏଥିସହ ବଳକା ଟଙ୍କାକୁ ଘରେ ଦେବାକୁ କହିଥିଲେ। କିନ୍ତୁ ଗୋପବନ୍ଧୁ ବଳକା ଟଙ୍କାକୁ ଖର୍ଚ୍ଚ କରି ଦେଇଥିବା ବେଳେ ଆଉ ସୁଦାମଙ୍କୁ ଫେରାଇ ନ ଥିଲେ।
Also Read
ଗତକାଲି ଗୋପବନ୍ଧୁ ଧରୁଆ ଓ ଅନ୍ୟଜଣେ ସାଥି ଗାଁ ମୁଣ୍ଡରେ ଥିବା ପୋଲ ଉପରେ ବସିଥିଲେ। ଉକ୍ତ ସମୟରେ ସୁଦାମ ସେଠାରେ ପହଞ୍ଚିଥିଲେ। ଟଙ୍କା ନ ଫେରାଇବାକୁ ନେଇ ଗୋପବନ୍ଧୁଙ୍କ ସହ ତାଙ୍କର ବଚସା ହୋଇଥିଲା। ପରେ ଉତ୍ତ୍ୟକ୍ତ ସୁଦାମ ଗୋପବନ୍ଧୁଙ୍କୁ ଲାତ ମାରିଥିଲେ।
ଫଳରେ ସେହିଠାରେ ହିଁ ଅଚେତ ହୋଇ ପଡ଼ିଥିଲେ ଗୋପବନ୍ଧୁ। ପରିବାର ଲୋକେ ତୁରନ୍ତ ତାଙ୍କୁ ମେଡିକାଲ ନେଇଥିବା ବେଳେ ଡାକ୍ତର ମୃତ ଘୋଷଣା କରିଥିଲେ।
ଏନେଇ ପରିବାର ଲୋକ ଥାନାରେ ଲିଖିତ ଅଭିଯୋଗ ପରେ ପୁଲିସ ଶବ ଜବତ କରି ସୁଦାମଙ୍କୁ ଥାନାରେ ଅଟକ ରଖି ପଚରାଉଚରା କରୁଛି ।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
