ମୁମ୍ବାଇ: ବିବାଦରେ ବିଲଉଡ ଅଭିନେତ୍ରୀ ମୀରା ଚୋପ୍ରା। ସେ ନକଲି ପରିଚୟପତ୍ର ଜରିଆରେ ନିଜକୁ ସମ୍ମୁଖ ଯୋଦ୍ଧାର ପରିଚୟ ଦେଇ କରୋନା ଟିକାର ପ୍ରଥମ ଡୋଜ୍ ନେଇଥିବା ଅଭିଯୋଗ ହୋଇଛି। ଥାଣେର ଗୋଟିଏ ସ୍ୱାସ୍ଥ୍ୟକେନ୍ଦ୍ରରେ ସେ ଫେକ୍ ଆଇଡି ଜରିଆରେ ଟିକା ନେଇଥିବା ଘଟଣା ନୂଆ ବିବାଦ ସୃଷ୍ଟି କରିଛି। ତେବେ ଅଭିନେତ୍ରୀ ମୀରା ଏହାକୁ ଖଣ୍ଡନ କରିଛନ୍ତି।
ମୀରା ଚୋପ୍ରା ୧୮ରୁ ୪୪ ବର୍ଷର ବର୍ଗ ମଧ୍ୟରେ ଆସୁଛନ୍ତି। ଟିକାର ଅଭାବ ଯୋଗୁ ମହାରାଷ୍ଟ୍ର ସରକାର ଏହି ବର୍ଗର ଲୋକଙ୍କ ଟିକାକରଣ ବନ୍ଦ ରଖିଛନ୍ତି। ହେଲେ ମୀରା ନକଲି ପରିଚୟ ପତ୍ର ଜରିଆରେ ନିଜକୁ ଗୋଟିଏ ଘରୋଇ ଫାର୍ମର ସୁପରଭାଇଜର ଭାବେ ଦର୍ଶାଇଥିଲେ।
ଏହାପରେ ସମ୍ମୁଖ ଯୋଦ୍ଧା ଭାବେ ସେ ଜରୁରୀ କାଳୀନ ଭିତ୍ତିରେ ଟିକା ନେଇଥିବା କୁହାଯାଉଛି। ସେ ଟିକା ନେବା ପରେ ଫଟୋ ଅପଲୋଡ କରିଥିଲେ। ବିବାଦ ପରେ ଏହାକୁ ବର୍ତ୍ତମାନ ଡିଲେଟ କରିଦିଆଯାଇଛି। ହେଲେ ସୋଶାଲ ମିଡିଆରେ ମୀରା ବ୍ୟବହାର କରିଥିବା ଫେକ୍ ପରିଚୟପତ୍ର ଭାଇରାଲ ହେବାରେ ଲାଗିଛି।
ଅନ୍ୟପକ୍ଷରେ ସୋଶାଲ ମିଡିଆରେ ମୀରାଙ୍କ ନାଁରେ ଭାଇରାଲ ହେଉଥିବା ପରିଚୟପତ୍ର ସମ୍ପର୍କରେ ସେ କିଛି ଜାଣି ନଥିବା କହିଛନ୍ତି। ଥାଣେ ମ୍ୟୁନସିପାଲ କର୍ପୋରେସର କମିଶନର ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି। ୩ ଦିନ ମଧ୍ୟରେ ମୀରା ନକଲି ପରିଚୟ ପତ୍ର ଦେଖାଇ ଟିକା ନେଇଛନ୍ତି କି ନାହିଁ, ତା’ର ରିପୋର୍ଟ କମିଶନରଙ୍କ ପାଖରେ ଦାଖଲ କରାଯିବ।
ମୀରା ଚୋପ୍ରା ଗୋଟିଏ ବିବୃତି ଜାରି କରି କହିଛନ୍ତି, “ମୋତେ କେବଳ ଟିକା ପାଇଁ ଆଧାର କାର୍ଡ ମଗାଯାଇଥିଲା। ସୋଶାଲ ମିଡିଆରେ ଭାଇରାଲ ହେଉଥିବା ଆଇଡି ମୋର ନୁହେଁ। ମୋତେ ପଞ୍ଜୀକରଣ ପାଇଁ କେବଳ ଆଧାର କାର୍ଡ ମଗାଯାଇଥିଲା ଓ ମୁଁ କେବଳ ସେହି ପରିଚୟପତ୍ର ଦେଇଥିଲି।
ଆପଣଙ୍କ ଦସ୍ତଖତ ନ ଥିବା କୌଣସି ଆଇଡି ବୈଧ ନୁହେଁ। ଟ୍ୱିଟରରେ ମୋ ନାଁରେ ପ୍ରଚାର ହେଉଥିବା ଆଇଡିକୁ ମୁଁ ପ୍ରଥମଥର ଦେଖୁଛି। ମୁଁ ନକଲି ପରିଚୟ ପତ୍ର ଭାଇରାଲ ଘଟଣାକୁ ନିନ୍ଦା କରୁଛି। ମୋ ନାଁରେ ଏପରି କିଏ ଓ କାହିଁକି କରୁଛି, ତା’ର କାରଣ ମୁଁ ମଧ୍ୟ ଜାଣିବାକୁ ଚାହୁଁଛି।”
My statement on the articles that has been coming out fr my vaccine shot!! pic.twitter.com/wDE70YHsMo
— meera chopra (@MeerraChopra) May 30, 2021
ମୀରା ଚୋପ୍ରା ହେଉଛନ୍ତି ଅଭିନେତ୍ରୀ ପ୍ରିୟଙ୍କା ଚୋପ୍ରାଙ୍କ ସମ୍ପର୍କୀୟ ଭଉଣୀ। ସେ ହିନ୍ଦୀ ସିନେମା ସହ ତାମିଲ ଓ ତେଲଗୁ ଫିଲ୍ମରେ ମଧ୍ୟ ଅଭିନୟ କରିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
