ଗୋଡ଼ାଇ ଗୋଡ଼ାଇ କୋଇଲା ଚୋରକୁ ମାଡ଼ି ବସିଲା ପୁଲିସ

କୋଇଲା ଚୋରି କରି ବାଇକ୍‌ରେ ଚମ୍ପଟ ମାରୁଥିଲା। ଅନୁଗୋଳ ପୁଲିସ୍‌ ଗୋଡ଼ାଇ ଗୋଡ଼ାଇ ଜଙ୍ଗଲ ଭିତରେ ମାଡ଼ି ବସିଲା। ଏଥିସହ ବାଇକ୍‌ ଓ କୋଇଇଲା ଜବତ କରି ଘଟଣାର ତଦନ୍ତ ଚଳାଇଛି ପୁଲିସ୍‌। 

ତାଳଚେରରେ ଥିବା ଏକ କୋଇଲା ଖଣିରୁ ବାଇକ୍‌ରେ କୋଇଲା ଚୋରା ଚାଲାଣ ହେଉଥିଲା। କୌଣସି ସୂତ୍ରରୁ ଖବର ପାଇ ପୁଲିସ୍‌ କୋଶଳ ଜଙ୍ଗଲ ରାସ୍ତାରେ ଛକି ରହିଥିଲା। ଠିକ୍‌ ସେହି ସମୟରେ ଜଣେ ଯୁବକ ବାଇକରେ କୋଇଲା ଧରି ଯାଉଥିଲେ। ପୁଲିସ୍‌ ତାଙ୍କୁ ଅଟକାଇବାକୁ ଚେଷ୍ଟା କରିଥିଲେ। ମାତ୍ର ସେ ଅଟକିବା ପରିବର୍ତ୍ତେ ଦ୍ରୁତ ଗତିରେ ପଳାଇ ଯାଇଥିଲେ। ପୁଲିସ୍‌ ତାଙ୍କୁ ଗୋଡ଼ାଇ ଥିଲା। 

କିଛି ବାଟ୍‌ ଗଲା ପରେ ଯୁବକ ଜଣକ କୋଶଳା ଜଙ୍ଗଲକୁ ପଳାଇ ଯାଇଥିଲା। ହେଲେ ପୁଲିସ୍‌ ଛାଡ଼ିବା ମୋଡ୍‌ରେ ନଥିଲା। ଗୋଡ଼ାଇବାରୁ ଯୁବକ ବାଇକ୍‌ ଛାଡ଼ି ପଳାଇ ଜଙ୍ଗଲ ଭିତରକୁ ଚାଲି ଯାଇଥିଲା। ପୁଲିସ ତାକୁ ଗୋଡ଼ାଇ ଗୋଡ଼ାଇ ଶେଷରେ ଧରିବାରେ ସଫଳ ହୋଇଥିଲା। ତଦନ୍ତରେ ବ୍ୟାଘାତ ହେବ ବୋଲି ପୁଲିସ୍‌ ଗିରଫ ଅଭିଯୁକ୍ତଙ୍କ ନାଁ ପ୍ରକାଶ କରିନି। 

ରିପୋର୍ଟ- ଅନୁଗୋଳରୁ ବିରଜା ଦାଶ