ମୁମ୍ବାଇ: ସମଗ୍ର ଉତ୍ତର ଭାରତରେ ଜାରି ରହିଛି ଶୀତର ଲହରୀ। ବିଭିନ୍ନ ସ୍ଥାନରେ ବର୍ଷା ଯୋଗୁଁ ପାରଦ ଖସିଛି, ଫଳରେ ଭୀଷଣ ଥଣ୍ଡା ଅନୁଭତ ହେଉଛି । ଏଭଳି ସ୍ଥିତିରେ ମାଇନସ ୩୩ ଡିଗ୍ରୀର ସାମ୍ନା କରିଛନ୍ତି ବଲିଉଡର ମହାନାୟକ ଅମିତାଭ ବଚ୍ଚନ। ଏନେଇ ସେ ନିଜେ ଫଟୋ ଶେଆର କରି ସୂଚନା ଦେଇଛନ୍ତି ।
ନିକଟରେ ବିଗ୍ ବି’ ଲଦାଖ ଟ୍ରିପରୁ ଫେରିଛନ୍ତି । ଏହି ଲଦାଖ ଟ୍ରିପର ଫଟୋକୁ ସେ ନିଜ ଟ୍ୱିଟର ହ୍ୟାଣ୍ଡେଲରେ ଶେଆର କରିଛନ୍ତି। ଲଦାଖରେ ସେ କିଭଳି ଥଣ୍ଡାର ସାମ୍ନା କରିଛନ୍ତି ଏବଂ ସେଠାକାର ଅନୁଭୂତି କ’ଣ ଥିଲା ଏନେଇ ସେ ପ୍ରଶଂସକଙ୍କ ସାମ୍ନାରେ ବଖାଣିଛନ୍ତି।
ଫଟୋକୁ ଶେଆର କରି ଅମିତାଭ କହିଛନ୍ତି, ମୁଁ ନିକଟରେ ଲଦାଖରୁ ଫେରିଛି । ଯେଉଁଠି ତାପମାତ୍ରା ମାଇନସ୍ ୩୩ ଡିଗ୍ରୀ ଥିଲା । ମୋର ସବୁ ଚେଷ୍ଟା ଏବଂ ମୋଟା ଜ୍ୟାକେଟ ମୋତେ ସେଠାକାର ଥଣ୍ଡାରୁ ରକ୍ଷା କରିପାରିଲା ନାହିଁ ବୋଲି କହିଛନ୍ତି।
T 3774 - ... went to Ladakh and back .. minus 33 degrees .. even this could ot save me from the cold .. !! pic.twitter.com/I2BduanyYY
— Amitabh Bachchan (@SrBachchan) January 5, 2021
ଏହି ଫଟୋରେ ଅମିତାଭ ଥଣ୍ଡାରୁ ରକ୍ଷା ପାଇବା ପାଇଁ ଯେତେ ସମ୍ଭବ ସେତେ ପ୍ରକାରର ଚେଷ୍ଟା କରିଥିବା ଦେଖିବାକୁ ମିଳିଛି । ସେ ଧଳାରଙ୍ଗର ଟ୍ରାକିଂ ଜ୍ୟାକେଟ ସହ ସ୍ନୋ ଚଷମା ଏବଂ ଗ୍ଲୋବ୍ସ ପିନ୍ଧିଛନ୍ତି । ମୁଣ୍ଡରେ ଗୋଟିଏ ମଙ୍କି କ୍ୟାପ୍ ମଧ୍ୟ ଲଗାଇଛନ୍ତି । ତେବେ ମାଇନସ୍ ୩୩ ଡିଗ୍ରୀ ତାଙ୍କ ଅବସ୍ଥାକୁ ଆହୁରି ଖରାପ କରିଦେଇଥିବା ଦେଖିବାକୁ ମିଳିଛି । ଲଦାଖରୁ ଫେରିବା ପରେ ଅମିତାଭଙ୍କ ଅବସ୍ଥା ବିଗିଡି ଯାଇଛି। ସେ ଅସୁସ୍ଥ ହୋଇପଡିଛନ୍ତି। ଅମିତାଭ ଥଣ୍ଡା ଜ୍ୱରରେ ଆକ୍ରାନ୍ତ ହୋଇପଡିଥିବା ଏକ ମିଡିଆର ରିପୋର୍ଟରୁ ଜଣାପଡିଛି ।
ସୂଚନା ଯୋଗ୍ୟ ଯେ ଅମିତାଭ ଏବେ ପପୁଲାର ଟିଭି ଶୋ’ ‘କୌନ ବନେଗା କରୋଡପତି’ ସିଜିନ-୧୨ରେ ହୋଷ୍ଟ କରୁଛନ୍ତି। ନିକଟରେ ସେ ତାଙ୍କ ପରିବାର ସହ ନୂଆବର୍ଷ ସେଲିବ୍ରେସନ କରିଛନ୍ତି । ଏହି ସେଲିବ୍ରେସନ ବେଳର ଫଟୋ ସୋଶାଲ ମିଡିଆରେ ବେଶ ଭାଇରାଲ ହୋଇଛି ।