ଶୌଚ ପାଇଁ ଯାଇଥିବା ନାବାଳିକାଙ୍କୁ ଗଣବଳାତ୍କାର, ଜୀବନ ନେଇଗଲେ ଯୌନ ରାକ୍ଷସ

ଶୌଚ ପାଇଁ ଘରୁ ବାହାରକୁ ଯାଇଥିଲେ ନାବାଳିକା। ଭାବିଥିଲେ କିଛି ସମୟରେ ଘରକୁ ଫେରି ଆସିବେ। ମାତ୍ର ହଠାତ୍‌ ବଦଳିଗଲା ପୂରା ଦୁନିଆ। ଯୌନ ପିପାସୁଙ୍କ କବଳରେ ପଡ଼ିଗଲା ନାବାଳିକା। ଆଉ ଗଣବଳାତ୍କାରର ଶିକାର ହେଲେ । ୩ ଯୌନ ରାକ୍ଷସ ନାବାଳିକାଙ୍କ ଇଜ୍ଜତ ଲୁଟିବା ସହ ଜୀବନ ନେବାକୁ ବି ପଛାଇଲେ ନାହିଁ। ଏପରି ଏକ ହୃଦୟ ବିଦାରକ ଘଟଣା ବଲାଙ୍ଗିର ଜିଲ୍ଲା ସଇଁତଳା ବ୍ଲକ ତୁଷ୍ଟାପାଲି ଗାଁରେ ଘଟିଛି।

ଏନେଇ ସଇଁତଳା ଥାନାରେ ଅଭିଯୋଗ କରିଛନ୍ତି ନାବାଳିକାଙ୍କ ପରିବାର । ଗାଁର ୩ ଜଣ ଯୁବକଙ୍କ ସଂପୃକ୍ତି ଅଭିଯୋଗ ବି ଆଣିଛି ପରିବାର । ଗତ ବୁଧବାର ରାତିରେ ଝିଅ ଶୌଚ ପାଇଁ ଯାଇଥିବା ବେଳେ, ଆଉ ଘରକୁ ଫେରିନଥଲା । ପରିବାର ଲୋକ ଖୋଜାଖୋଜି କରିବା ପରେ ନଦୀ ପାଖରେ ଥିବା ଏକ ବୁଦା ମୂଳରୁ ସଂଜ୍ଞାହୀନ ଅବସ୍ଥାରେ ଝିଅକୁ ଉଦ୍ଧାର କରିଥିଲେ ।

ମାତ୍ର ଅବସ୍ଥା ଗୁରୁତର ଥିବାରୁ ତାଙ୍କୁ ପ୍ରଥମେ ବଲାଙ୍ଗୀର ଭୀମଭୋଇ ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।

ପୀଡ଼ିତା ପରିବାରଙ୍କୁ ନ୍ୟାୟ ପ୍ରଦାନ ଦାବିରେ ସଇଁତଳା ଥାନାର ଦ୍ୱାରସ୍ଥ ହୋଇଛନ୍ତି ଶତାଧିକ ବଜରଙ୍ଗ କର୍ମୀ । ଏନେଇ ସଇଁତଳା ପୁଲିସ ପକ୍ଷରୁ କୌଣସି ପ୍ରତିକ୍ରିୟା ମିଳି ପାରି ନ ଥିବା ବେଳେ କେହି ବି ଗିରଫ ହୋଇ ନ ଥିବା ଜଣାଯାଇଛି।