ଗୁଣିଗାରେଡ଼ି ସନ୍ଦେହରୁ ଗଲା ସ୍ୱାମୀର ଜୀବନ, ଦୌଡ଼ି ଦୌଡ଼ି ଜୀବନ ବଞ୍ଚାଇଲା ପତ୍ନୀ

ଗୁଣିଗାରେଡ଼ି ସନ୍ଦେହରେ ଗଡ଼ିଲା ମୁଣ୍ଡ । ଜଣେ ନିରୀହ ଆଦିବାସୀଙ୍କୁ ବାଡେଇ ବାଡ଼େଇ ପଡ଼ୋଶୀ ଜୀବନ ନେଇଥିବା ବେଳେ ତାଙ୍କ ସ୍ତ୍ରୀ ପ୍ରାଣ ବିକଳରେ ରାତିରେ ଜଙ୍ଗଲରେ ଦୌଡ଼ି ଦୌଡ଼ି ଯାଇ ନିଜ ଜୀବନ ରକ୍ଷା କରି ପାରିଛନ୍ତି। ଏପରି ଏକ ଲୋମଟାଙ୍କୁରେ ଘଟଣା ସମ୍ବଲପୁର ଜିଲ୍ଲା, କିସିଣ୍ଡା ଥାନା ଡିମିରିକୁଦା ଗାଁରେ ଘଟିଛି। ମୃତକ ହେଲେ ଶୁକ୍ରୁ ମାଝୀ ।

ଡିମିରିକୁଦା ଗାଁର ସଞ୍ଜୁ ମାଝୀଙ୍କ ୪ ବର୍ଷ ର ପୁଅର ଦେହ କିଛିଦିନ ହେବ ବାରମ୍ବାର ଖରାପ ରହୁଥିବା ବେଳେ ଶେଷରେ ସେ ଆଖି ବୁଜିଥିଲା। ତେବେ ସଞ୍ଜୁଙ୍କ ପୁଅର ମୃତ୍ୟୁର କାରଣ ସେହି ଗାଁର ଶୁକ୍ରୁ ମାଝୀ ବୋଲି ପରିବାର ଲୋକଙ୍କର ସନ୍ଦେହ ହୋଇଥିଲା। ଏହାକୁ ନେଇ ସଞ୍ଜୁ ମାଝୀ ପରିବାର ସହ ଶୁକ୍ରଙ୍କର ସବୁବେଳେ ଗଣ୍ଡଗୋଳ ଲାଗି ରହୁଥିଲା ।

ଏହି କାରଣକୁ ନେଇ ଗତ କାଲି ବିଳମ୍ବିତ ରାତିରେ ସଞ୍ଜୁ ମାଝୀ ସହ ଅନ୍ୟ ୪ ଜଣ ମିଶି କାଠ ଫାଳିଆ ଓ ଟାଙ୍ଗିଆ ଧରି ଶୁକ୍ରୁ ମାଝୀଙ୍କ ଘରେ ପଶି ତାଙ୍କୁ ପିଟି ପିଟି ହତ୍ୟା କରିଥିଲେ । ତାପରେ ଶୁକ୍ରୁଙ୍କ ସ୍ତ୍ରୀ ରତନୀ ମାଝୀଙ୍କୁ ମଧ୍ୟ ସେମାନେ ହତ୍ୟା କରିବାକୁ ଉଦ୍ୟମ କରିଥିଲେ। ମାତ୍ର ରାତାରାତି ସେ ଜଙ୍ଗଲିଆ ରାସ୍ତାରେ ଦୌଡ଼ି ଦୌଡ଼ି ହତ୍ୟାକାରୀଙ୍କ କବଳରୁ ଖସି ଆସିଥିଲେ । ଏହାପରେ ସେ ଗାଁ ବାହାରେ ରାତିରେ ଆଶ୍ରୟ ନେଇଥିଲେ।

ଏନେଇ ମୃତକଙ୍କ ସ୍ତ୍ରୀଙ୍କ ଅଭିଯୋଗ କ୍ରମେ ପୁଲିସ୍‌ ମାମଲା ରୁଜୁଛି। ଏହି ଘଟଣାର ତଦନ୍ତ କରି ପୁଲିସ୍‌ ଦୁଇ ଜଣଙ୍କୁ ଅଟକ ସହ ତଦନ୍ତ ଚାଲିଛି ବୋଲି ରେଢ଼ାଖୋଲ ଏସଡିପିଓ କହିଛନ୍ତି ।