OR 
ବହୁ କଷ୍ଟ କରି ଦୁଇ ପୁଅଙ୍କୁ ବଡ଼ କରିଥିଲେ। ଭାବିଥିଲେ ବୟସର ଅପରାହ୍ନରେ ଆଶାବାଡି ହେବେ ଦୁଇ ଅନ୍ଧର ଲଉଡି। ହେଲେ ସମୟ କ୍ରମେ ସେମାନଙ୍କ ପାଇଁ ଅଲୋଡା ହୋଇଗଲେ ବୃଦ୍ଧ ବାପା। ପୁଅ ବୋହୂଙ୍କ ନିର୍ଯାତନା ସହି ନପାରି ଶେଷରେ ଗୁହାଳରେ ରଶି ଲଗାଇ ଝୁଲିପଡ଼ିଲେ ବୃଦ୍ଧ। ଏପରି ଦୁଃଖଦ ଘଟଣା ଘଟିଛି ବାଲେଶ୍ୱର ଜିଲ୍ଲା ଭୋଗରାଇ ଚଣ୍ଡୀପୁର ଗାଁରେ। ମୃତ ବୃଦ୍ଧ ଜଣଙ୍କ ହେଲେ ନିରଞ୍ଜନ କର। ପୁଲିସ ମୃତଦେହ ନିକଟରୁ ଏକ ସୁଇସାଇଡ୍ ନୋଟ ଜବତ କରିଛି।
ନିରଞ୍ଜନଙ୍କର ଦୁଇ ପୁଅ ଓ ସ୍ତ୍ରୀକୁ ନେଇ ଥିଲା ସୁନାର ସଂସାର। ବଡ଼ ପୁଅ ନିଖୋଜ ଥିବାବେଳେ ସାନ ପୁଅ ପାଖରେ ରହୁଥିଲେ ନିରଞ୍ଜନ। ପୁଅବୋହୂ ନାତିନାତୁଣୀ ସହ ଖୁସିରେ ଦିନ କଟାଉଥିଲେ ନିରଞ୍ଜନ ଓ ତାଙ୍କ ସ୍ତ୍ରୀ। ହେଲେ ଅଧବାଟରେ ନିରଞ୍ଜନଙ୍କୁ ଏକା କରି ଆରପାରିକୁ ଚାଲିଗଲେ ସ୍ତ୍ରୀ। ନିରଞ୍ଜନ ପୂରା ଏକୁଟିଆ ହୋଇଗଲେ। ବୟସ ବଢ଼ିବା ସହ ବଢ଼ିଥିଲା ପୁଅବୋହୂଙ୍କ ନିର୍ଯାତନା। ଭଲରେ ମଧ୍ୟ ବୃଦ୍ଧ ବାପାଙ୍କ ଖାଇବାକୁ ଦେଉନଥିଲେ। ୪ବର୍ଷ ହେବ ଦୁଃଖକଷ୍ଟରେ ଦିନ କାଟୁଥିଲେ ନିରଞ୍ଜନ। କେତେ ବା ସହିବେ? ଶେଷରେ ନିରଞ୍ଜନ ଗତକାଲି ରାତିରେ ନିଜ ଗୁହାଳ ଘରେ ରଶି ଲଗାଇ ଆତ୍ମହତ୍ୟା କରିଥିଲେ। ମରିବା ପୂର୍ବରୁ ନିରଞ୍ଜନ ଏକ ସୁଇସାଇଡ ନୋଟ ଲେଖିଯାଇଛନ୍ତି। ଯାହାକୁ ପୁଲିସ ଜବତ କରିଛି।
Also Read
ଏଥିସହ ନିରଞ୍ଜନ ରହୁଥିବା ଘରୁ ପୁଲିସ ୨୦ ହଜାରରୁ ଊର୍ଦ୍ଧ୍ୱ ଟଙ୍କା ଜବତ କରିଛି। ପୁଲିସ ମୃତଦେହକୁ ଉଦ୍ଧାର ବ୍ୟବଚ୍ଛେଦ ପାଇଁ ପଠାଇଛି ଓ ଘଟଣା ତଦନ୍ତ କରୁଛି।
ଗ୍ରାମବାସୀ କହିଛନ୍ତି, ନିରଞ୍ଜନ ସାନପୁଅ ବୋହୂଙ୍କ ପାଖରେ ରହୁଥିଲେ। ୪ବର୍ଷ ତାଙ୍କ ପୁଅବୋହୂ ନିର୍ଯାତନା ଦେଉଥିଲେ। ଭଲରେ ଗଣ୍ଡେ ଖାଇବାକୁ ଦେଉ ନଥିଲେ। ମରିବାପୂର୍ବରୁ ସେ ସୁଇସାଇଡ ନୋଟ୍ ଛାଡ଼ିଯାଇଛନ୍ତି। ସେଥିରେ ସେ ୨ ଡିସିମିଲି ଜମି ମେଡିକାଲ କରିବା ପାଇଁ ଦାନ କରିଛନ୍ତି। ନିଜ ଶବ ସତ୍କାର୨୫ ହଜାର ଟଙ୍କା ଛାଡ଼ିଯାଇଛନ୍ତି। ଏଥିସହ ଗ୍ରାମବାସୀ ତାଙ୍କ ମୁହଁରେ ନିଆଁ ଦେବା ସହ ଶବ ସତ୍କାର କରିବେ ବୋଲି ସେ ତାଙ୍କ ସୁଇ ସାଇଡ୍ ନୋଟ୍ରେ ଉଲ୍ଲେଖ କରିଛନ୍ତି।
TAGS
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
