ଦିନ ବେଳେ ଘାଟିରେ ବନ୍ଧୁକ ଦେଖାଇ ଲୁଟ୍‌, ଦମ୍ପତିଙ୍କ ଠାରୁ ନେଇଗଲେ ସୁନା,ଟଙ୍କା ଓ ମୋବାଇଲ

କନ୍ଧମାଳ-ଗଞ୍ଜାମ ସୀମାନ୍ତ ଗାଜଲବାଡ଼ି ଘାଟି ଆଜି ଏକ ଦମ୍ପତି ଲୁଟ୍‌ର ଶିକାର ହୋଇଛନ୍ତି। ତାହା ପୁଣି ଦିନ ପ୍ରାୟ ୧୧ଟା ବେଳେ।

ଲୁଟର ଶିକାର ହୋଇଥିବା ଏହି ଦମ୍ପତି ହେଉଛନ୍ତି ବିକ୍ରମ କେଶରୀ ପଟ୍ଟନାୟକ ଓ ସାଗର ପଟ୍ଟନାୟକ। ସେମାନଙ୍କ ଘର ଦାରିଙ୍ଗବାଡ଼ିର ନିଳକନ୍ଦର ସାହିରେ।

ବିକ୍ରମ କେଶରୀ ଓ ତାଙ୍କ ପତ୍ନୀ ସ୍କୁଟିରେ ବ୍ରହ୍ମପୁର ଅଭିମୁଖେ ଯାଉଥିବା ବେଳେ ଗାଜଲବାଡ଼ି ଘାଟିରେ ସେମାନଙ୍କୁ ୩ ଜଣ ଲୁଟେରା ଅଟକାଇଥିଲେ। ଲୁଟେରାମାନେ ଏକ କାରରେ ଆସିଥିଲେ। ସେମାନେ ବନ୍ଧୁକ ଦେଖାଇ ବିକ୍ରମ ଓ ତାଙ୍କ ପତ୍ନୀଙ୍କ ଠାରୁ ସୁନା ଚେନ, ୨ଟି ମୋବାଇଲ, ଏଟିଏମ କାର୍ଡ ଓ ଟଙ୍କା ନେଇ ଯାଇଥିଲେ।

ଗଲା ବେଳେ ଲୁଟେରାମାନେ ବିକ୍ରମଙ୍କ ସ୍କୁଟି ଚାବି ନେଇ ପଳାଇଥିଲେ। ତେବେ କିଛି ବାଟ ଗଲା ପରେ ସେମାନେ ସ୍କୁଟି ଚାବିକୁ ରାସ୍ତାରେ ଫିଙ୍ଗି ଦେଇଥିଲେ।

ଏହି ଘଟଣା ପରେ ଡରିଯାଇଥିବା ବିକ୍ରମ ଓ ତାଙ୍କ ପତ୍ନୀ ସୋରଡ଼ାରେ ପହଞ୍ଚିବା ପରେ ଘଟଣା ସମ୍ପର୍କରେ ଜଣାପଡ଼ିଥିଲା। ତେବେ ଖବର ଲେଖାଯିବା ବେଳକୁ ସେମାନେ ଘଟଣା ସମ୍ପର୍କରେ ଥାନାରେ ଏତଲା ଦେଇ ନଥିଲେ।