ମାମୁ ଘରକୁ ବୁଲିବାକୁ ଆସିଥିବା ଭଣଜା ଘଟାଇଲେ ଉନ୍ମତ୍ତ କାଣ୍ଡ । ଟାଙ୍ଗିଆରେ ହାଣି ୨ଜଣଙ୍କୁ କଲେ ଲହୁଲୁହାଣ । ଏଥିସହ ଘଟଣାସ୍ଥଳକୁ ଆସିଥିବା ପୁଲିସ୍ ଗାଡ଼ି ଓ ଆମ୍ବୁଲାନ୍ସକୁ ବି ଭଙ୍ଗାରୁଜା କଲେ। ଏପରି ଏକ ଅଭାବନୀୟ ଘଟଣଶ ଭଦ୍ରକ ଜିଲ୍ଲା ଚାନ୍ଦବାଲି ଥାନା ନାଲଗୁଣ୍ଡା-ପଳାସପୁର ଗାଁରେ ଘଟିଛି। ସଂପୃକ୍ତ ଯୁବକଜଣକ ହେଲେ ବାସୁଦେବପୁର ଅଞ୍ଚଳର ଭୀମସେନ ନାୟକ ।
ଭୀମସେନ କିଛି ଦିନ ହେବ ମାମୁ ଘରକୁ ବୁଲିବାକୁ ଆସିଥିଲେ। ତାଙ୍କ ମାନସିକ ସ୍ଥିତି ଠିକ୍ ରହୁ ନ ଥିବା ଜଣାଯାଇଛି। କୌଣସି କଥାକୁ ନେଇ ଭୀମସେନ ଉତ୍ତ୍ୟକ୍ତ ହୋଇ ଯାଇଥିବା ବେଳେ ଗତକାଲି ଘଟାଇଲେ ତାଣ୍ଡବ
ଗତକାଲି ରାତିରେ ପ୍ରାୟ ୨ଟାରେ ସେ ଟାଙ୍ଗିଆ ଧରି ଆତଙ୍କ ଖେଳାଇଥିଲେ। ଯିଏ ସାମନାକୁ ଆସୁଥିଲେ ତାକୁ ହାଣିବାକୁ ଗୋଡ଼ାଉଥିଲେ । ତାଙ୍କୁ କାବୁ କରିବାକୁ ଯାଇ ୨ଜଣଙ୍କ ଶରୀରରେ ଟାଙ୍ଗିଆ ଚୋଟ ବାଜିଛି।
Also Read
ଖବର ପାଇ ପୁଲିସ୍ ଗାଡ଼ି ପହଞ୍ଚିଥିବା ବେଳେ ଆହତଙ୍କୁ ହସ୍ପିଟାଲ ନେବାକୁ ଆମ୍ବୁଲାନ୍ସ ବି ଆସି ପହଞ୍ଚିଥିଲା। ଏହାଦେଖି ଉତ୍ତ୍ୟକ୍ତ ହୋଇ ଯାଇଥିବା ଭୀମସେନ ଆମ୍ବୁଲାନ୍ସ ଓ ପୁଲିସ୍ ଗାଡ଼ି କାଚ ଭଙ୍ଗାରୁଜା କରିଥିଲେ । ବହୁ କଷ୍ଟରେ ପୁଲିସ୍ ଭୀମସେନଙ୍କୁ କାବୁ କରି ଥାନାକୁ ନେଇଛି। ପଚରାଉଚରା ପରେ ସେ ଜଣେ ମାନସିକ ରୋଗୀ ବୋଲି ପୁଲିସ କହିଛି ।
ଏନେଇ ଚାନ୍ଦବାଲି ଆଇଆଇସି କହିଛନ୍ତି, ଭୀମସେନଙ୍କର ମାନସିକ ସମସ୍ୟା ରହିଛି। କୌଣସି କଥାକୁ ନେଇ ଉତ୍ତ୍ୟକ୍ତ ହୋଇଯିବାରୁ ସେ ଭାରସାମ୍ୟ ହରାଇ ଉନ୍ମତ୍ତ କାଣ୍ଡ ଘଟାଇଥିଲେ । ସେ ଦୁଇ ଜଣ ଲୋକଙ୍କୁ ଆକ୍ରମଣ କରିବା ସହ ୧୦୮ ଆମ୍ବୁଲାନ୍ସ ଓ ପୁଲିସ୍ ଗାଡ଼ିକୁ ଭାଙ୍ଗି ଦେଇଛନ୍ତି। ତାଙ୍କୁ ବହୁ କଷ୍ଟରେ କାବୁ କରି ପୁଲିସ୍ ଥାନାକୁ ଆଣିଛି।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
