ସରକାରୀ ବସ୍ରୁ ମିଳିଲା ୨୨୮ କଫ ସିରପ। ବଲାଙ୍ଗିର ଜିଲ୍ଲା ଲୋଇସିଂହା ଥାନା ପୁଲିସକୁ ମିଳିଛି ଏହି ବଡ଼ ସଫଳତା। କଫ ସିରପ ଚାଲାଣ ଅଭିଯୋଗରେ ପୁଲିସ ଜଣକୁ ଗିରଫ କରିଛି। ଲୋଇସିଂହା-ପଦ୍ମପୁର ରାସ୍ତାର ଚାରି ଛକରେ ମାଡ଼ି ବସିଲା ପୁଲିସ୍।
ଭୁବନେଶ୍ୱରରୁ ବରଗଡ଼ ଜିଲ୍ଲା ଗାଈସିଲେଟ ଅଭିମୁଖେ ଯାଉଥିବା ସରକାରୀ ବସ୍ରେ ଜଣେ ବ୍ୟକ୍ତି କଫସିରପ ଚାଲାଣ କରୁଥିବା ନେଇ ଖବର ପାଇଥିଲା ଲୋଇସିଂହା ଥାନା ପୁଲିସ। ଏହା ପରେ ପୁଲିସ୍ ବସକୁ ପିଛା କରି ଚାରିଛକ ନିକଟରେ ଅଟକାଇଥିଲା। ଗାଡ଼ି ଯାଞ୍ଚ ବେଳେ କଫ ସିରପ ମିଳିଥିଲା। ଏହି ମାମଲାରେ ଆଗଲପୁର ଥାନା ସାଧୁପାଲି ଗାଁର ହେମନ୍ତ ସହୁକୁ ଗିରଫ କରିଥିଲା ପୁଲିସ୍। ତେବେ ଜବତ ହୋଇଥିବା କଫ୍ ସିରପ କେଉଁଠୁ କେଉଁ ଜାଗାକୁ ଚାଲାଣ ହେଉଥିଲା, ତାହା ଜଣାପଡ଼ି ନାହିଁ। ପୁଲିସ ଖୋଳତାଡ଼ କରୁଛି।
ରିପୋର୍ଟ-ବଲାଙ୍ଗିରରୁ ଘଟେଶ୍ୱର ମିଶ୍ର