ସ୍ୱାମୀ ପାଣି ପାଇଁ ଯାଇଥିଲେ, ମହିଳାଙ୍କୁ ଛୁରୀ ଭୁସି ଦେଲେ ଦୁର୍ବୃତ୍ତ

ରାଜଧାନୀରେ ଜଣେ ମହିଳାଙ୍କୁ ବୀଭତ୍ସ ଭାବେ ହତ୍ୟା କରାଯାଇଛି। ଘଟଣା ଘଟିଛି ଚନ୍ଦକା ଥାନା ଅଞ୍ଚଳ ଗୋଠାପଟଣା ଛକ ନିକଟସ୍ଥ ଏକ ଜଳଖିଆ ଦୋକାନରେ।  ମୃତ ମହିଳା ଜଣଙ୍କ ହେଲେ ସସ୍ମିତା ବେହେରା ।

ଗୋଠାପଟଣା ବଜାରରେ ସସ୍ମିତାଙ୍କ ସ୍ୱାମୀ ଜଳଖିଆ ଦୋକାନ କରିଥିଲେ। ଗତକାଲି ରାତିରେ ସସ୍ମିତାଙ୍କ ସ୍ୱାମୀ ପାଣି ଆଣିବାକୁ ନିକଟକୁ ଯାଇଥିଲେ।ସସ୍ମିତା ଦୋକାନରେ ଏକୁଟିଆ ଥିଲେ। ଏହି ସମୟରେ ସସ୍ମିତାଙ୍କୁ କେହି ଦୁର୍ବୃତ୍ତ ଛୁରୀ ଭୁସି ହତ୍ୟା କରିଥିବା ଅଭିଯୋଗ ହୋଇଛି। ପୁଲିସ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ଓ ଘଟଣା ତଦନ୍ତ କରୁଛି।

କେଉଁ କାରଣ ପାଇଁ ସସ୍ମିତାଙ୍କୁ ଦୁର୍ବୃତ୍ତମାନେ ଛୁରୀ ଭୁସି ହତ୍ୟା କଲେ ତାର କାରଣ ଜଣାପଡ଼ିନାହିଁ। ପୂର୍ବ ଶତ୍ରୁତା କାରଣରୁ ତାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି। ସସ୍ମିତା ତାଙ୍କ ସ୍ୱାମୀ କ୍ରିଷ୍ନାପୁରୀ କଲୋନୀରେ ପରିବାର ସହ ରହୁଥିଲେ।