୬୦ ଫୁଟ ଲମ୍ବ ଓଭର ବ୍ରିଜ, ଟ୍ରେନ୍ ଇଞ୍ଜିନ ପରେ ଏବେ ପୋଖରୀକୁ ବି ଛାଡ଼ିଲେନି ଚୋର। ରାତାରାତି ଗାଏବ ହୋଇଗଲା ପୋଖରୀ। ଜମି ମାଫିଆମାନେ ପୁଲିସ ପହଞ୍ଚିବା ଆଗରୁ ପୋଖରୀକୁ ଚୋରି କରି ନେଲେ। ଏଭଳି କିଛି ଅଭିନବ ଚୋରି ଘଟଣା ଘଟିଛି ବିହାରର ଦରଭଙ୍ଗା ଅଞ୍ଚଳରେ।
ବିହାର ଦରଭଙ୍ଗ ବିଶ୍ୱବିଦ୍ୟାଳୟ ଥାନାର ଓ୍ୱାର୍ଡ ନମ୍ବର-୪। ଏଠାରେ ସର୍ବସାଧାରଣଙ୍କ ପାଇଁ ଏକ ସୁନ୍ଦର ପୋଖରୀ ତିଆରି ହୋଇଥିଲା। ତେବେ ଏହି ପୋଖରୀ ଉପରେ ଜମି ମାଫିଆଙ୍କ ପଡିଥିଲା ଲୋଲୁପ ଦୃଷ୍ଟି। ରାତାରାତି ଜମି ମାଫିଆମାନେ ଏହି ପୋଖରୀକୁ ଗାଏବ କରିଦେଇଥିଲେ। ଏଥିରେ ମାଟି ଭରି ସେ ଜାଗାରେ କୁଡ଼ିଆଟିଏ ତିଆରି କରିଦେଇଥିଲେ। ତେବେ ଏନେଇ ସେଠାକାର ଲୋକେ ପୁଲିସକୁ ଖବର ଦେଇଥିଲେ। ତେବେ ପୁଲିସ ପହଞ୍ଚିବା ପୂର୍ବରୁ ଜମି ମାଫିଆମାନେ ଫେରାର୍ ହୋଇଯାଇଥିବା ସୂଚନା ମିଳିଛି।
Also Read
ରିପୋର୍ଟ ମୁତାବକ, ସେଠାକାର ସ୍ଥାନୀୟ ଲୋକେ ପୋଖରୀ ସ୍ଥାନରେ କୁଡ଼ିଆ ଦେଖି ଆଚମ୍ବିତ ହୋଇଯାଇଥିଲେ। ଏନେଇ ସେମାନେ ତୁରନ୍ତ ଏ ବିଷୟରେ ପୁଲିସକୁ ଖବର ଦେଇଥିଲେ। କିନ୍ତୁ, ଘଟଣାସ୍ଥଳରେ ପୁଲିସ ପହଞ୍ଚିବା ଆଗରୁ ପୋଖରୀ ପୋତି କୁଡ଼ିଆ ନିର୍ମାଣ କରିଥିବା ଅଭିଯୁକ୍ତମାନେ ଖସି ପଳାଇଥିଲେ।
ସ୍ଥାନୀୟ ବାସିନ୍ଦାଙ୍କ କହିବା ମୁତାବକ, ଉକ୍ତ ପୋଖରୀଟି ସର୍ବସାଧାରଣଙ୍କ ସମ୍ପତ୍ତି ଥିଲା। ସେଥିରେ ମାଛଚାଷ ଓ ଅନ୍ୟାନ୍ୟ କାର୍ଯ୍ୟକ୍ରମ କରାଯାଉଥିଲା। କିନ୍ତୁ, ଦରଭଙ୍ଗାରେ ଜମି ଦର ବୃଦ୍ଧି ପାଉଥିବାରୁ ଏହାଉପରେ ଜମି ମାଫିଆମାନଙ୍କ ନଜର ପଡିଥିଲା। ସେମାନେ ଉକ୍ତ ପୋଖରୀକୁ ପୋତିବା ଆରମ୍ଭ କରିଥିଲେ। ଏନେଇ ସ୍ଥାନୀୟ ବାସିନ୍ଦାମାନେ ପ୍ରଥମେ ସରକାରୀ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିଥିଲେ। ପରେ ସରକାରୀ ଅଧିକାରୀମାନେ କିଛି ସାମଗ୍ରୀ ଜବତ କରି ପୋଖରୀ ପୋତା କାମ ବନ୍ଦ କରିଥିଲେ। କିନ୍ତୁ, ସୁଧୁରିନଥିଲେ ମାଫିଆମାନେ। ଅନ୍ଧାର ରାତିର ସାହାରା ନେଇ ପୋଖରୀକୁ ପୋତି ଦେଇ ସେଠାରେ କୁଡିଆ ଘରଟିଏ ତିଆରି କରି ଦେଇଥିଲେ।
୧୦ ରୁ ୧୫ ଦିନ ଭିତରେ ମାଟି ପକାଇ ଉକ୍ତ ପୋଖରୀ ପୋତାଯାଇଛି। ପୋତା କାମ କେବଳ ରାତିରେ କରାଯାଉଥିଲା ବୋଲି ଏସ୍ଡିପିଓ ଅମିତ କୁମାର କହିଛନ୍ତି। ଏନେଇ ମାମଲା ରୁଜୁ ହେବା ସହ ତଦନ୍ତ ଜାରି ରହିଛି। ଜମି ମାଫିଆମାନଙ୍କୁ ଖୋଜା ଚାଲିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
