ଦାଦନ ଦୁଃଖ: ୩ମାସ ତଳେ ଘରୁ ଗୋଡ଼ କାଢ଼ିଥିଲେ ୨ନାବାଳକ, ଫେରିଲା ମୃତଦେହ

ଦାଦନ ଖଟିବାକୁ ୩ମାସ ତଳେ ଘରୁ ପାଦ କାଢ଼ିଥିଲେ୨ ନାବାଳକ।  ନିଜ ରୋଜଗାରରେ ପରିବାରର ବୋଝ ମୁଣ୍ଡାଇବ ବୋଲି ଭାବି ବାହାର ରାଜ୍ୟକୁ ଯାଇଥିଲେ। କଅଁଳ କାନ୍ଧରେ ବଡ଼ ଦାୟିତ୍ୱ ନେବାକୁ ନିଜ ମନକୁ ଦମ୍ଭ ବି କରିଥିଲେ। ମାତ୍ର ସେତକ ବି ସହିଲାନି ଦଇବ। ଯେଉଁଠି ଦୁଇ ଭାଇ ଦାଦନ ଖଟୁଥିଲେ, ସେଠି ମିଳିଲା ନିର୍ଯାତନା। କୌଶଳ କ୍ରମେ ଖସି ଆସିଥିଲେ ବି ଘରେ ପହଞ୍ଚି ପାରିନଥିଲେ। ଅଧାବାଟରେ ଚାଲିଯାଇଥିଲା ଦୁଇ ଭାଇଙ୍କ ଜୀବନ। ୨ପୁଅଙ୍କ ମୃତ୍ୟୁ ଖବର ପାଇ ଆଖିରୁ ଲୁହ ଗଡ଼ାଉଛନ୍ତି ବାପାମା’। ଏପରି ଏକ ହୃଦୟ ବିଦାରକ ଘଟଣା ଘଟିଛି ରାୟଗଡ଼ା ଜିଲ୍ଲା ଟିକିରି ଥାନା ଅନ୍ତର୍ଗତ ମକାପଦର ଗାଁରେ।

ମକାପଦର ଗାଁର ଦୁଇ ଭାଇ ଗଙ୍ଗାଧର ମାଝି ଓ ମହେଶ୍ୱର ମାଝି ଦାଦନ ଖଟିବାକୁ ବିଶାଖାପାଟଣା ନିକଟ ପାଲମନପେଟା ସ୍ଥିତ ଏକ କମ୍ପାନୀକୁ ଯାଇଥିଲେ। କିଛି ଦିନ ସେହି କମ୍ପାନୀରେ କାମ କରିବା ପରେ ସେମାନଙ୍କ ଦେହ ଅସୁସ୍ଥ ହୋଇଥିଲା। ହେଲେ କଂପାନୀ କର୍ତ୍ତୃପକ୍ଷ ସେମାନଙ୍କର ଚିକିତ୍ସା ପାଇଁ କୌଣସି ସହାୟତା କରିନଥିଲା। ବରଂ କମ୍ପାନୀରେ ଅଧିକ କରାଯିବା ସହ ନର୍ଯାତନା ଦିଆଯାଇଥିବା ଅଭିଯୋଗ ହୋଇଛି। ଫଳରେ ଦିନକୁ ଦିନକୁ ଦୁଇ ଭାଇଙ୍କ ଦେହ ଅଧିକ ଖରାପ ହୋଇଥିଲା। ସେମାନେ ଘରକୁ ଫେରିଆସିବା ପାଇଁ ମନ ସ୍ଥିର କରିଥିଲେ। ସୁପର ଭାଇଜରଙ୍କଠାରୁ କିଛି ଟଙ୍କା ଧାର ମାଗି ଟ୍ରେନ୍ ଯୋଗେ ରାୟଗଡ଼ା ପଳାଇ ଆସିଥିଲେ ଦୁଇ ଭାଇ। ଗତକାଲି ରାୟଗଡ଼ା ଷ୍ଟେସନରେ ପହଞ୍ଚିବା ପରେ ଦୁଇ ଭାଇ ଚାଲି ପାରୁ ନଥିଲେ। ଦୁଇ ଜଣଙ୍କ ଅବସ୍ଥା ଗୁରୁତର ଥିଲା। ଉଭୟ ଷ୍ଟେସନରେ ଗୋଟିଏ ସ୍ଥାନରେ ବସିଥିଲେ।

ଜିଆରପି ଉଭୟଙ୍କ ଦେଖି ପଚରାଉଚରା କରିବା ପରେ ସେମାନଙ୍କୁ ଆମ୍ବୁଲାନ୍ସ ଯୋଗେ ରାୟଗଡ଼ା ମେଡିକାଲରେ ଭର୍ତ୍ତି କରିଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ଅବସ୍ଥାରେ ଗଙ୍ଗାଧରର ମୃତ୍ୟୁ ଘଟିଥିଲା। ମହେଶ୍ୱରର ଅବସ୍ଥା ଗୁରୁତର ଥିବାରୁ ତାଙ୍କୁ  ବ୍ରହ୍ମପୁର ମେଡିକାଲକୁ ସ୍ଥାନାନ୍ତର କରାଯାଇଥିଲା। ଗତକାଲି ବିଳମ୍ବିତ ରାତିରେ ମହେଶ୍ୱରଙ୍କ ମୃତ୍ୟୁ ଘଟିଛି।

ଦୁଇ ଭାଇଙ୍କ ମୃତ୍ୟୁ ପରେ ପରିବାରରେ ଶୋକର ଛାୟା ଖେଳିଯାଇଛି। ଏହି ଘଟଣା ନେଇ ପ୍ରଶାସନର ପ୍ରତିକ୍ରିୟା ମିଳିପାରିନି।