ନୂଆଦିଲ୍ଲୀ: ଲକଡାଉନ୍ ପାଇଁ ସାରା ଦେଶରେ ସ୍କୁଲ୍, କଲେଜ, ବିଶ୍ୱବିଦ୍ୟାଳୟ ଏବଂ ଶିକ୍ଷାନୁଷ୍ଠାନ ବନ୍ଦ ରହିଛି। ଏମିତିକି ସରକାରଙ୍କ ଦ୍ୱାରା ଆୟୋଜିତ ହେଉଥିବା ପ୍ରଶିକ୍ଷିଣ ଶିବିର ମଧ୍ୟ ବନ୍ଦ ରହିଛି। ଆଗକୁ ୟୁପିଏସସିର ଇଣ୍ଟରଭ୍ୟୁ ଏବଂ ପର୍ସନାଲଟି ଟେଷ୍ଟ ରହିଛି। ଏହି ପରୀକ୍ଷାର ତାରିଖ ଘୁଞ୍ଚାଇ ଦିଆଯାଇଛି। ହେଲେ ଆଗାମୀ ମାସରେ ହେବାକୁ ଥିବା ୟୁପିଏସସି ପ୍ରିଲିମ୍ସ ପରୀକ୍ଷା ନେଇ କୌଣସି ନିଷ୍ପତ୍ତି ନିଆଯାଇନଥିଲା।
ରବିବାର କେନ୍ଦ୍ରମନ୍ତ୍ରୀ ଡକ୍ଟର ଜିତେନ୍ଦ୍ର ସିଂହ ସରକାରୀ କର୍ମଚାରୀଙ୍କ ଅବସର ବାବଦରେ ଥିବା କନଫ୍ୟୁଜନ ଦୂର କରିବା ବେଳେ ୟୁପିଏସସି ପରୀକ୍ଷା ବାବଦରେ ସ୍ପଷ୍ଟ କରିଛନ୍ତି। ସେ କହିଛନ୍ତି ମେ’ ୩ ପରେ ୟୁପିଏସସି ପରୀକ୍ଷା ହେବ।
ସୂଚନାଯୋଗ୍ୟ, ମେ ୩୧, ୨୦୨୦ରେ ୟୁପିଏସସି ପରୀକ୍ଷା ହେବ ବୋଲି ନିର୍ଦ୍ଧାରିତ ହୋଇଛି। ଏହା ପୂର୍ବରୁ ୧୬ ଏପ୍ରିଲରେ ୟୁପିଏସସି ସ୍ପଷ୍ଟ କରିଥିଲା ଯେ ୟୁପିଏସସି ପ୍ରିଲିମ୍ସ ପରୀକ୍ଷା ଘୁଞ୍ଚାଇବା ପାଇଁ କୌଣସି ନିଷ୍ପତ୍ତି ନିଆଯାଇନାହିଁ। ଯଦି ନିଷ୍ପତ୍ତି ନିଆଯିବ ତା’ହେଲେ ଏ ନେଇ ସରକାରୀ ଭାବରେ ଘୋଷଣା କରାଯିବ।
କରୋନା ସଂକ୍ରମଣକୁ ଦୂରେଇବା ପାଇଁ ଦେଶ ଏବେ ଲକଡାଉନ୍ ରହିଛି। ମାର୍ଚ୍ଚ ୨୪ ପରଠାରୁ ଦେଶ ଲକଡାଉନ୍ ରହିଛି। ଏହାର ଅବଧି ମେ’ ୩ରେ ଶେଷ ହେଉଛି। ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ୁଥିବାରୁ ଲକଡାଉନ ଅବଧି ବଢ଼ିବ କି କିଛି ସର୍ତ୍ତମୂଳକ କଟକଣା ସହିତ ଲକଡାଉନ୍ ଅବଧି ହଟାଯିବ ସେ ନେଇ କୌଣସି ନିଷ୍ପତ୍ତି ନିଆଯାଇ ନାହିଁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
