୧୧ରେ ପାଳନ ହେବ ଇଦ୍

ଓଡ଼ିଶାରେ ଆସନ୍ତା ୧୧ତାରିଖ ଗୁରୁବାର ପବିତ୍ର ଇଦ୍‌-ଉଲ-ଫିତର ପାଳନ ହେବ । ରାଜ୍ୟର ମୁସଲିମ୍ ସମୁଦାୟର ଲୋକମାନେ ୧୧ତାରିଖରେ ଇଦ୍ ପାଳିବେ ବୋଲି କଟକସ୍ଥିତ ଅଞ୍ଜୁମନ ଇସଲାମିୟା ଚାନ୍ଦ କମିଟି ଘୋଷଣା କରିଛନ୍ତି ।

ଆଜି ଚାନ୍ଦ ଦୃଶ୍ୟମାନ ନହେବା ପରେ କମିଟିର ଏକ ବୈଠକ ଅନୁଷ୍ଠିତ ହୋଇଥିଲା । ବୈଠକ ପରେ ଗଣମାଧ୍ୟମକୁ ସୂଚନା ଦେଇ ଅଞ୍ଜୁମନ ଇସଲାମିୟା ଚାନ୍ଦ କମିଟି ପକ୍ଷରୁ କୁହାଯାଇଛି ଯେ, ଆଜି ମଙ୍ଗଳବାର ଆକାଶରେ ଚାନ୍ଦ(ଚନ୍ଦ୍ର) ଦେଖାନଯିବା କାରଣରୁ ଗୁରୁବାର ଇଦ୍ ପାଳନ ପାଇଁ ନିଷ୍ପତ୍ତି ନିଆଯାଇଛି । ଇସଲାମିକ ପରମ୍ପରା ଅନୁସାରେ, ଇଦ୍ ପର୍ବ ପାଳନ ପାଇଁ ଚାନ୍ଦ ଦୃଶ୍ୟମାନ ହେବା ଜରୁରୀ । ଯଦି ପବିତ୍ର ରମଜାନ୍ ମାସର ୨୯ତମ ଦିନରେ ଚାନ୍ଦ ଦୃଶ୍ୟମାନ ନହୁଏ ତା’ହେଲେ ୩୦ତମ ଦିନ ଉପବାସ କରାଯାଏ ଓ ତା’ର ପରଦିନ ଇଦ୍ ଉଲ-ଫିତର ପାଳନ କରାଯାଏ ।

ଅବଶ୍ୟ ସାଉଦିଆରବରେ ବୁଧବାର ଇଦ୍ ପାଳନ କରାଯିବ । କାରଣ ସେଠାରେ ମଙ୍ଗଳବାର ଚାନ୍ଦ ଦୃଶ୍ୟମାନ ହୋଇଛି । ସାଧାରଣତଃ ସାଉଦିଆରବ ଭଳି ମରୁଭୂମି ଥିବା ଦେଶଗୁଡ଼ିକରେ ଇଦ୍ ପାଳନର ଦିନକ ପରେ ଭାରତରେ ଇଦ୍ ପାଳିତ ହୋଇଥାଏ ।